Ibliis jarrab al-Masiih
4
Wa Isa gabbal min bahar al-Urdun malaan be l-Ruuh al-Khudduus.
Wa l-Ruuh al-Khudduus gaaʼid yuguudah wa waddaah fi l-sahara.
2 Wa fi muddit arbaʼiin yoom,
Ibliis gaaʼid yijarribah.
Wa fi kulla l-mudda di,
Isa ma akal cheyy.
Wa fi l-akhiir hu bigi jiiʼaan.
3 Wa Ibliis hajja leyah wa gaal :
Kan sahiih inta Ibn Allah,
chiil hajar min al-hujaar dool wa guul leyah yabga leek akil.
4 Wa Isa radda leyah wa gaal :
Maktuub fi Kitaab Allah <Al-insaan ma yiʼiich be l-akil wiheedah>.
5 Wa Ibliis waddaah fi bakaan aali wa ajala ke wassaf leyah kulla l-mamaalik al-fi l-dunya.
6 Wa gaal leyah :
Najʼalak haakim fooghum kulluhum wa nantiik kulla gudrithum wa kulla maalhum.
Nagdar achaan hukumhum sallamooh leyi wa ana nantiih le ayyi naadum al-nidoorah.
7 Kan tasjud leyi bas,
da kulla ke yabga hanaak.
8 Wa Isa radda leyah wa gaal :
Maktuub fi l-Kitaab <Le Rabbak Allah bas tasjud wa hu wiheedah taʼabudah>.
9 Wa Ibliis waddaah fi Madiinat al-Khudus wa khattah foog fi raas Beet Allah.
Wa gaal leyah :
Kan sahiih inta Ibn Allah,
nutt agaʼ tihit
10 achaan fi l-Kitaab maktuub <Allah yaamurhum le malaaʼikatah achaan yahfadook>.
11 Wa battaan <Yichiiluuk fi iideenhum achaan rijileenak ma yintaggu fi hajar waahid>.
12 Wa Isa radda leyah wa gaal :
Wa l-Kitaab buguul <Ma tijarrib Rabbak Allah>.
13 Wa Ibliis jarrabah katiir wa wakit jarribiinah kammal,
hu faat khallaah achaan yarja fursa aakhara.
14 Wa Isa gabbal fi daar al-Jaliil malaan be gudrat al-Ruuh al-Khudduus.
Wa khabarah ansamaʼ fi kulla l-balad.
15 Wa Isa gaaʼid yiʼallim al-naas fi buyuut al-sala wa kulluhum chakarooh.
Al-Masiih abooh fi hillitah
16 Wa hu ja fi hillit al-Naasira al-rabbooh foogha.
Wa hu macha fi beet al-sala misil fi aadtah kulla yoom al-sabit.
Wa gamma foog achaan yagri le l-naas.
17 Wa antooh kitaab al-nabi Ichaʼya.
Wa hu fatah al-kitaab wa ligi al-bakaan al-maktuub foogah al-kalaam da
18 <Ruuh Allah gaaʼid foogi wa Allah masahaani be gudurtah achaan nibachchir le l-masaakiin be l-bichaara.
Hu rassalaani achaan niballikh le l-masjuuniin be l-afu wa nifattih uyuun al-amyaaniin wa nansur al-mazluumiin wa naʼafaahum.
19 Wa niballikh le l-naas kadar al-wakit al-Allah yinajji naasah ja>.
20 Wa sadda al-kitaab wa gabbalah le masʼuul wa gaʼad tihit giddaamhum.
Wa kulla l-naas al-gaaʼidiin fi beet al-sala khaattiin baalhum foogah.
21 Wa bada yiʼallimhum.
Wa gaal :
Al-yoom bas,
al-kalaam al-maktuub da tamma wakit intu gaaʼidiin tasmaʼooh.
22 Wa kulluhum chakarooh wa ajjabo min kalaamah al-halu.
Wa ambeenaathum gaalo :
Haa,
da ma wileed Yuusuf walla ?
23 Wa battaan hajja leehum wa gaal :
Akiid tuguulu leyi al-masal al-maʼruuf da «
Ya daktoor,
daawi nafsak.
Simiʼna be kulla l-khidme al-sawweetha fi hillit Kafar Naahuum.
Sawwi nafs al-cheyy hini fi hillitak ».
24 Wa gaal leehum :
Nuguul leeku al-hagg,
ma fi nabi al-yakhbalooh fi hillitah halaalah.
25 Laakin be l-sahiih nuguul leeku,
taʼarfu kadar fi zaman al-nabi Iliyaas,
Allah dahar al-matar ma yusubb talaata sana wa sitte chahar wa bigi juuʼ chadiid fi kulla l-balad.
Wa fi Israaʼiil fiyah awiin katiiraat al-rujaalhin maytiin
26 wa laakin Allah ma rassal Iliyaas le ayyi waahide min al-awiin deel.
Allah rassalah fi hillit Sarafa fi balad Seeda le mara aakhara al-raajilha mayyit.
27 Wa fi zaman al-nabi Alyasaʼ,
fi naas katiiriin fi balad Israaʼiil al-induhum al-baras wa naadum minhum ma ligi al-aafe,
illa Naʼamaan al-Suuri bas ligi al-aafe.
28 Wa wakit simʼo al-kalaam da,
kulla l-naas al-fi beet al-sala ziʼilo zaʼal chadiid.
29 Wa gammo saagooh min al-hille wa waddooh fi taraf al-hajar al-hillithum mabniiye foogah achaan yarmuuh wa yaktuluuh.
30 Wa laakin hu chagga be usuthum wa faat.
Al-Masiih tarad cheetaan min naadum
31 Wa Isa macha fi Kafar Naahuum wa hi hille waahide fi daar al-Jaliil.
Wa yoom al-sabit hu gaaʼid yiʼallim al-naas.
32 Wa l-naas gaaʼidiin yiʼajjubu bilheen min taʼaaliimah achaan kalaamah indah gudra.
33 Wa fi beet al-sala,
naadum waahid gaaʼid wa hu muchootin.
Indah cheetaan cheen.
Wa hu aat wa gaal :
34 Haay !
Ya Isa al-min al-Naasira,
tidoor minnina chunu ?
Jiit hini achaan tahlikna walla ?
Ana naʼarfak.
Inta bas al-Khudduus al-Allah rassalah.
35 Laakin Isa kachcha leyah wa gaal :
Askut wa amrug minnah.
Wa l-cheetaan rama al-naadum tihit fi ust al-naas wa marag minnah khalaas.
Wa l-naadum zaatah ma ligi ayyi wajaʼ.
36 Wa kulla l-naas astakhrabo bilheen wa gaalo ambeenaathum :
Al-muʼallim da kikkeef ?
Indah sulta wa gudra lahaddi baamur al-chawaatiin wa bamurgu min al-muchootiniin.
37 Wa khabarah chattat fi kulla l-balad di.
Al-Masiih fi beet Simʼaan
38 Wa Isa gamma marag min beet al-sala wa andassa fi beet Simʼaan.
Wa nasiibtah le Simʼaan maaruuda wirde chadiide.
Wa saʼalo leeha Isa.
39 Wa hu macha wigif fi jamb al-bakaan al-hi raagde foogah wa kachcha le l-wirde wa l-wirde khallatha.
Wa ajala ke hi gammat wa dayyafathum.
Al-Masiih daawa naas katiiriin
40 Wa fi l-makharib,
kulla l-naas al-induhum naadum mardaan kan indah ayyi marad,
jaabooh le Isa wa hu yukhutt iideenah foog ayyi naadum al-mardaan wa yidaawiih.
41 Wa chawaatiin marago min naas katiiriin wa aato wa gaalo «
Inta Ibn Allah ».
Laakin hu kachcha leehum wa daharaahum ma yihajju achaan humman baʼarfu hu al-Masiih.
42 Wa wakit al-wata asbahat,
hu marag min al-hille wa macha fi bakaan waahid ma indah naas.
Wa l-naas fattachooh wa jo leyah wa dawwaro yadharooh ma yamchi yikhalliihum.
43 Laakin hu gaal leehum :
Waajib niballikh bichaarat mamlakat Allah fi hillaal aakhariin kula.
Fi chaan da bas Allah rassalaani.
44 Wa hu raayikh fi daar al-Yahuud wa gaaʼid yibachchir al-naas fi buyuut al-sala.