Buulus fi Afasus
19
Wa wakit Abuluus gaaʼid fi Kuruntus,
Buulus kammal ruwaakhitah fi l-hillaal al-fi l-jibaal wa khalaas,
wisil fi hillit Afasus.
Wa hinaak ligi talaamiiz waahidiin.
2 Wa Buulus saʼalaahum wa gaal :
Al-Ruuh al-Khudduus nazal foogku wakit aamantu walla ?
Wa gaalo :
La.
Al-Ruuh al-Khudduus ma naʼarfuuh wa ma simiʼna beyah.
3 Wa Buulus saʼalaahum wa gaal :
Wakit khattasooku,
al-takhtiis da kikkeef ?
Wa gaalo :
Khattasoona ale hasab taʼliim Yahya.
4 Wa Buulus gaal :
Yahya khattas al-naas al-taabo min zunuubhum.
Wa gaal le l-naas kadar waajib yiʼaamunu be l-naadum al-jaayi waraayah.
Wa l-naadum da,
hu Isa.
5 Wa wakit simʼo kalaam Buulus da,
khattasoohum be usum al-Rabb Isa.
6 Wa wakit Buulus khatta iideenah fooghum,
al-Ruuh al-Khudduus nazal fooghum wa hajjo be lukhkhaat jadiide wa kallamo kalaam naazil min Allah.
7 Wa adadhum misil atnaachar rujaal.
8 Wa Buulus dakhal fi beet al-sala wa bada yihajji be kalaam gawi le l-naas.
Wa muddit talaata chuhuur,
hu yinaakhich maʼaahum fi mamlakat Allah achaan yijiibhum fi l-derib.
9 Wa laakin waahidiin minhum raashum gawi ma dawwaro yiʼaamunu.
Wa gammo yiʼayyuru Derib al-Masiih giddaam al-naas.
Wa be da,
Buulus gamma anfarag minhum maʼa talaamiizah wa bada yifassir leehum al-kalaam kulla ma yoom fi madrasa hana naadum usmah Tiiraanuus.
10 Wa Buulus gaaʼid yiballikh al-bichaara misil da muddit sanateen.
Wa be misil da,
kulla l-naas al-saakniin fi balad Aasiya*,
min al-Yahuud wa min al-Yuunaaniyiin,
simʼo kalaam al-Rabb.
11 Wa Allah anta le Buulus ajaayib kubaar bilheen,
12 lahaddi al-naas bado yichiilu minnah ayyi cheyy al-limis jildah misil al-gitʼe al-yarbutha fi raasah walla khalagah hana l-khidme wa yukhuttuuh fi l-mardaaniin.
Wa l-marad yikhalliihum wa l-chawaatiin yamurgu minhum.
Awlaad Sakaawa
13 Fi l-balad di,
fiyah Yahuud waahidiin raaykhiin hille le hille wa khidmithum yidaawu al-muchootiniin.
Wa waahidiin minhum bado yistʼamulu usum al-Rabb Isa achaan yaturdu beyah chawaatiin wa bado yuguulu «
Naamurak be usum Isa al-Buulus gaaʼid yihajji beyah ».
14 Wa l-naas al-sawwo misil da,
humman sabʼa rujaal kulluhum awlaad hana Yahuudi usmah Sakaawa wa hu kabiir waahid hana rujaal al-diin.
15 Wa l-cheetaan al-dawwaro yaturduuh radda leehum wa gaal :
Isa naʼarfah wa usum Buulus naʼarfah wa laakin intu yaatumman ?
16 Wa l-muchootin hajamaahum wa hu chadiid minhum wa ajala annasar fooghum.
Hu jarahaahum wa charat khulgaanhum lahaddi jaro min al-beet aryaaniin.
17 Wa kulla l-naas al-saakniin fi hillit Afasus min al-Yahuud wa min al-Yuunaaniyiin simʼo al-khabar da wa khoof chadiid dakhal leehum wa karramo ziyaada usum al-Rabb Isa.
18 Wa fi l-bakaan da,
katiiriin min al-muʼminiin gammo iʼtarafo be aʼmaalhum al-cheeniin al-sawwoohum be l-achiir.
19 Wa naas katiiriin minhum al-awwal yisawwu al-sihir lammo kutubhum wa tachchoohum giddaam naas al-hille.
Wa hasabo taman al-kutub dool wa bigi misil khamsiin alif riyaal fudda.
20 Wa be misil da,
naas ziyaada simʼo kalaam al-Rabb wa gudurtah zaadat fi usuthum.
Al-barjaal fi Afasus
21 Wa baʼad da,
Buulus chaal niiye achaan yamchi fi Madiinat al-Khudus.
Wa gubbaal ma yamchi hinaak,
dawwar yuruukh fi Magiduuniya wa Yuunaan.
Wa gaal :
Namchi fi Madiinat al-Khudus wa baʼad da,
laazim namchi fi madiinat Rooma kula.
22 Wa Buulus ikhtaar naaseen min al-akhwaan al-gaaʼidiin yakhdumu maʼaayah wa rassalaahum fi Magiduuniya achaan yamchu giddaamah.
Wa humman Timuutaawus wa Rastus.
Wa Buulus zaatah gaʼad battaan mudda gisayre fi balad Aasiya.
23 Wa fi l-wakit da,
barjaal kabiir gamma fi Afasus be sabab Derib al-Masiih.
24 Fiyah sayyaakhi waahid usmah Dimitri.
Khidimtah yasnaʼ min al-fudda suwar dugaag bichaabuhu beet al-ibaada hana l-ilaaha Artaamiis achaan yibiiʼuuhum le l-naas.
Hu wa l-naas al-yisawwu nafs al-sinaaʼa ligo min al-tijaara di faayde katiire.
25 Wa hu lamma kulla l-sannaaʼiyiin wa khaddaamiinhum.
Wa kallam leehum wa gaal :
Ya l-akhwaan,
taʼarfu maalna jaayi min al-khidme di.
26 Wa chiftu wa simiʼtu kikkeef Buulus da khachcha naas katiiriin.
Wa ma khachcha naas hana Afasus bas laakin gariib kulla l-naas al-gaaʼidiin fi balad Aasiya.
Buulus gaal leehum kadar al-ilaahaat al-naas sanaʼoohum ma ilaahaat be l-sahiih.
Wa jaab naas katiiriin fi derbah.
27 Wa l-kalaam da ma yitallif tijaaritna bas laakin yijiib eeb fi beet al-ibaada hana Artaamiis kula wa hi ilaahatna al-aziime.
Akuun al-naas buguulu beetha ma yanfaʼ.
Wa akuun usum Artaamiis al-aziim yiwaddir.
Wa di bas al-ilaaha al-kulla naas Aasiya wa kulla naas al-dunya yaʼabuduuha.
28 Wa wakit simʼo al-kalaam da,
ziʼilo zaʼal chadiid.
Wa gammo awwo wa gaalo :
Artaamiis hana naas Afasus,
hi ilaaha aziime.
29 Wa bigi barjaal fi kulla l-hille.
Wa naas katiiriin bilheen lammo wa karabo rufgaan itneen hana Buulus usumhum Khaayus wa Aristaarkus.
Humman min Magiduuniya wa macho maʼaayah fi safarah.
Wa l-naas jaro beehum fi l-nagaʼa al-kabiire.
30 Wa Buulus dawwar yadkhul yihajji le l-naas al-lammo wa laakin al-talaamiiz daharooh.
31 Wa waahidiin kamaan min kubaaraat hana balad Aasiya rufgaan hana Buulus wa rassalo leyah kalaam.
Wa talabo minnah ma yadkhul fi l-nagaʼa.
32 Wa kalaam al-naas al-fi l-nagaʼa bigi mukhalbat.
Waahidiin minhum gaalo cheyy waahid wa naas aakhariin gaalo cheyy aakhar lahaddi katiiriin minhum ma fihmo fi chaan chunu humman lammo.
33 Al-Yahuud lazzo naadum waahid usmah Iskandar giddaam al-naas.
Wa naas waahidiin dawwaro hu yikallim le l-naas.
Hu sawwa ichaara be iidah achaan al-naas yaskutu wa dawwar yidaafiʼ le akhwaanah.
34 Laakin wakit al-naas al-laammiin irifo hu Yahuudi,
gammo awwo kulluhum be hiss waahid wa gaalo «
Artaamiis hana naas Afasus,
hi ilaaha aziime ».
Wa gaaʼidiin yiʼawwu be l-kalaam da wa ma sakato lahaddi muddit saaʼateen.
35 Wa fi l-akhiir,
kaatib hana majlis al-hille gidir sakkat al-naas wa kallam leehum.
Wa hu gaal :
Ya naas hana Afasus,
ma fi naadum al-yagdar yankur hillit Afasus hi bas haafde beet al-ibaada hana Artaamiis al-ilaaha al-aziime wa sanamha al-wagaʼ min al-sama.
36 Wa kan naadum waahid ma yagdar yankur al-kalaam da,
khalaas agoodu saakit bas.
Angarʼu ma tisawwu cheyy fasil misil ma induku agul.
37 Intu jibtu al-rujaal dool hini wa humman ma sirgo cheyy min beet al-ibaada wa ma ayyaro ilaahatna.
38 Wa kan Dimitri wa akhwaanah induhum chakwa,
indina bakaan hana al-chariiʼa wa indina hukkaam.
Khalli yigaddumu chakwithum le l-hukkaam.
39 Wa kan induku muchkila aakhara,
nihilluuha fi l-malamma al-rasmiiye.
40 Wa laakin al-yoom aniina gaaʼidiin nijiibu muchkila fi raasna.
Wakit al-Roomaaniyiin yasmaʼo be l-barjaal al-bigi al-yoom da,
akuun yahkumu foogna.
Yuguulu sawweena barjaal fi hillitna.
Ma indina sabab fi chaan al-muzaahara di tukuun.
41 Wa baʼad gaal al-kalaam da,
gaal le l-naas khalli yichittu.