Al-kalaam al-bukhuss al-nifaakh
12
Wa adad al-naas al-jaayiin le Isa zaad bilheen wa bigo acharaat al-aalaaf lahaddi gaaʼidiin yilʼaasaro.
Wa Isa hajja le talaamiizah awwal wa gaal :
Awʼu baalku min al-Fariisiyiin achaan ma tabgo misilhum.
Al-nifaakh gaaʼid fooghum misil al-tawwaara gaaʼide fi l-khubza.
2 Wa ma fi cheyy mulabbad al-baʼadeen ma bibiin wa ma fi achiir al-ma binʼarif.
3 Achaan da,
ayyi kalaam al-gultuuh fi l-leel,
yinsamiʼ fi l-nahaar.
Wa l-kalaam al-hajjeetuuh be achiir daakhal fi l-beet,
yiballukhuuh barra fi l-chawaariʼ.
4 Ya rufgaani,
niʼooriiku ma takhaafo min al-naas.
Yagdaro yaktuluuku wa laakin ma yagdaro yisawwu leeku ziyaada min da.
5 Niʼooriiku yaatu al-waajib takhaafo minnah.
Akhaafo min Allah.
Hu yagdar yaktulku wa battaan indah gudra achaan yarmiiku fi Jahannam.
Aywa,
hu bas al-waajib takhaafo minnah.
6 Taʼarfu kadar bibiiʼu khamsa tuyuur dugaag be riyaaleen.
Wa laakin nuguul leeku kadar Allah ma yansa ayyi waahid minhum.
7 Wa intu kula,
Allah gaaʼid yifakkir fiiku wa yaʼarif adad al-suuf al-fi raasku.
Ayyi waahid minku akheer le Allah ziyaada min tuyuur katiiriin.
Wa khalaas,
ma takhaafo min al-naas.
8 Wa ana,
Ibn al-Insaan,
nuguul leeku kadar ayyi naadum al-bachhad leyi giddaam al-naas,
ana nachhad leyah giddaam malaaʼikat Allah.
9 Wa ayyi naadum al-yankurni giddaam al-naas,
ana kula nankurah giddaam malaaʼikat Allah.
10 Wa ayyi naadum al-buguul kalaam didd Ibn al-Insaan,
Allah yisaamihah wa laakin Allah ma yisaamih al-naadum al-yihajji didd al-Ruuh al-Khudduus.
11 Wa wakit yakurbuuku wa yiwadduuku giddaam masaaʼiil buyuut al-sala wa giddaam al-kubaaraat wa l-hukkaam,
ma tihimmu le l-kalaam al-tuguuluuh wa la kikkeef turuddu leehum.
12 Achaan fi l-wakit da,
al-Ruuh al-Khudduus yiʼallimku al-kalaam al-waajib tuguuluuh.
Masal al-khani al-jaahil
13 Wa naadum waahid fi ust al-naas al-maachiin wara Isa naadaah wa gaal :
Sayyidna,
ajburah le akhuui achaan yigassim maʼaayi warasitna.
14 Wa Isa radda leyah wa gaal :
Ya raajil !
Fi fikrak Allah jaʼalaani foogku achaan nagtaʼ leeku al-chariiʼa wa nifarrigku walla ?
15 Wa Isa hajja le l-naas wa gaal :
Angarʼu wa awʼu baalku min ayyi cheyy hana tamaʼ.
Achaan khiimat al-naadum ma tiziid maʼa maalah kan maalah yabga katiir kula.
16 Wa hajja leehum be masal wa gaal :
Yoom min al-ayyaam,
fi naadum khani wa ziraaʼtah wildat leyah khalla katiire bilheen.
17 Wa saʼal nafsah wa gaal :
Ha.
Nisawwi chunu ?
Ma faddal leyi bakaan nakhzin foogah khalliti.
18 Wa gaal :
Khalaas.
Naʼarif al-cheyy al-nisawwiih.
Nikassir dabangaati wa nisawwi fi badalhum dabangaat kubaar minhum.
Wa fooghum nusubb kula khalliti wa kulla khumaami.
19 Wa nihajji le nafsi wa nuguul :
Ya nafsi !
Indiki maal katiir madmuum al-yitawwil siniin.
Ninjamm bas wa naakul wa nachrab wa nafrah.
20 Wa laakin Allah naadaah wa gaal :
Ya jaahil.
Fi l-leele di bas,
nichiil ruuhak.
Wa l-khumaam al-jahhaztah le nafsak da,
yabga hana yaatu ?
21 Wa Isa gaal :
Wa yabga misil da le ayyi naadum al-yudumm maal le nafsah wa ma damma maal fi makhazan Allah.
Al-kalaam al-bukhuss al-hamm
22 Wa Isa hajja le talaamiizah wa gaal :
Fi chaan da,
nuguul leeku ma tihimmu le hayaatku fi chaan al-akil wa la le jilidku fi chaan al-khulgaan.
23 Achaan al-haya akheer min al-akil wa l-jilid akheer min al-khulgaan.
24 Fakkuru fi l-khuraab.
Hu ma yiteerib wa la yagtaʼ khalla wa ma indah dabanga wa la makhazan wa laakin Allah yiʼayyichah.
Wa akiid intu akheer le Allah ziyaada min al-tuyuur.
25 Wa kan naadum minku yihimm katiir bilheen,
al-hamm da ma yagdar yiziid umrah wa la be saaʼa waahide kula.
26 Wa kan al-hamm ma yagdar yisawwi cheyy sakhayyar misil da,
maala tihimmu le cheyy aakhar ?
27 Chiifu al-nuwaar.
Wa fakkuru kikkeef yugumm.
Ma yakhdim wa ma yisawwi kiswe.
Wa laakin nuguul leeku akiid al-malik Suleymaan zaatah fi darajatah al-kabiire abadan ma libis khalag jamiil misil jamaal al-nuwaar da.
28 Wa kan Allah yilabbis al-gechch be l-nuwaar al-misil da wa l-gechch da gaaʼid al-yoom wa ambaakir yazguluuh fi naar al-furun,
akiid be ziyaada hu yilabbisku intu.
Chiddu heelku intu al-iimaanku lissaaʼ daʼiif.
29 Wa be misil da,
ma tasʼalo nufuusku fi l-cheyy al-taakuluuh wa tacharbooh wa ma tihimmu leyah.
30 Kulla naas al-dunya khaattiin baalhum fi l-achya dool wa abuuku Allah yaʼarif kadar intu tidooruuhum.
31 Wa khalaas,
khuttu baalku fi mamlakat Allah bas wa Allah yantiiku al-achya dool.
32 Ya khineemaati,
ma takhaafo.
Abuuku Allah indah niiye yantiiku al-mamlaka.
33 Biiʼu khumaamku achaan tantu sadakha le l-masaakiin.
Sawwu le nufuusku al-juzlaan al-abadan ma yatlaf.
Dummu maalku fi bakaan Allah fi l-samaawaat.
Al-maal da ma yafchul.
Wa l-saraariig ma yigarrubu leyah wa l-duud ma yaakulah.
34 Achaan al-bakaan al-maalak gaaʼid foogah,
da bas al-bakaan al-galbak gaaʼid foogah.
Amsaal al-abiid al-jaahiziin
35 Agoodu jaahiziin le l-khidme salabaaku marbuutiin wa fawaaniis muwallaʼiin.
36 Abgo misil abiid fi beet siidhum al-gaaʼidiin yarjooh.
Siidhum yigabbil min aazuumat al-iris.
Wa humman yagoodu jaahiziin achaan yufukku leyah al-derib ajala ke wakit hu yaji yudugg al-baab.
37 Mabruuk le l-abiid al-siidhum yalgaahum waaʼiyiin wakit hu yaji.
Be l-sahiih,
nuguul leeku siidah zaatah yarbut sulbah wa yigaʼʼidhum giddaam al-sufra wa yifaddilhum le l-akil.
38 Mabruuk le l-abiid dool kan siidhum yaji fi lubb al-leel walla be waradde wa yalgaahum jaahiziin.
39 Wa be masal aakhar,
aʼarfu kadar kan awwal siid al-beet irif fi l-saaʼa kam fi l-leel al-sarraag baji,
hu ma yikhalli al-sarraag yadkhul fi beetah.
40 Wa khalaas intu kula agoodu jaahiziin achaan ana Ibn al-Insaan nigabbil fi yoom waahid al-ma tarjooni foogah.
41 Wa Butrus saʼalah wa gaal :
Ya sayyidna,
gult al-masal da leena aniina bas walla le kulla l-naas ?
42 Wa l-Rabb Isa gaal :
Yaatu minku al-yabga misil al-wakiil al-amiin wa l-faahim ?
Siidah yikallifah fi kulla abiidah achaan yantiihum al-akil fi l-wakit al-waajib.
43 Mabruuk le l-abid da kan siidah yaji min al-safar wa yalgaah yakhdim khidimtah.
44 Be l-sahiih,
nuguul leeku hu yidarrij al-abid da masʼuul fi kulla cheyy al-indah.
45 Wa laakin kan al-abid da buguul fi galbah «
Ha,
siidi yitawwil wa ma yaji ajala ».
Wa achaan da hu yugumm yudugg al-abiid wa l-khadiim wa yabda yaakul wa yachrab wa yaskar,
46 akiid siid al-abid da yaji fi yoom waahid al-abid ma jaahiz yilaagiih wa fi saaʼa hu ma yaʼarifha.
Wa siidah yiʼaakhibah wa yukhuttah maʼa l-aasiyiin.
47 Wa l-abid al-irif muraadat siidah wa ma jaahiz le jaytah wa ma sawwa al-cheyy al-siidah bidoorah,
al-abid da yafurchuuh farich chadiid.
48 Wa l-abid al-waajib leyah al-farich be sabab al-cheyy al-sawwaah wa laakin ma irif muraadat siidah,
al-abid da yafurchuuh chiyya bas.
Wa ayyi naadum al-ligi katiir,
yatlubu minnah katiir.
Wa ayyi naadum al-kallafooh be cheyy ziyaada,
yatlubu minnah ziyaada.
Al-furga fi wa l-salaam ma fiih
49 Ana jiit achaan nusubb naar fi l-ard wa nitmanna bilheen kadar al-naar di oogadooha khalaas.
50 Wa fi khattisiin chadiid al-waajib yikhattusuuni beyah wa galbi muʼallag bilheen lahaddi al-khattisiin da yitimm.
51 Wa fi fikirku ana jiit achaan nijiib al-salaam fi l-ard walla ?
La,
ma ke.
Nuguul leeku ana jibt al-furga.
52 Achaan min al-yoom wa giddaam,
al-beet al-indah khamsa naas,
al-talaata yikhaalufu al-itneen wa l-itneen yikhaalufu al-talaata.
53 Yilkhaalafo ambeenaathum.
Al-raajil yikhaalif wileedah wa l-wileed yikhaalif abuuh wa l-mara tikhaalif bineeytha wa l-bineeye tikhaalif ammaha.
Wa amm al-raajil tikhaalif marit wileedha wa l-mara tikhaalif amm raajilha.
Alaamaat al-zaman
54 Wa Isa hajja battaan le l-naas al-katiiriin al-jo leyah wa gaal :
Kan tichiifu al-sahaab jaayi min al-kharib*,
ajala ke tuguulu almi yusubb wa khalaas almi yusubb.
55 Wa kan tichiifu al-riih tusuug min al-wati,
tuguulu al-wata tabga haamiye bilheen wa khalaas al-wata tabga haamiye.
56 Ya munaafikhiin !
Taʼarfu kikkeef tafhamo alaamaat hana l-ard wa l-sama wa kikkeef ma tagdaro tafhamo alaamaat al-zaman al-haadir ?
57 Maala ma tagdaro timayyuzu al-cheyy al-waajib tisawwuuh ?
58 Kan intu maachiin fi bakaan al-gaadi,
jaahid achaan tissaamaho maʼa l-mazluum wakit intu lissaaʼ fi l-derib.
Ma tidoor hu yusuugak le l-gaadi wa l-gaadi yisallimak le l-askar wa l-askar yidissuuk fi l-sijin.
59 Nuguul leek inta ma tamrug illa kan kaffeet kulla l-gurus al-yidooruuh minnak.