Al-mubachchiriin al-itneen wa sabʼiin
10
Wa baʼadeen al-Rabb Isa ikhtaar min talaamiizah itneen wa sabʼiin naadum wa rassalaahum itneen itneen giddaamah fi ayyi bakaan al-hu yidoor yamchi foogah.
2 Wa gaal leehum :
Al-naas misil zereʼ kabiir wa khallitah nijdat khalaas wa laakin al-yakhdumu foogah chiyya.
Achaan da,
asʼalo siid al-zereʼ achaan yirassil khaddaamiinah yilimmu khallitah.
3 Wa khalaas amchu.
Nirassilku fi usuthum wa tabgo misil sukhlaan fi ust al-maraafiʼiin.
4 Wa fi l-derib,
ma tichiilu juzlaan wa la mukhlay wa la naʼaal.
Ma tagiifu le tisallumu ayyi naadum fi l-derib.
5 Wa gubbaal ma tadkhulu fi ayyi beet,
guulu «
Khalli al-salaam yaji fi l-beet da ».
6 Wa kan naadum al-yiriid al-salaam gaaʼid foogah,
salaamku yagood foogah.
Laakin kan ma fi naadum al-yiriid al-salaam,
khallu salaamku yigabbil leeku.
7 Wa agoodu fi beet waahid wa ma tamchu fi beet aakhar.
Aakulu wa acharbo al-cheyy al-yidayyufuuku beyah achaan ujrat al-naadum al-bakhdim waajbe leyah.
Ma tihawwulu min beet le beet fi hille waahide.
8 Wa kan tadkhulu fi ayyi hille wa naasha yakhbalooku,
aakulu al-akil al-yidayyufuuku beyah
9 wa daawu al-mardaaniin al-gaaʼidiin foogha.
Wa guulu leehum «
Mamlakat Allah garrabat leeku ».
10 Wa laakin kan tadkhulu fi hille wa naasha ma yakhbalooku,
amchu fi chawaariʼha wa guulu
11 « Ajaaj hillitku al-mulassag fi rijileenna kula,
nihittuuh minnina wa da chahaaditna foogku.
Laakin aʼarfu mamlakat Allah garrabat leeku ».
12 Nuguul leeku al-azaab al-yaji foog naas al-hille di fi yoom al-Hisaab yabga ziyaada min al-azaab al-yaji foog naas hillit Saduum*.
Al-hillaal al-ma taabo
13 Al-azaab yarjaaki,
ya hillit Kuuraziin.
Al-azaab yarjaaki,
ya hillit Beet Seeda.
Kan awwal naadum sawwa al-ajaayib dool fi mudun Suur wa Seeda*,
naashum yutuubu min zunuubhum min zamaan wa yalbaso chawaawiil wa yagoodu fi rumaad achaan yistakhfaro.
14 Aywa,
al-azaab al-yaji foog naasku fi yoom al-Hisaab yabga ziyaada min al-azaab al-yaji foog naas Suur wa Seeda.
15 Wa inti hillit Kafar Naahuum,
fi fikirki tarfaʼi raaski lahaddi l-sama walla ?
Be l-aks,
tinrami fi Jahannam.
16 Wa Isa gaal le l-mubachchiriin :
Ayyi naadum al-simiʼ kalaamku,
simiʼ kalaami.
Wa l-abaaku,
abaani.
Wa l-abaani,
aba Allah al-rassalaani.
Farah al-mubachchiriin
17 Wa l-mubachchiriin al-itneen wa sabʼiin al-Isa rassalaahum gabbalo leyah farhaaniin bilheen.
Wa gaalo :
Ya sayyidna !
Al-chawaatiin zaathum yasmaʼo kalaamna kan amarnaahum be usmak inta.
18 Wa Isa gaal leehum :
Aywa,
wakit intu gaaʼidiin be l-khidme di,
ana chift al-Cheetaan yagaʼ ajala misil soot yagaʼ min al-sama.
19 Ana anteetku gudra achaan tifajjukhu al-dabiib wa l-agaarib.
Wa anteetku gudra lahaddi tinnasru foog kulla gudrat Ibliis aduuna.
Ma fi cheyy al-yitaʼʼibku.
20 Sahiih,
al-chawaatiin yasmaʼo kalaamku laakin ma tafraho be l-kalaam da.
Akheer tafraho kadar Allah sajjal asaameeku fi kitaabah fi l-sama.
Farah al-Masiih
21 Wa fi l-wakit da,
Isa malaan be l-Ruuh al-Khudduus wa farhaan bilheen.
Wa gaal :
Chukran,
ya abuui Rabb al-samaawaat wa l-ard,
achaan inta labbadt kalaamak da min al-faahimiin wa min al-ulama wa wassaftah le l-naas al-jaahiliin marra waahid.
Aywa,
ya abuui,
achaan da bas al-cheyy al-inta raadi beyah.
22 Abuui Allah wakkalaani be kulla cheyy.
Ma fi naadum al-yaʼarif Ibn Allah.
Illa abuuh yaʼarfah.
Wa ma fi naadum al-yaʼarif Allah illa Ibn Allah wa l-naadum al-Ibn Allah yidoor yiwassif leyah abuuh.
23 Wa anlafat le talaamiizah wa hajja leehum wiheedhum wa gaal :
Mabruuk leeku fi chaan al-cheyy al-intu tichiifuuh.
24 Achaan nuguul leeku naas katiiriin min al-anbiya wa l-muluuk dawwaro bilheen yichiifu al-cheyy al-intu gaaʼidiin tichiifuuh laakin ma chaafooh.
Wa dawwaro yasmaʼo al-kalaam al-intu gaaʼidiin tasmaʼooh wa ma simʼooh.
Masal al-Saamiri al-zeen
25 Wa naadum waahid gamma achaan yijarrib Isa wa hu aalim al-Tawraat wa gaal :
Ya sayyidna,
chunu al-cheyy al-waajib nisawwiih achaan nawris al-haya al-abadiiye ?
26 Wa Isa gaal leyah :
Chunu al-maktuub fi l-Tawraat ?
Gareet foogah chunu ?
27 Wa l-aalim radda leyah wa gaal :
Al-Kitaab buguul <Waajib tihibb Rabbak Allah be kulla galbak wa kulla nafsak wa kulla gudurtak wa kulla fikrak>
wa battaan <Hibb akhuuk misil tihibb nafsak>.
28 Wa Isa gaal :
Kalaamak sahiih.
Sawwi misil gultah wa tahya.
29 Wa laakin al-aalim indah eeb wa dawwar yiwassif suʼaalah ma baatil.
Wa gaal :
Wa yaatu min al-naas akhuui ?
30 Wa Isa radda leyah wa gaal :
Yoom min al-ayyaam,
naadum waahid maachi min Madiinat al-Khudus le hillit Ariiha.
Wa ajala ke,
rabbaatiin al-duruub gammo hajamooh.
Daggooh wa sallabooh wa faato.
Wa khallooh majruuh ambeen al-haya wa l-moot.
31 Wa baʼadeen fi naadum waahid maachi fi l-derib da wa hu raajil diin.
Wa wakit hu chaaf al-naadum al-taʼbaan,
hu baaraah wa faat giddaam.
32 Wa naadum aakhar ja wa hu min al-naas al-bakhdumu fi Beet Allah.
Hu ja fi l-bakaan da wa chaaf al-taʼbaan wa hu kula baaraah wa faat giddaam.
33 Laakin musaafir waahid ja fi l-bakaan al-naadum gaaʼid foogah da wa hu min al-Saamiriyiin.
Wa l-ajnabi da chaafah wa hanna foogah.
34 Wa macha leyah wa sabba dihin wa khamar fi awaawiirah wa rabataahum wa rakkabah fi humaarah.
Wa waddaah fi beet hana diifaan wa rayyasah.
35 Wa ambaakir hu marag gurus min juzlaanah wa antaah le siid al-beet wa gaal leyah :
Rayyisah wa kan khisirt ziyaada,
nantiik wakit nigabbil leek.
36 Wa khalaas Isa saʼal al-aalim wa gaal :
Min al-naas al-talaata dool,
yaatu al-sawwa nafsah akhu le l-naadum al-rabbaatiin al-duruub hajamooh ?
37 Wa l-aalim radda leyah wa gaal :
Al-naadum al-sawwa leyah al-rahma.
Wa khalaas Isa gaal leyah :
Gumm sawwi nafs al-cheyy mislah.
Marsa wa Mariyam
38 Wa Isa wa jamaaʼtah maachiin giddaam wa dakhalo fi hille waahide.
Wa fi mara usumha Marsa wa hi faddalathum fi beetha.
39 Wa indaha akhut usumha Mariyam.
Wa Mariyam gaʼadat gariib le l-Rabb Isa achaan tasmaʼ taʼliimah.
40 Laakin Marsa gaaʼide takhdim leehum wa hi machkhuula bilheen wa ma tagdar tasmaʼ kalaamah.
Wa machat le Isa wa gaalat :
Ya sayyidna,
akhti di khallatni nisawwi kulla l-khidme di wiheedi.
Da adiil walla ?
Khalaas,
guul leeha khalli tiʼaawinni.