Al-Masiih wa Zakka
19
Wa Isa dakhal fi hillit Ariiha wa gaaʼid yuchuggaha.
2 Wa fi naadum waahid usmah Zakka.
Wa hu kabiir hana naas al-jamaarik wa hu khani bilheen.
3 Wa hu dawwar yichiif Isa laakin ma gidir achaan Isa gaaʼid fi usut naas katiiriin wa Zakka naadum gisayyir.
4 Wa achaan da,
hu jara giddaam fi l-derib al-Isa maachi foogah wa rikib foog fi jimmeezay achaan yichiif Isa kan hu yalhag al-bakaan da.
5 Wa Isa ja fi l-bakaan da wa rafaʼ raasah wa hajja le Zakka.
Wa gaal :
Ya Zakka,
yalla ajala dalli tihit.
Al-yoom laazim niddayyaf fi beetak.
6 Wa ajala ke hu dalla tihit wa faddalah le Isa fi beetah be farah.
7 Wa kulla l-naas al-chaafo al-cheyy al-bigi da,
bigo zaʼlaaniin wa hajjo ambeenaathum wa gaalo :
Haay !
Hu macha bigi deef hana naadum muznib.
8 Wa Zakka gamma foog wa gaal le l-Rabb Isa :
Ya Sayyidna,
nanti nuss maali le l-masaakiin.
Wa kan chilt cheyy min ayyi naadum be zulum,
nigabbilah leyah arbaʼa marraat.
9 Wa Isa radda wa gaal :
Khalaas,
al-yoom al-naja jaat fi l-beet da achaan Zakka kula min iyaal Ibraahiim.
10 Wa ana Ibn al-Insaan jiit achaan nifattich al-muwaddiriin wa ninajjiihum.
Masal al-malik wa khaddaamiinah
11 Wa l-naas gaaʼidiin yasmaʼo kalaam Isa.
Wa fi fikirhum,
mamlakat Allah tidoor tibiin ajala achaan hu gariib yalhag Madiinat al-Khudus.
Wa achaan da,
hu hajja leehum be masal.
12 Wa gaal :
Yoom min al-ayyaam,
fi naadum min iyaal al-muluuk.
Wa hu saafar fi bakaan baʼiid achaan hinaak yidarrujuuh malik wa yigabbil yahkim baladah.
13 Wa gubbaal ma yisaafir,
hu naada achara min abiidah wa anta le ayyi waahid dahabaay khiimitha miya diinaar.
Wa gaal leehum :
Taajuru beeha lahaddi nigabbil.
14 Wa chaʼab baladah kirhooh wa rassalo waraayah mumassiliin achaan yuguulu :
Ma nidooru al-naadum da yabga foogna malik.
15 Wa khalaas baʼadeen hu darrajooh malik wa gabbal fi baladah.
Wa ajala amaraahum le l-abiid al-antaahum al-gurus achaan yaju leyah.
Wa dawwar yaʼarif kam ribho leyah fi l-tijaara.
16 Wa l-awwal ja giddaamah wa gaal :
Ya malik,
min dahabaaytak ana kisibt battaan achara dahabaat.
17 Wa l-malik gaal leyah :
Da sameh.
Inta abid adiil.
Awwal ana anteetak masʼuuliiye chiyya wa inta sawweet beeha khidme adiile.
Wa achaan da,
nantiik masʼuuliiye foog achara hille.
18 Wa l-abid al-taani ja leyah wa gaal :
Ya malik,
min dahabaaytak kisibt khamsa dahabaat.
19 Wa l-malik gaal :
Nukhuttak foog khamsa hille.
20 Wa abid aakhar ja wa gaal :
Ya malik,
diihi dahabaaytak.
Ana hafadtah wa labbadtah fi mindiil.
21 Ana khuft minnak achaan inta naadum gawi.
Inta tichiil al-khumaam al-naadum aakhar khattah wa tagtaʼ al-khalla al-ma teerabtaha.
22 Wa l-malik gaal leyah :
Nihaasibak hasab al-kalaam al-inta gultah.
Inta abid fasil.
Irift kadar ana naadum gawi wa nichiil al-khumaam al-naadum aakhar khattah wa nagtaʼ al-khalla al-ma teerabtaha.
23 Wa kan ana misil da,
maala ma khatteet gursi fi l-banki ?
Wa misil da,
wakit nigabbil fi l-balad nichiilah be faayditah.
24 Wa gaal le l-naas al-maʼaayah :
Chiilu minnah al-dahabaay wa antuuha le l-abid al-indah achara.
25 Wa gaalo leyah :
Ya malik,
hu indah achara khalaas.
26 Wa l-malik gaal :
Nuguul leeku kulla naadum al-indah cheyy yalga ziyaada.
Laakin al-naadum al-ma indah cheyy,
al-cheyy al-indah yinrafiʼ minnah kula.
27 Wa khalaas,
ween udwaani dool al-ma dawwaro ana nabga fooghum malik ?
Jiibuuhum hini wa aktuluuhum fi giddaami.
28 Wa wakit Isa kammal al-kalaam da,
hu macha giddaam fi derib hana Madiinat al-Khudus.
Dakhuul al-Masiih fi Madiinat al-Khudus
29 Wa Isa garrab le l-hillaal al-asaameehum Beet Faaji wa Beet Anya wa ja fi l-bakaan al-usmah Jabal al-Zaytuun.
Wa Isa rassal giddaamah talaamiiz itneen.
30 Wa gaal leehum :
Amchu fi l-hille al-giddaamna di.
Wa fi khachum al-hille talgo dahach marbuut.
Wa naadum lissaaʼ ma rikib foogah.
Wa hilluuh wa jiibuuh leyi hini.
31 Wa kan naadum yasʼalku wa yuguul «
Maala tihillu al-dahach ?
»
guulu leyah « Al-Rabb yidoorah ».
32 Wa l-talaamiiz al-itneen al-rassaloohum macho wa ligo al-dahach misil hu ooraahum beyah.
33 Wa wakit gaaʼidiin yihilluuh,
siyaadah saʼaloohum wa gaalo :
Maala tihillu al-dahach ?
34 Wa raddo leehum wa gaalo :
Al-Rabb yidoorah.
35 Wa jaabooh le Isa.
Wa farracho khulgaanhum foog al-dahach wa rakkabo Isa foogah.
36 Wa khalaas hu gamma maachi giddaam raakib fi l-dahach wa l-naas gammo sawwo ziina le l-chaariʼ wa farracho khulgaanhum fi derbah.
37 Wa garrab le l-madiina be l-derib al-naazil min Jabal al-Zaytuun wa kulla talaamiizah bado yafraho wa yachkuru Allah be hiss aali fi chaan kulla l-ajaayib al-kubaar al-chaafoohum.
38 Wa gaalo :
Mabruuk le l-malik al-jaayi be usum Allah.
Salaam fi l-sama wa l-hamdulillah wa subhaanah fi l-bakaan al-aali.
39 Wa Fariisiyiin waahidiin fi ust al-naas hajjo leyah wa gaalo :
Ya l-sayyid,
sakkit talaamiizak.
40 Wa Isa radda leehum wa gaal :
Nuguul leeku kan al-naas dool sakato kula,
al-hujaar yiʼiitu be nafs al-kalaam.
Hizin al-Masiih fi chaan Madiinat al-Khudus
41 Wa Isa garrab le l-madiina wa chaafaaha wa baka fi chaanha.
42 Wa gaal :
Ana nitmanna kadar al-yoom inti taʼarfi al-cheyy al-yijiib leeki al-salaam laakin hassaʼ da,
ma fihimtih.
43 Wakit waahid yaji leeki wa askar aduuki yaju wa yankutu khanaadiighum wa yihawwuguuki wa yisiddu kulla duruubki.
44 Wa yidammuruuki maʼa naaski al-fi lubbiki.
Wa ma yikhallu hajar yagood foog hajar.
Wa da yabga achaan ma irifti al-wakit al-Allah ja yinajjiiki.
Al-Masiih tarad al-tujjaar min Beet Allah
45 Wa Isa dakhal fi hooch Beet Allah wa gamma yatrud minnah al-tujjaar al-yisaawugu foogah.
46 Wa gaal leehum :
Allah gaal fi l-Kitaab <Beeti yabga beet hana l-sala>
wa laakin intu <sawweetuuh beet hana saraariig>.