Al-tooba waajib le kulla l-naas
13
Wa fi l-wakit da bas naas waahidiin jo le Isa wa oorooh be khabar al-naas min daar al-Jaliil al-Bilaatus katalaahum fi Beet Allah wa khalbat dammuhum maʼa damm al-dahiiye al-humman gaaʼidiin yigaddumuuha le Allah.
2 Wa Isa radda leehum wa gaal :
Wa be sabab moothum al-cheen da,
fi fikirku al-Jaliiliyiin dool muznibiin ziyaada min al-naas al-aakhariin al-min daar al-Jaliil walla ?
3 Nuguul leeku la.
Wa kan intu ma tutuubu min zunuubku,
kulluku tahlako misilhum.
4 Wa simiʼtu khabar hana l-naas al-tamantaachar al-gasir Silwaam wagaʼ fooghum wa katalaahum.
Wa fi fikirku,
humman khaatiyiin ziyaada min kulla l-naas al-aakhariin al-saakniin fi Madiinat al-Khudus walla ?
5 Nuguul leeku la.
Wa kan intu ma tutuubu min zunuubku,
kulluku tahlako misilhum.
6 Wa Isa hajja leehum be masal wa gaal :
naadum waahid indah jineene hana inab wa chadarat tiin* kula gaaʼid foogha.
Wa macha leeha wa fattach foogha tiin wa ma ligi cheyy.
7 Wa hajja le l-khaddaam al-masʼuul fi l-jineene wa gaal :
Chiif.
Min talaata sana ana gaaʼid naji nifattich iyaal min al-chadara di wa ma ligiit foogha cheyy.
Agtaʼha.
Maala nikhalliiha tifassid al-turaab ?
8 Wa l-khaddaam radda leyah wa gaal :
Ya sayyidi,
khalliiha tagood sana waahide battaan.
Wa ana nahfir al-turaab al-jaayi jaayi leeha wa niziid leeha baʼar.
9 Wa l-sana al-jaaye kan wildat iyaal,
da sameh.
Wa kan ma wildat,
khalaas agtaʼha.
Al-Masiih daawa mara fi yoom al-sabit
10 Yoom al-sabit Isa gaaʼid yiʼallim al-naas fi beet al-sala.
11 Wa fi mara waahide taʼbaane.
Cheetaan waahid darabaaha wa min tamantaachar sana daharha mukanjar wa ma tagdar timattit.
12 Wa Isa chaafaaha wa naadaaha.
Wa gaal leeha :
Ya mara zeene.
Khalaas,
ligiiti al-aafe.
Inti ma marbuuta battaan.
13 Wa khatta iideenah foogha wa ajala ke hi mattatat daharha adiil wa chakarat Allah.
14 Laakin masʼuul hana beet al-sala ziʼil achaan Isa daawaaha fi yoom al-sabit.
Wa hajja le l-naas wa gaal :
Fi l-usbuuʼ induku sitte ayyaam le l-khidme.
Khalli taju fi l-ayyaam dool achaan talgo al-aafe laakin ma fi yoom al-sabit.
15 Wa l-Rabb Isa radda leyah wa gaal :
Ya al-munaafikhiin !
Fi yoom al-sabit akiid ayyi naadum minku yihill toorah walla humaarah min bakaanah wa yiwaddiih le l-bakaan al-yachrab foogah almi.
16 Wa l-mara di,
hi min awlaad Ibraahiim wa l-Cheetaan rabatha wa min tamantaachar sana hi marbuuta.
Wa kikkeef ma waajib nihillaha min rubaatha fi yoom al-sabit ?
17 Wa be kalaamah da,
al-eeb dakhal le kulla l-naas al-dawwaro yadharooh.
Wa kulla l-naas firho be kulla l-amal al-majiid al-Isa gaaʼid yisawwiih.
Amsaal al-khardal wa l-tawwaara
18 Wa Isa gaal :
Mamlakat Allah kikkeef ?
Hi tichaabih misil chunu ?
19 Hi misil teeraab hana khardal*.
Wa raajil waahid chaal habba waahide wa teerabaaha fi jineentah.
Wa l-nabaat gamma foog wa bigi kabiir misil chadara.
Wa l-tuyuur jo wa bano uchuuchhum fi l-furuuʼ.
20 Wa battaan Isa gaal :
Nuguul Mamlakat Allah tichaabih misil chunu ?
21 Mamlakat Allah tichaabih misil al-tawwaara.
Wa mara waahide chaalatha wa sabbatha daakhal fi lubb talaata kooro hana dagiig.
Wa baʼadeen al-tawwaara gawwamat al-ajiine kullaha ke.
Al-derib al-dayyig
22 Wa Isa wakit musaafir le Madiinat al-Khudus gaaʼid yiʼallim al-naas fi l-mudun wa l-hillaal.
23 Wa naadum waahid saʼalah wa gaal :
Ya sayyidna,
al-naas al-yanjo chiyya walla ?
Wa Isa hajja le l-naas wa gaal :
24 Jaahudu le tadkhulu be derib al-dayyig achaan nuguul leeku baʼadeen naas katiiriin yidooru yadkhulu wa ma yagdaro.
25 Kan siid al-beet gamma sadda al-derib wa intu waagfiin barra,
tugummu tuduggu al-baab wa tuguulu «
Sayyidna,
aftah leena ».
Wa hu yurudd leeku wa yuguul «
Ma naʼarifku.
Intu ke min ween ? ».
26 Wa fi l-bakaan da,
intu tuguulu «
Aniina akalna wa chiribna maʼaak.
Wa inta allamt al-naas fi chawaariʼna ».
27 Laakin hu yuguul «
Nuguul leeku ma naʼarif intu yaatumman.
Yalla kussu minni baʼiid.
Intu haraamiyiin ».
28 Wa fi l-bakaan da,
tabku wa tandamo nadaama chadiide bilheen achaan tichiifu Ibraahiim wa Ishaakh wa Yaakhuub wa kulla l-anbiya yadkhulu fi Mamlakat Allah wa intu kamaan matruudiin minha.
29 Wa l-naas yaju min sabaah wa kharib wa min munchaakh wa wati wa yadkhulu yilʼachcho fi Mamlakat Allah.
30 Wa khalaas waahidiin min al-naas al-wara yabgo giddaam wa waahidiin min al-naas al-giddaam yabgo wara.
Kalaam al-Masiih al-bukhuss al-Khudus
31 Wa fi l-wakit da,
naas waahidiin min al-Fariisiyiin jo le Isa wa gaalo :
Yalla,
amchi min al-bakaan da.
Hiruudus yidoor yaktulak tara.
32 Wa radda leehum wa gaal :
Fi fikrah hu al-duud laakin be l-sahiih hu baʼachoom bas.
Wa guulu leyah «
Asmaʼ.
Al-yoom ana natrud al-chawaatiin wa nidaawi al-mardaaniin wa ambaakir nisawwi nafs al-cheyy.
Wa fi l-yoom al-taalit bas,
nikammil khidimti ».
33 Aywa,
al-yoom wa ambaakir wa ambukra laazim namchi giddaam achaan ma waajib le ayyi nabi yumuut,
illa fi Madiinat al-Khudus.
34 Ya Madiinat al-Khudus !
Ya Madiinat al-Khudus !
Ya kattaaliin al-anbiya !
Intu al-tarjumu al-naas al-Allah yirassilhum leeku.
Kam marra dawwart nilimm iyaalku misil al-jidaade tilimm iyaalha tihit janaheeha.
Laakin intu abeetu.
35 Chiifu yikhallu beetku yaabis.
Wa khalaas nuguul leeku abadan ma tichiifuuni battaan lahaddi tuguulu <Mabruuk le l-jaayi be usum Allah>.