Al-iimaan wa l-waajbaat
17
Wa Isa hajja le talaamiizah wa gaal :
Laabudda achya waahidiin yabgo wa be sababhum naas waahidiin yamurgu min al-derib.
Wa laakin al-azaab yarja al-naadum al-yisabbib al-achya dool.
2 Aywa,
kan naadum yitallif iimaan hana waahid min al-muʼminiin al-dugaag dool,
al-azaab al-yarjaah yabga chadiid lahaddi akheer leyah kan rabato murhaaka fi ragabtah wa zagalooh fi lubb al-bahar.
3 Achaan da,
khuttu baalku fi nufuusku.
Kan akhuuk khiti,
aharjah.
Wa kan hu nidim fi l-cheyy al-sawwaah,
saamihah.
4 Kan fi l-yoom al-waahid hu yakhta foogak sabʼa marraat wa yigabbil leek sabʼa marraat wa yuguul «
Ana tubt min al-khata da »,
waajib tisaamihah leyah.
5 Wa l-rusul hajjo le l-Rabb Isa wa gaalo :
Ziid leena al-iimaan.
6 Wa l-Rabb Isa gaal :
Kan iimaanku sakhayyar kula misil teeraab hana l-kireeb,
tagdaro taamuruuha le l-chadara al-kabiire di wa tuguulu «
Gummi min hini wa maggini nafiski fi l-bahar »
wa hi tasmaʼ kalaamku.
7 Ayyi naadum minku bisawwi chunu kan indah abid al-gaaʼid yahrit leyah walla yasrah ?
Wakit abdah bigabbil min al-kadaade,
siidah buguul «
Taʼaal aakul maʼaayi »
walla ?
8 La,
ma ke.
Buguul «
Arbut sulbak wa jahhiz leyi al-acha.
Wa akhdim leyi lahaddi ana akalt wa chiribt khalaas.
Wa baʼad da bas,
inta taakul wa tachrab ».
9 Hal hu bachkur abdah fi chaan hu sawwa al-khidme al-amarah beeha walla ?
La.
10 Wa nafs al-cheyy leeku intu.
Wakit sawweetu kulla cheyy al-Allah amaraaku beyah,
waajib tuguulu «
Aniina abiid bas wa ma sawweena ziyaada min al-khidme al-waajbe leena ».
Al-naas al-achara al-induhum baras
11 Wa wakit Isa musaafir le Madiinat al-Khudus,
hu taabaʼ al-huduud al-been daar al-Saamira wa daar al-Jaliil.
12 Wa dakhal fi hille waahide wa achara rujaal al-induhum baras gaabalooh.
Wa humman wigfo baʼiid minnah chiyya.
13 Wa sarakho leyah wa gaalo :
Ya Isa !
Ya sayyidna !
Arhamna.
14 Wa Isa chaafaahum wa gaal :
Amchu wassufu nufuusku le raajil al-diin*.
Wa macho.
Wa wakit humman fi l-derib,
ligo al-aafe wa bigo taahiriin.
15 Wa baʼad chiyya,
naadum waahid minhum irif hu ligi al-aafe wa chaglab wa gabbal le Isa.
Hu gamma yachkur Allah be hiss foog.
16 Wa sajad giddaam Isa wa chakarah.
Wa l-naadum al-gabbal da,
hu min al-Saamiriyiin.
17 Wa Isa gaal :
Al-naas al-ligo al-aafe ma achara walla ?
Ween al-tisʼa ?
18 Ma fi naadum aakhar al-yidoor yachkur Allah illa al-ajnabi da walla ?
19 Wa gaal le l-Saamiri :
Gumm foog wa amchi fi derbak.
Ligiit al-aafe be sabab iimaanak.
Jayyit mamlakat Allah
20 Wa yoom waahid,
al-Fariisiyiin saʼalo Isa fi jayyit mamlakat Allah.
Wa radda leehum wa gaal :
Mamlakat Allah ma taji be alaamaat al-tichiifuuhum.
21 Wa l-naas ma buguulu «
Chiifu,
hi gammat hini »
wa la «
hi hinaak ».
Nuguul leeku mamlakat Allah gaaʼide ambeenaatku khalaas.
22 Wa Isa hajja le talaamiizah wa gaal :
Wa yaji wakit waahid tabgo garmaaniin bilheen le Ibn al-Insaan wa tidooru tichiifuuni.
Wa laakin ma tichiifuuni.
23 Wa buguulu leeku «
Chiifu hu hinaak »
walla «
Chiifu hu hini ».
Ma tamchu maʼaahum.
Ma titaabuʼuuhum.
24 Akiid al-barraaga tabrug fi l-sama min al-nuss al-waahid wa tinchaaf lahaddi l-nuss al-aakhar wa jayyit Ibn al-Insaan tabga misil da kula wakit yigabbil.
25 Laakin awwal mukhaddar le Ibn al-Insaan yatʼab taʼab chadiid wa l-naas al-fi wakitna da yaabooh.
26 Wa haalat al-naas fi yoom jayyit Ibn al-Insaan tabga sawa misil haalat al-naas fi zaman Nuuh.
27 Humman gaaʼidiin yaakulu wa yacharbo wa l-rujaal yaakhudu awiin wa l-awiin yaakhudan rujaal lahaddi l-yoom al-Nuuh dakhal fi l-safiina.
Wa khalaas al-almi ja wa akalaahum kulluhum.
28 Wa bigi misil da fi zaman Luut kula.
Al-naas gaaʼidiin yaakulu wa yacharbo wa yibiiʼu wa yachru wa yimaggunu chadar wa yabnu buyuut.
29 Laakin yoom al-Luut marag min hillit Saduum,
Allah sabba fooghum naar wa kibriit wa dammaraahum marra waahid.
30 Wa yabga misil da wakit Allah yibayyin Ibn al-Insaan.
31 Fi l-yoom da,
ayyi naadum al-gaaʼid yinjamma fi raas beetah wa khumaamah daakhal fi l-beet,
khalli ma yidalli yichiilah.
Wa battaan ayyi naadum al-yakhdim fi l-zereʼ,
khalli ma yigabbil fi beetah.
32 Fakkuru fi marit Luut*.
33 Ayyi naadum al-yidoor yinajji nafsah,
yiwaddir.
Laakin al-naadum al-ma yifakkir fi nafsah,
yanja.
34 Nuguul leeku kadar fi l-leele diik,
fi naaseen fi sariir waahid wa l-waahid yinrafiʼ wa l-aakhar ma yinrafiʼ.
35 Wa fi awiin itneen gaaʼidaat sawa yarhakan khalla wa l-waahide tinrafiʼ wa l-aakhara ma tinrafiʼ.
36 Wa fi rujaal itneen gaaʼidiin yakhdumu fi nafs al-zereʼ wa l-waahid yinrafiʼ wa l-aakhar ma yinrafiʼ.
37 Wa talaamiizah saʼalooh wa gaalooh :
Ya sayyidna,
da yabga ween ?
Wa radda leehum wa gaal :
Al-rimme tinaadi al-suguura.