Riyaaleen al-mara al-miskiine
21
Wa Isa allaffat wa chaaf siyaad al-maal al-gaaʼidiin yusubbu gurus fi sanduug hana Beet Allah.
2 Wa chaaf ajuuz miskiine al-raajilha mayyit.
Wa hi khattat fi l-sanduug riyaaleen bas.
3 Wa Isa gaal :
Nuguul leeku al-hagg,
al-ajuuz al-miskiine di khattat fi l-sanduug ziyaada min kulla l-naas al-aakhariin dool.
4 Achaan kulluhum anto le Allah min fadlit maalhum laakin hi miskiine wa antat kulla cheyy al-tiʼiich beyah.
Alaamaat kumaalit al-dunya
5 Wa naas waahidiin gaaʼidiin yihajju be samaah hana Beet Allah wa hujaarah al-samhiin wa kulla cheyy al-naas antooh le l-buna.
Wa Isa gaal :
6 Kulla buyuut al-tichiifuuhum dool,
wakit waahid yaji ma yikhallu hajar yagood foog hajar.
Yarmuuhum kulluhum ke.
7 Wa saʼalooh wa gaalo :
Ya sayyidna,
da yabga mata ?
Wa chunu al-alaama al-tiwassifna kadar da gariib ?
8 Wa gaal leehum :
Khuttu baalku wa ma tikhallu naadum yukhuchchuku.
Achaan naas katiiriin baju be usmi al-buguulu be nafishum «
Ana bas al-Masiih »
wa «
Al-wakit tamma ».
Al-naas dool,
ma titaabuʼuuhum.
9 Wa wakit tasmaʼo khabar hana huruub wa sawraat,
ma takhaafo achaan cheyy misil da laabudda yabga awwal laakin al-kumaale ma taji ajala.
10 Wa gaal leehum :
Naas hana balad waahide yahjumu naas hana balad aakhara wa mamlaka tahjim mamlaka.
11 Wa fi diyaar katiiriin yukuun zilzaal wa fi aakhariin juuʼ chadiid wa waba.
Wa alaamaat kubaar yinchaafo fi l-sama al-yikhawwufu al-naas marra waahid.
12 Wa laakin gubbaal al-achya dool ma yabgo,
intu yakurbuuku wa yiʼazzubuuku.
Wa yisallumuuku le kubaaraat buyuut al-sala wa yazguluuku fi l-sijin.
Yusuuguuku le bakaan al-salaatiin wa l-hukkaam fi chaan intu naasi.
13 Wa da yabga leeku al-wakit al-tachhado leyi.
14 Achaan da,
sabbutu afkaarku achaan ma tihimmu fi kikkeef turuddu leehum.
15 Achaan ana nantiiku al-kalaam wa l-fikir al-waajib.
Wa l-naas al-yaʼazuuku ma yagdaro yahmalo kalaamku walla yuruddu leeku.
16 Wa l-yisallumuuku le l-kubaaraat humman min waaldeenku wa akhwaanku wa min gabiilitku wa rufgaanku.
Wa waahidiin minku yaktuluuhum.
17 Fi chaani ana,
kulla l-naas yakrahooku.
18 Laakin suufaay waahide min raasku ma tiwaddir.
19 Agoodu saabtiin fi l-taʼab da wa misil da tinajju nufuusku.
20 Wa yoom waahid askar katiiriin yaju yihawwugu Madiinat al-Khudus.
Wa wakit tichiifuuhum,
taʼarfu kadar kharaabha gariib.
21 Wa fi l-bakaan da,
khalli l-naas al-gaaʼidiin fi daar al-Yahuudiiya yajru fi l-hujaar.
Wa khalli l-naas al-fi l-madiina yamurgu minha wa khalli al-naas al-fi l-kadaade ma yadkhulu fi l-madiina.
22 Achaan fi l-wakit da,
Allah yiʼaakhib al-Yahuud wa kulla l-kalaam al-awwal al-nubuuwa katabooh fooghum yitimm.
23 Wa fi l-bakaan da,
yabga gaasi bilheen le l-awiin al-khalbaanaat wa l-indihin iyaal dugaag.
Wa l-diige tabga chadiide fi kulla l-balad di.
Wa khadab Allah yanzil fi l-chaʼab da.
24 Yumuutu be l-seef wa yusuughum masaajiin fi ust kulla l-umam.
Wa naas al-umam yamluku Madiinat al-Khudus wa yifajjukhuuha lahaddi zamanhum yikammil.
Jayyit al-Masiih al-taaniye
25 Wa l-naas yichiifu alaamaat fi l-harraay wa l-gamar wa l-nujuum.
Wa fi l-ard al-umam yibarjulu wa yakhaafo min hiss al-bahar wa harakatah.
26 Wa rujaal yagaʼo min al-khoof wa yakhaafo min al-cheyy al-jaayi foog al-dunya achaan khuwwaat al-samaawaat zaathum yinhazzo.
27 Wa fi l-wakit daak,
yichiifu Ibn al-Insaan jaayi raakib fi l-sahaab be gudra aziime wa majiide.
28 Wa wakit al-achya dool yabdo,
chiddu heelku wa arfaʼo ruuseenku foog achaan yoom al-naja garrab.
Alaamit chadarat al-tiin
29 Wa Isa hajja leehum be masal wa gaal :
Fakkuru fi chadar al-tiin* wa fi kulla l-chadar.
30 Wakit al-chadar yisawwi warag,
tichiifuuh wa taʼarfu al-wakit al-yalda foogah garrab khalaas.
31 Wa sawa sawa misil da,
aʼarfu kadar mamlakat Allah garrabat wakit tichiifu al-alaamaat al-ooreetku beehum dool.
32 Wa nuguul leeku al-hagg,
naas hana l-wakit da ma yikammulu lahaddi da kulla ke yitimm.
33 Al-sama wa l-ard yabgo ma fiihum wa laakin kalaami yagood daayman.
34 Wa khuttu baalku fi nufuusku.
Achaan kan tikhallu guluubku yinchakhulu be l-safaaha wa l-sakar wa kan tinchakhulu be humuum al-dunya,
yoom jayti yaji fajʼa
35 wa yabga leeku misil charak.
Akiid,
al-yoom da yaji foog kulla l-naas al-fi kulla l-ard.
36 Abgo daayman waaʼiyiin wa asʼalo gudra min Allah achaan tanjo min kulla l-achya al-yabgo dool.
Wa misil da,
fi l-akhiir tagiifu giddaam Ibn al-Insaan.