Al-Masiih saʼalooh yaatu al-antaah izin
20
Wa yoom waahid Isa gaaʼid yiʼallim al-naas fi hooch Beet Allah wa yiballikh leehum al-bichaara.
Wa fi l-bakaan da,
kubaaraat rujaal al-diin wa l-ulama wa l-chuyuukh jo leyah.
2 Wa gaalo :
Guul leena min ween ligiit izin achaan tisawwi al-khidme di.
Walla yaatu al-antaak izin ?
3 Wa Isa radda leehum wa gaal :
Ana indi suʼaal nidoor nasʼalku.
Ooruuni,
4 Yahya khattas al-naas be izin Allah walla be izin al-naas ?
5 Wa achchaawaro wa gaalo ambeenaathum :
Kan gulna Yahya indah izin min Allah,
Isa yuguul leena «
Maala ma aamantu beyah ? »
6 Wa kan gulna Yahya indah izin min al-naas bas,
al-naas yazʼalo wa yarjumuuna.
Achaan fi fikirhum,
akiid Yahya nabi.
7 Wa achaan da,
raddo leyah wa gaalo :
Aniina ma naʼarfu yaatu al-antaah izin.
8 Wa Isa radda leehum wa gaal :
Khalaas,
ana kula ma niʼooriiku be izin yaatu nisawwi al-khidme di.
Masal al-harraatiin al-fasliin
9 Wa Isa gamma hajja le l-naas be masal wa gaal :
Naadum waahid maggan inab fi jineene.
Wa hu ajjar harraatiin achaan yakhdumu foogha.
Wa hu zaatah khatar wa macha fi balad aakhara.
Wa tawwal ma gabbal.
10 Wa fi wakit hana lammiin al-inab,
hu rassal abid waahid le l-harraatiin achaan yichiilu al-inab al-waajib leyah.
Laakin al-harraatiin daggooh wa gabbalooh le siidah iideenah yaabis.
11 Wa rassal leehum abid taani.
Wa hu kula daggooh wa ayyarooh wa gabbalooh yaabis.
12 Wa rassal leehum battaan abid taalit wa l-abid da jarahooh wa zagalooh barra min al-jineene.
13 Wa siid al-jineene gaal :
Nisawwi chunu ?
Khalaas,
nirassil wileedi al-nihibbah.
Akuun leyah hu da,
yikarrumuuh.
14 Wa l-harraatiin chaafo wileed siid al-jineene wa hajjo ambeenaathum wa gaalo :
Daahu al-yawris al-jineene.
Khalli naktuluuh achaan al-warasa tabga hintina.
15 Wa maragooh barra min al-jineene wa katalooh.
Wa Isa gaal :
Hassaʼ nasʼalku.
Siid al-jineene yisawwi fooghum chunu ?
16 Akiid,
hu yaji wa yikattilhum le l-harraatiin dool wa khalaas hu yanti al-jineene le naas aakhariin.
Wa wakit al-naas simʼo al-kalaam da gaalo :
Khalli Allah yadharah.
17 Wa Isa chaafaahum adiil wa gaal :
Wa kan da ma yabga,
chunu maʼana hana l-kalaam al-maktuub fi l-Kitaab ?
Buguul <Al-hajar al-bannaayiin al-beet awwal ma dawwarooh,
bigi al-hajar al-muhimm fi buna al-beet>.
18 Wa kulla naadum al-yagaʼ foog al-hajar da,
yinkasir marra waahid wa kan al-hajar da yagaʼ foog naadum,
yarhakah misil al-dagiig.
Al-suʼaal fi l-miiri
19 Wa fi l-yoom da zaatah,
al-ulama wa kubaaraat rujaal al-diin dawwaro yakurbuuh achaan fihmo kadar be l-masal da Isa hajja fooghum laakin humman khaayfiin min al-naas.
20 Wa achaan da,
gammo yukhuttu baalhum foogah.
Wa bado yirassulu leyah jawaasiis al-sawwo nufuushum misil naas adiiliin achaan yalgo fursa yarmuuh be kalaamah.
Wa dawwaro yiwadduuh fi mahkamat al-waali al-Roomaani.
21 Wa l-jawaasiis gaalo :
Sayyidna,
naʼarfu kalaamak wa taʼliimak sahiih.
Wa inta ma takhaaf min wijih al-naas.
Wa tiʼallim al-naas derib Allah al-sahiih.
22 Khalaas,
guul leena,
hasab al-Tawraat,
waajib leena nikaffu al-miiri le sultaan al-Roomaaniyiin walla ma waajib ?
23 Wa Isa irif najaadithum.
Wa gaal leehum :
24 Wassufuuni diinaar waahid.
Al-suura wa l-usum al-gaaʼidiin foogah hana yaatu ?
Wa raddo leyah wa gaalo :
Hana sultaan al-roomaaniyiin.
25 Wa Isa gaal leehum :
Khalaas,
hana l-sultaan,
antuuh le l-sultaan wa hana Allah,
antuuh le Allah.
26 Wa ma gidro yarmuuh be kalaamah giddaam al-naas.
Wa ajjabo marra waahid fi l-radd al-raddah leehum wa khalaas sakato.
Al-suʼaal fi l-giyaama
27 Wa naas waahidiin min al-Sadduukhiiya jo le Isa.
Wa l-Sadduukhiyiin ma muʼminiin be l-giyaama.
28 Wa wajjaho leyah suʼaal wa gaalo :
Ya l-sayyid,
nidooru nihajju leek be l-kalaam al-Muusa katabah leena fi l-Tawraat.
Hu gaal kan raajil waahid maat wa indah mara wa laakin ma indah iyaal,
akhu al-raajil da waajib yaakhud al-mara wa yalda minha zurriiye le akhuuh al-marhuum.
29 Zeen.
Awwal fi sabʼa akhwaan.
Wa l-kabiir minhum akhad mara wa baʼad wakit hu maat.
Wa ma wilid minha.
30 Wa l-taani akhadha wa nafs al-cheyy bigi leyah.
31 Wa l-taalit akhadha wa l-akhwaan al-sabʼa kulluhum akhadooha wa ma wildo minha iyaal wa maato.
32 Wa fi l-akhiir al-mara zaatha maatat.
33 Wa khalaas,
wakit al-maytiin yabʼaso,
hi tabga marit yaatu minhum ?
Achaan sabʼa rujaal akhadooha.
34 Wa Isa radda leehum wa gaal :
Sahiih,
fi l-zaman al-haadir,
al-rujaal yaakhudu awiin wa l-awiin yantuuhin le l-rujaal.
35 Laakin al-naas al-Allah yakhbalhum achaan yabʼaso wa yadkhulu fi l-zaman al-jaayi da,
humman battaan ma yaakhudu awiin wa l-awiin ma yaakhudan rujaal.
36 Humman yabgo misil al-malaaʼika wa ma mumkin yumuutu battaan.
Wa yabgo iyaal Allah achaan humman naas al-giyaama.
37 Wa fi l-cheyy al-bukhuss al-giyaama,
Muusa zaatah wassafaaku kadar al-maytiin yabʼaso.
Fakkuru fi kalaam Muusa al-bukhuss al-chadara al-hargaane* al-buguul Allah hu Rabb hana Ibraahiim wa Rabb Ishaakh wa Rabb Yaakhuub.
38 Wa hu Rabb al-naas al-gaaʼidiin wa ma Rabb al-naas al-ma fiihum achaan leyah hu kulla l-naas gaaʼidiin.
Suʼaal al-Masiih fi Ibn Dawuud
39 Wa ulama waahidiin gaalo :
Mabruuk,
sayyidna.
Kalaamak adiil.
40 Wa ma dawwaro battaan yasʼalooh cheyy.
41 Laakin Isa saʼalaahum le l-ulama wa gaal :
Kikkeef buguulu kadar al-Masiih yabga Ibn Dawuud ?
42 Nasʼalku achaan fi l-Zabuur,
Dawuud zaatah gaal <Allah kallam le siidi al-malik wa gaal :
Agood fi nussi al-zeenaay
43 lahaddi nukhutt udwaanak tihit rijileenak>.
44 Wa misil da,
Dawuud gaal al-Masiih hu siidah.
Wa be misil da,
kikkeef al-Masiih yabga wileedah ?
45 Wa kulla l-naas gaaʼidiin yasmaʼo kalaamah.
Wa Isa hajja le talaamiizah wa gaal :
46 Awʼu baalku min al-ulama.
Humman yiriidu yalbaso jalaaliib tuwaal wa yuruukhu fi ust al-naas wa yiriidu salaam al-naas fi l-suug wa saff al-awwal fi beet al-sala wa bakaan al-kubaaraat fi kulli aazuuma.
47 Wa laakin humman yaakulu buyuut al-awiin al-rujaalhin maytiin wa yugummu yisallu sala tawiile achaan al-naas yichiifuuhum.
Wa khalaas al-azaab al-yarjaahum yabga chadiid bilheen.