Al-sala al-rabbaaniiye
11
Wa Isa gaaʼid yisalli fi bakaan waahid.
Wa wakit hu kammal salaatah,
naadum min talaamiizah hajja leyah wa gaal :
Sayyidna,
allimna nisallu misil Yahya allam talaamiizah yisallu.
2 Wa Isa gaal leehum :
Wakit tisallu,
guulu «
Ya Abuuna,
majjid usmak al-khudduus.
Khalli mamlakatak taji.
3 Antiina kulla ma yoom al-akil al-yitimmina.
4 Saamih leena zunuubna misil aniina saamahna kulla l-naas al-khito foogna.
Ma tiwaddiina fi l-bakaan al-yijarrib iimaanna ».
Masal al-deef al-ja fi l-leel
5 Wa Isa hajja leehum be masal wa gaal :
Nasʼalku cheyy waahid.
Kan naadum minku indah rafiig wa hu yamchi leyah fi lubb al-leel wa yinaadiih wa yuguul «
Ya akhuui,
antiini talaata khubza.
6 Nidoorah achaan rafiig waahid musaafir jaani wa ma indi cheyy nidayyifah beyah ».
7 Hal akhuuk al-saʼaltah da yurudd leek min daakhal wa yuguul «
Khalliini nunuum.
Al-baab masduud wa iyaali maʼaayi naaymiin.
Ma nagdar nugumm leek wa la nantiik cheyy ».
Da yabga walla ?
8 Wa nuguul leeku kan akhuuk da ma yidoor yugumm yantiik cheyy fi chaan inta rafiigah kula,
akiid hu yugumm yantiik kulla cheyy al-tidoorah fi chaan al-eeb ma yaji foogah.
9 Wa nuguul leeku asʼalo min Allah wa hu yantiiku.
Fattuchu wa talgo.
Duggu baab hana Allah wa yinfatih leeku.
10 Achaan kulla naadum al-basʼal da,
Allah bantiih leyah.
Wa ayyi naadum al-bifattich,
balga.
Wa ayyi naadum al-budugg baab Allah,
al-baab binfatih leyah.
11 Wa kan naadum minku abu iyaal wa wileedah yatlub minnah huutaay,
yantiih daabi fi badal al-huutaay walla ?
12 Walla kan yatlub minnah beed jidaad,
yantiih agrab walla ?
Abadan.
13 Sahiih,
intu muznibiin wa laakin taʼarfu kikkeef tantu chokhol sameh le iyaalku.
Wa akiid abuuku Allah akheer ziyaada minku.
Wa hu yanti al-Ruuh al-Khudduus le l-naas al-yasʼalooh.
Gaalo gudrat al-Masiih min Ibliis
14 Wa yoom waahid,
Isa yidoor yatrud cheetaan min naadum waahid al-bigi abkam be sabab al-cheetaan da.
Wa l-cheetaan marag wa l-abkam hajja.
Wa kulla l-naas ajjabo bilheen.
15 Laakin naas waahidiin gaalo :
Al-naadum da yatrud al-chawaatiin be gudrat Ibliis kabiir al-chawaatiin.
16 Wa naas aakhariin dawwaro yijarrubuuh wa talabo minnah hu yiwassif leehum alaama min Allah tabga leehum daliil.
17 Wa hu irif fikirhum wa gaal leehum :
Ayyi mamlaka takhrab kan naasha bidaawusu ambeenaathum.
Wa kan naas hana ayyi beet bilfaarago,
al-beet da yagaʼ.
18 Wa tuguulu ana gaaʼid natrud al-chawaatiin be gudrat Ibliis wa laakin kan Ibliis bidaawis nafsah,
kikkeef mamlakatah tagdar tagood saabte ?
19 Wa kan sahiih ana gaaʼid natrud al-chawaatiin be gudrat Ibliis,
naasku yaturduuhum be gudrat yaatu ?
Khalaas fi yoom al-Hisaab,
naasku bas yisabbutu foogku al-tuhma.
20 Wa kan ana taradt al-chawaatiin be gudrat Allah zaatah,
khalaas mamlakat Allah gaabalatku.
21 Kan naadum gawi gaaʼid yahris gasrah be silaahah kulla ke,
misil da kulla khumaamah gaaʼid be l-salaam.
22 Laakin kan naadum gawi minnah yaji yahjimah,
yakhlibah wa yichiil minnah silaahah al-awwal kulla achamah gaaʼid foogah.
Wa khalaas yigassim al-khumaam le jamaaʼtah.
23 Ayyi naadum al-ma maʼaayi,
aduui.
Wa ayyi naadum al-ma yilimm al-naas maʼaayi,
yichattithum.
Al-cheetaan al-yigabbil
24 Wa wakit al-cheetaan yamrug min naadum muchootin,
al-cheetaan yamchi misil naadum muwaddir fi l-sahara.
Wa yifattich bakaan yinjamma foogah.
Wa ma yalgaah.
Wa yuguul «
Khalaas,
nigabbil fi l-beet al-maragt minnah ».
25 Wa yigabbil le l-naadum wa yalgaah misil beet nadiif wa mufarrach.
26 Wa l-cheetaan yamchi yijiib maʼaayah sabʼa chawaatiin fasliin minnah ziyaada wa kulluhum yindasso wa yaskunu fi l-naadum da wa khalaas,
haalit al-naadum da tabga hawaane min al-awwal.
27 Wa wakit hu gaaʼid yihajji le l-naas,
mara waahide fi usuthum naadat wa gaalat :
Mabruuk le l-mara al-wildatak wa rabbatak.
28 Laakin Isa gaal :
Akheer tuguuli mabruuk le l-naas al-yasmaʼo kalaam Allah wa yitaabuʼuuh.
Talabo minnah alaama
29 Wa adad al-naas al-yidooru yasmaʼo kalaam Isa gaaʼid yiziid.
Wa hu bada yuguul :
Al-naas al-fi wakitna da,
fasliin wa yatlubu minni alaama achaan yiʼaamunu beyi.
Wa Allah ma yantiihum alaama illa alaamat al-nabi Yuunus.
30 Misil Yuunus bigi alaama le naas madiinat Niinawa,
ana Ibn al-Insaan kula nabga alaama le l-naas al-fi wakitna da.
31 Wa fi yoom al-Hisaab,
Malikat al-Wati* tugumm sawa maʼa l-naas al-fi wakitna da.
Wa hi tisabbit fooghum al-tuhma achaan hi jaat min bakaan baʼiid marra waahid achaan tasmaʼ kalaam Suleymaan al-Hakiim wa tichiif ilmah.
Wa l-yihajji leeku hassaʼ akbar min Suleymaan wa intu ma tubtu.
32 Fi yoom al-Hisaab,
naas Niinawa yugummu sawa maʼa l-naas al-fi wakitna da wa yisabbutu fooghum tuhma achaan naas Niinawa taabo min zunuubhum wakit Yuunus ballakh leehum kalaam Allah.
Wa l-yihajji leeku hassaʼ akbar min Yuunus wa laakin intu ma tubtu.
Masal nuur al-faanuus
33 Wa ma fi naadum al-yiwalliʼ faanuus wa yikhalliih fi makhazan wa la yikhattiih be maaʼuun.
Hu yukhuttah fi bakaan foog achaan al-naas al-yadkhulu fi l-beet yichiifu al-deyy.
34 Wa l-een hi faanuus hana jildak.
Kan eenak taybe,
kulla jildak yinmali nuur.
Wa laakin kan eenak talfaane,
jildak yinmali dalaam.
35 Achaan da,
khutt baalak.
Ma tikhalli al-nuur al-indak yabga adlam.
36 Kan kulla jildak anmala nuur wa ma indah dalaam fi ayyi bakaan,
yabga leek misil faanuus yidawwi deyy tamaam.
Al-Masiih haraj al-Fariisiyiin wa l-ulama
37 Wa wakit Isa kammal al-kalaam da,
Fariisi waahid azamah achaan yaakul fi beetah.
Wa Isa macha fi beetah wa gaʼad le l-akil.
38 Wa Isa ma alwadda misil al-Fariisiyiin gubbaal ma yaakul wa l-Fariisi chaafah wa ajjab minnah bilheen.
39 Wa l-Rabb Isa gaal leyah :
Intu al-Fariisiyiin wakit tilwaddo,
da yabga misil tikhassulu al-kaas wa l-sahan min barra bas.
Laakin fi guluubku daakhal intu malaaniin min al-sirge wa l-fasaala.
40 Ya juhaal,
intu ma taʼarfu kadar Allah al-khalag al-nuss al-barraani khalag al-nuss al-dakhlaani kula ?
41 Antu al-khumaam al-gaaʼid daakhal fi sahanku wa khalli yabga sadakha le l-masaakiin wa kulla cheyy yabga leeku taahir.
42 Ya l-Fariisiyiin,
al-azaab yarjaaku achaan intu munkaribiin fi l-uchur* lahaddi tantu le Allah min al-naʼnaaʼ wa l-kamuun wa ayyi nabaat hana l-haraar al-yugumm fi hoochku wa laakin intu nisiitu al-waajbaat al-kubaar misil al-adaala wa mahabbat Allah.
Awwal cheyy,
waajib tisawwu al-achya al-kubaar dool wa battaan ma tanso kalaam al-uchur.
43 Ya l-Fariisiyiin,
al-azaab yarjaaku achaan tiriidu bilheen al-saff al-awwal fi buyuut al-sala wa intu farhaaniin kan al-naas yisallumuuku be ihtiraam fi l-suug.
44 Al-azaab yarjaaku achaan intu misil al-khubuur al-ma induhum wasim wa l-naas raaykhiin fooghum wa ma baʼarfu kadar humman khubuur.
Al-najaasa al-gaaʼide fiiku daakhal al-naas ma baʼarfuuha.
45 Wa naadum min ulama al-Tawraat radda leyah wa gaal :
Ya l-sayyid,
be kalaamak da ayyartina aniina kula.
46 Wa Isa gaal :
Al-azaab yarjaaku intu al-ulama kula.
Be taʼliimku tisawwu al-diin tagiil le l-naas lahaddi bufuut raashum wa abadan ma tidooru tiʼaawunuuhum hatta be cheyy sakhayyar kula.
47 Al-azaab yarjaaku achaan intu gaaʼidiin tabnu khubuur al-anbiya al-juduudku aboohum wa kataloohum.
48 Wa misil da,
intu gaaʼidiin tachhado kadar tikhassudu be l-cheyy al-juduudku sawwooh.
Aywa,
achaan humman bas al-kataloohum wa intu bas al-tabnu khubuurhum.
49 Achaan da,
Allah al-baʼarif kulla cheyy gaal :
Nirassil leehum anbiya wa rusul wa waahidiin minhum al-naas yaktuluuhum wa aakhariin yitaʼʼubuuhum.
50 Wa khalaas kulla l-anbiya al-kataloohum fi ayyi zaman dimmithum taji fi raas hana l-naas al-fi wakitna da.
51 Aywa,
nuguul leeku min dimmit Haabiil wileed Adam lahaddi dimmit Zakariiya al-katalooh been Beet Allah wa l-bakaan al-yigaddumu foogah dahiiye,
dimmithum kulluhum taji fi raas al-naas al-fi wakitna da.
52 Al-azaab yarjaaku intu al-ulama achaan chiltu muftaah al-ilim.
Intu zaatku ma andasseetu wa battaan al-naas al-bidooru bindasso intu dahartuuhum minnah.