Masal al-ajuuz wa l-haakim
18
Wa Isa hajja leehum be masal achaan yiwassifhum waajib daayman yisallu wa ma yaksalo.
2 Wa gaal :
Fi hille waahide,
fiiha haakim waahid wa hu ma khaayif min Allah wa ma lammaah be rida al-naas.
3 Wa fi l-hille di,
fi ajuuz mazluuma wa raajilha mayyit.
Wa kulla ma yoom hi tamchi le l-haakim daayman wa tuguul :
Ansurni be l-hagg fi l-naadum al-zallamaani.
4 Wa awwal hu aba ma sawwa leeha cheyy laakin fi l-akhiir hu gaal le nafsah :
Sahiih,
ana ma khaayif min Allah wa ma lammaani be rida al-naas.
5 Laakin al-ajuuz di gaaʼide tibachtinni bilheen.
Wa khalli nansurha achaan hi ma tiʼayyiini marra waahid be jayyitha al-katiire.
6 Wa l-Rabb Isa gaal :
Al-haakim da naadum ma adiil laakin fakkuru fi kalaamah.
7 Wa fi fikirku,
Allah ma yansurhum le naasah al-ikhtaaraahum al-yasarkho leyah leel wa nahaar walla ?
Yiʼakhkhir leehum walla ?
8 Nuguul leeku hu yansurhum ajala.
Wa laakin wakit Ibn al-Insaan yigabbil fi l-ard,
hu yalga naas muʼminiin walla ?
Masal al-Fariisi wa naadum hana l-jamaarik
9 Wa Isa hajja be masal le naas waahidiin al-yisawwu nufuushum saalihiin wa yahguru al-aakhariin.
10 Wa gaal :
Yoom min al-ayyaam,
naaseen dakhalo fi Beet Allah achaan yisallu.
Al-waahid min al-Fariisiyiin wa l-aakhar min naas al-jamaarik.
11 Wa l-Fariisi wigif be tuulah wa salla wiheedah wa gaal :
Ya Allah,
nuguul leek chukran achaan ana ma bigiit misil al-naas al-aakhariin.
Humman saraariig wa fasliin wa zannaayiin.
Aywa,
ana ma misil naadum al-jamaarik daak.
12 Ana nusuum yoomeen fi l-usbuuʼ wa nantiik uchur hana kulla cheyy al-narbahah.
13 Laakin naadum al-jamaarik wigif wiheedah baʼiid min al-naas.
Ma rafaʼ raasah foog kula.
Wa gaaʼid yudugg sadrah min al-nadaama wa gaal :
Ya Allah,
arhamni.
Ana muznib.
14 Wa nuguul leeku min al-naaseen dool,
al-raajil al-taani bas gabbal fi beetah be alaakha adiile maʼa Allah.
Achaan ayyi naadum al-yisawwi nafsah kabiir,
Allah yisawwiih sakhayyar wa l-naadum al-yisawwi nafsah sakhayyar,
Allah yisawwiih kabiir.
Al-Masiih baarak al-iyaal
15 Wa l-naas gaaʼidiin yiwaddu iyaalhum al-sukhaar le Isa achaan hu yalmashum wa yibaarikhum.
Wa talaamiizah chaafoohum wa harajoohum.
16 Laakin Isa naada al-iyaal wa gaal le talaamiizah :
Khallu al-iyaal yaju leyi wa ma tadharoohum achaan mamlakat Allah hana l-naas al-misilhum.
17 Wa nuguul leeku al-hagg,
naadum abadan ma yadkhul fi mamlakat Allah kan ma yakhbalha misil wileed sakhayyar yakhbalha.
Al-cheekh al-khani
18 Wa naadum waahid min al-kubaaraat saʼal Isa wa gaal :
Ya l-muʼallim al-adiil,
waajib nisawwi chunu achaan nalga al-haya al-abadiiye ?
19 Wa Isa radda leyah wa gaal :
Maala tuguul ana adiil ?
Waahid bas adiil wa hu Allah.
20 Akiid,
taʼarif al-wasaaya.
Ma tazna wa ma taktul wa ma tasrig wa ma tachhad be kidib wa karrim ammak wa abuuk.
21 Wa l-raajil gaal :
Min wakit ana sakhayyar,
nitaabiʼ kulla l-wasaaya dool.
22 Wa wakit Isa simiʼ kalaamah da,
hu gaal :
Chokhol waahid lissaaʼ gassar leek.
Biiʼ kulla cheyy al-indak wa anti tamanah le l-masaakiin wa misil da talgaah giddaamak.
Wa taʼaal taabiʼni.
23 Wa wakit simiʼ kalaam Isa da,
hu bigi haznaan achaan hu khani bilheen.
24 Wa Isa chaaf wijhah wa gaal :
Al-dakhuul fi mamlakat Allah gaasi le l-naas al-induhum maal katiir.
25 Battaan nuguul leeku dakhuul al-jamal fi gadd hana ibre hayyin min dakhuul siid al-maal fi mamlakat Allah.
26 Wa l-naas al-simʼo al-kalaam da gaalo :
Kan yabga misil da,
yaatu al-yagdar yanja ?
27 Wa Isa radda leehum wa gaal :
Al-cheyy al-gaasi le l-naas ma gaasi le Allah.
28 Wa Butrus gaal :
Wa aniina ke khalleena buyuutna achaan nitaabuʼuuk.
29 Wa Isa gaal leehum :
Nuguul leeku al-hagg,
ayyi naadum al-khalla beetah walla martah walla akhwaanah walla waaldeenah walla iyaalah fi chaan mamlakat Allah,
30 yalga katiir minhum ziyaada fi l-zaman al-haadir wa fi l-aakhira yalga al-haya al-abadiiye.
Taalit marra al-Masiih hajja be mootah
31 Wa Isa tarraf al-talaamiiz al-atnaachar wa hajja leehum wiheedhum wa gaal :
Chiifu.
Aniina maachiin le Madiinat al-Khudus.
Wa hinaak kulla cheyy al-anbiya katabooh fi Ibn al-Insaan yitimm.
32 Yisallumuuh le l-kuffaar wa yichammutu leyah wa yiʼayyuruuh wa yibazzukhu foogah.
33 Wa yajluduuh wa yaktuluuh wa fi l-yoom al-taalit yabʼas.
34 Wa laakin talaamiizah ma fihmo cheyy min al-kalaam da.
Kalaamah da mulabbad minhum.
Ma irifo maʼana kalaamah.
Al-Masiih daawa naadum amyaan
35 Wa Isa fi safarah garrab le hillit Ariiha.
Wa amyaan waahid gaaʼid tihit jamb al-chaariʼ.
Hu gaaʼid yachhad al-naas.
36 Wa l-amyaan simiʼ hiss hana l-naas al-katiiriin al-maachiin fi l-derib wa saʼalaahum wa gaal :
Chunu al-haraka di ?
37 Wa gaalo leyah :
Isa al-min al-Naasira maachi fi l-derib da.
38 Wa hu bada yiʼiit wa yuguul :
Ya Isa !
Ya Ibn Dawuud,
arhamni.
39 Wa l-naas al-maachiin giddaam Isa harajooh wa gaalo leyah «
Askut ».
Laakin al-amyaan gamma yiʼiit be ziyaada wa yuguul :
Ya Ibn Dawuud,
arhamni !
40 Wa Isa wigif wa amaraahum le l-naas achaan yiwaddu leyah al-amyaan.
Wa wakit al-amyaan ja gariib,
Isa saʼalah wa gaal :
41 Tidoor ana nisawwi leek chunu ?
Wa l-amyaan gaal :
Sayyidna,
nidoor nichiif.
42 Wa Isa gaal :
Khalaas,
chiif.
Ligiit al-aafe be sabab iimaanak.
43 Wa ajala ke uyuunah anfataho wa gamma yitaabiʼ Isa wa gaaʼid yachkur Allah.
Wa kulla l-naas al-chaafooh chakaro Allah katiir.