Al-Masiih naada Simʼaan wa zumlaanah
5
Wa yoom waahid,
Isa gaaʼid jamb Bahar Jinnisaarat*.
Wa l-naas al-yidooru yasmaʼo kalaam Allah bigo katiiriin bilheen lahaddi gaaʼidiin yaʼasuruuh.
2 Wa chaaf maraakib itneen gaaʼidiin fi khachum al-bahar.
Al-hawwaatiin ma gaaʼidiin fooghum achaan nazalo le yikhassulu charakhum.
3 Wa Isa rikib fi markaba waahide wa hi hana Simʼaan.
Wa talab min Simʼaan yilizzaha chiyya min khachum al-bahar.
Wa gaʼad tihit fi l-markaba wa bada yiʼallim al-naas al-gaaʼidiin fi khachum al-bahar.
4 Wa wakit Isa kammal kalaamah,
hu hajja le Simʼaan wa gaal :
Waddi al-markaba fi ust al-bahar wa oori naasak yazgulu al-charak fi l-almi le yakurbu huut.
5 Wa Simʼaan radda leyah wa gaal :
Ya Sayyidna,
tiʼibna tuul al-leel wa ma karabna cheyy.
Laakin nazgul al-charak kan inta tidoorah.
6 Wa wakit zagalo charakhum karabo huut katiir bilheen lahaddi l-charak yidoor yingatiʼ min al-tagala.
7 Wa sawwo ichaara le zumlaanhum al-fi l-markaba al-aakhara achaan yiʼaawunuuhum.
Wa jo malo al-maraakib al-itneen tak ke lahaddi l-maraakib yidooru yakhtusu.
8 Wa wakit Simʼaan Butrus chaaf al-cheyy al-bigi da,
hu sajad giddaam rijileen Isa.
Wa gaal :
Ya Rabb,
kiss minni baʼiid.
Ana naadum muznib.
9 Wa hajja misil da achaan hu wa kulla jamaaʼtah fi l-markaba astakhrabo bilheen min al-huut al-katiir al-karabooh.
10 Wa zumlaanah le Simʼaan,
Yaakhuub wa Yuuhanna awlaad Zabadi,
kula astakhrabo maʼaayah.
Wa Isa gaal le Simʼaan :
Ma takhaaf.
Awwal inta karabt al-huut wa min al-yoom tikarrib al-naas le derib Allah.
11 Wa min marago maraakibhum fi khachum al-bahar,
khallo kulla cheyy wa taabaʼo Isa.
Al-Masiih daawa naadum indah baras
12 Wa yoom waahid Isa gaaʼid fi hille waahide wa naadum indah baras ja leyah.
Wa l-naadum da indah baras cheen.
Wa wakit hu chaaf Isa,
hu sajad giddaamah wa gaal :
Ya sayyidna,
kan tidoor tidaawiini akiid inta tagdar wa nabga taahir.
13 Wa Isa madda iidah wa limis al-indah baras wa gaal :
Nidoor nidaawiik.
Abga taahir.
Wa ajala ke bigi taahir min al-baras.
14 Wa Isa amarah wa gaal leyah :
Ma tiʼoori beyah naadum.
Amchi wassif nafsak le raajil al-diin wa gaddim dahiiye le Allah misil al-nabi Muusa wassaana.
Wa misil da al-naas yaʼarfu inta ligiit al-aafe wa bigiit taahir.
15 Laakin be da,
khabarah chattat be ziyaada fi l-naas.
Wa naas katiiriin bilheen laammiin foogah achaan yidooru yasmaʼo kalaamah wa hu yidaawi leehum amraadhum.
16 Laakin Isa gamma wiheedah misil fi aadtah wa macha fi l-khala achaan yisalli.
Al-Masiih khafar le l-mukarsah zunuubah
17 Wa yoom aakhar,
Isa gaaʼid yiʼallim al-naas.
Wa fi l-bakaan da,
fi naas katiiriin gaaʼidiin maʼaayah min tariikhat al-Fariisiiya wa min al-ulama.
Wa humman jo min ayyi hille al-fi daar al-Jaliil wa l-Yahuudiiya wa min Madiinat al-Khudus.
Wa gudrat Allah gaaʼide foogah achaan yidaawi al-mardaaniin.
18 Wa rujaal waahidiin jo.
Wa humman chaayliin naadum mukarsah fi sariirah.
Wa dawwaro yindasso beyah daakhal wa yukhuttuuh giddaam Isa.
19 Laakin ma gidro be sabab al-naas al-katiiriin al-gaaʼidiin fi l-derib.
Wa be da,
rikbo fi raas al-beet wa gaddooh be foog.
Wa dallo al-maʼduur be sariirah fi ust al-naas wa khattooh giddaam Isa.
20 Wa Isa chaaf iimaanhum wa hajja le l-maʼduur wa gaal :
Ya raajil,
ana khafart leek zunuubak.
21 Wa l-ulama wa l-Fariisiyiin bado yihajju fi guluubhum wa yuguulu :
Haay !
Da yaatu al-yihajji kalaam muchrik ?
Ma fi insaan al-yagdar yakhfir le l-naas zunuubhum illa Allah.
22 Wa Isa irif al-kalaam al-fi guluubhum.
Wa radda leehum wa gaal :
Maala induku suʼaal fi guluubku ?
23 Weenu al-hayyin nuguulah ?
Nuguul «
Khafart leek zunuubak »
walla nuguul «
Gumm wa ruukh » ?
24 Wa laakin nidoor intu taʼarfu kadar ana,
Ibn al-Insaan,
indi gudra fi l-ard achaan nakhfir le l-naas zunuubhum.
Wa gaal le l-maʼduur :
Gumm.
Chiil sariirak wa amchi beetak.
25 Wa ajala ke al-maʼduur gamma giddaamhum wa chaal al-sariir al-awwal raagid foogah wa macha beetah.
Wa fi derbah,
hu gaaʼid yachkur Allah.
26 Wa kulluhum astakhrabo marra waahid wa gammo yachkuru Allah.
Wa l-khoof karabaahum wa gaalo :
Al-yoom chifna cheyy ajiib.
Al-Masiih naada Laawi
27 Wa baʼadeen Isa marag.
Wa chaaf naadum hana l-jamaarik usmah Laawi*.
Wa hu gaaʼid fi maktab al-jamaarik.
Wa Isa gaal leyah :
Taʼaal taabiʼni.
28 Wa khalaas Laawi khalla kulla cheyy wa gamma taabaʼah.
29 Wa Laawi sawwa leyah aazuuma kabiire fi beetah.
Wa fi naas katiiriin hana l-jamaarik wa battaan naas aakhariin al-misilhum gaaʼidiin yaakulu maʼaayah.
30 Wa l-Fariisiyiin wa ulamaahum harajo talaamiiz Isa.
Wa gaalo :
Maala taakulu maʼa naas al-jamaarik wa l-muznibiin ?
31 Wa Isa radda leehum wa gaal :
Al-naas al-tayyibiin ma hawjaaniin daktoor,
illa l-mardaaniin bas al-hawjaaniin.
32 Ana ma jiit achaan ninaadi al-saalihiin le l-tooba laakin ninaadi al-muznibiin.
Al-Masiih saʼalooh fi l-siyaam
33 Wa gaalo leyah :
Talaamiiz Yahya busuumu wa bisallu bilheen.
Wa talaamiiz al-Fariisiyiin bisawwu nafs al-cheyy.
Laakin talaamiizak inta baakulu wa bacharbo.
34 Wa Isa radda leehum wa gaal :
Kan naas gaaʼidiin fi iris wa l-ariis maʼaahum,
tidooru humman yusuumu walla ?
35 Wa laakin yoom waahid baji,
al-ariis bichiiluuh minhum wa fi l-wakit daak,
busuumu.
36 Wa battaan hu hajja leehum be masal wa gaal :
Ma fi naadum al-yachrut gitʼe min khalag jadiid achaan yargaʼ beeha khalag gadiim.
Wa kan yisawwi misil da,
hu yitallif al-khalag al-jadiid wa l-gitʼe al-chaalaaha min al-jadiid ma tiwaafig maʼa l-gadiim.
37 Wa ma fi naadum yusubb khamar jadiid fi girbe gadiime.
Wa kan yisawwi misil da,
al-khamar al-jadiid yuchugg al-girbe wa l-khamar yidaffig wa l-girbe tatlaf.
38 Laakin waajib yusubbu khamar jadiid fi girbe jadiide.
39 Wa ma fi naadum al-chirib al-khamar al-gadiim yidoor yachrab al-jadiid laakin hu buguul al-gadiim bas adiil.