Khidmit al-nabi Yahya
3
Wa fi sanat al-khamistaachar hana hukum Tibaari Sultaan al-Roomaaniyiin wa wakit Bilaatus al-Bunti waali hana daar al-Yahuudiiya wa Hiruudus muhaafiz hana Daar al-Jaliil wa akhuuh Filibbus muhaafiz hana buldaan Ituuriya wa Tarakhuuniitus wa Lisaniyuus muhaafiz hana Ibiiliina
2 wa Hanaan wa Gayaafa kubaaraat hana rujaal al-diin,
fi l-wakit da bas kalaam Allah nazal le Yahya wileed Zakariiya al-gaaʼid fi l-khala.
3 Wa hu gamma yuruukh fi kulla l-kadaade al-jamb bahar al-Urdun.
Hu gaaʼid yinaadi al-naas achaan yutuubu min zunuubhum wa hu yikhattishum* fi l-almi leechaan Allah yakhfir leehum zunuubhum.
4 Wa da misil al-kalaam al-maktuub fi kitaab al-nabi Ichaʼya.
Kalaamah buguul <Hiss hana naadum gaaʼid binaadi fi l-khala wa buguul jahhuzu derib al-Rabb wa addulu leyah al-chawaariʼ.
5 Waajib kulla waadi yindafin wa kulla jabal wa hajar yilkassar wa l-bakaan al-awaj yabga adiil wa l-derib al-cheen yabga amalas.
6 Wa kulla l-naas yichiifu al-naja al-Allah yijiibha>.
7 Wa naas katiiriin maargiin min hillaalhum wa maachiin leyah achaan hu yikhattishum.
Wa gaal leehum :
Ya iyaal al-daabi !
Yaatu al-gaal leeku ajru min al-azaab al-jaayi ?
8 Sawwu al-amal al-yiwassif intu tubtu be l-sahiih.
Wa ma tukhuchchu nufuusku.
Ma tuguulu «
Ma indina eeb achaan aniina iyaal Ibraahiim ».
Nuguul leeku Allah yagdar yichiil hujaar min al-turaab wa yisawwi minhum iyaal le Ibraahiim fi badalku.
9 Chiifu,
al-faas jaahize le tagtaʼ al-chadara min irigha.
Ayyi chadara al-ma talda iyaal adiiliin yagtaʼooha wa yazguluuha fi l-naar.
10 Wa l-naas gaaʼidiin yasʼalo Yahya wa yuguulu :
Waajib nisawwu chunu ?
11 Wa radda leehum wa gaal :
Al-naadum al-indah khulgaan itneen,
khalli yanti waahid le l-ma indah.
Wa l-naadum al-indah akil,
khalli yisawwi nafs al-cheyy.
12 Wa naas waahidiin min al-jamaarik kula jo leyah achaan hu yikhattishum.
Wa saʼalooh wa gaalo :
Sayyidna,
aniina waajib nisawwu chunu ?
13 Wa Yahya gaal leehum :
Ma tichiilu ziyaada min al-amarooku beyah.
14 Wa askar waahidiin kula saʼalooh.
Wa gaalo :
Wa aniina,
waajib nisawwu chunu ?
Wa radda leehum wa gaal :
Ma tichiilu gurus min al-naas be gu wa la be tuhma baatle.
Wa abgo radyaaniin be gurus chaharku.
Yahya radda le l-naas
15 Wa l-naas gaaʼidiin yarjo jayyit al-Masiih.
Wa ayyi waahid gaaʼid yasʼal fi nafsah wa fi fikirhum akuun Yahya zaatah bas al-Masiih.
16 Wa Yahya radda leehum kulluhum wa gaal :
Ana nikhattisku fi l-almi wa laakin al-gaadir minni bilheen yaji waraayi wa ana ma tammeet leyah khaddaam kula.
Wa hu yikhattisku be l-Ruuh al-Khudduus wa be l-naar.
17 Wa indah tabag fi iideenah le yikharbil al-khalla.
Wa yilimm khallitah wa yusubbaha fi dabangitah wa laakin al-uttaab yutuchchah fi l-naar al-ma tumuut abadan.
18 Wa be kalaam katiir misil da,
Yahya wassaahum le l-naas wa ballakh leehum al-bichaara.
19 Wa fi l-wakit da,
Hiruudus al-muhaafiz akhad Hiruudiiya al-hi awwal marit akhuuh.
Wa Yahya harajah le Hiruudus fi chaan al-akhiide di wa kulla l-fasaala al-hu sawwaaha.
20 Wa Hiruudus karab Yahya fi l-sijin wa misil da hu zaad zunuubah ziyaada.
Al-Masiih khattasooh
21 Wa wakit Yahya lissaaʼ gaaʼid yikhattis al-naas,
Isa ja wa Yahya khattasah.
Wa wakit Isa gaaʼid yisalli,
al-samaawaat anfataho.
22 Wa l-Ruuh al-Khudduus baan naazil fi suurat hamaama wa nazal foogah.
Wa hiss min al-sama ansamaʼ wa gaal :
Inta bas Ibni.
Ana nihibbak wa ana farhaan beek bilheen.
Juduud al-Masiih
23 Wa Isa bada khidimtah wakit umrah misil talaatiin sana.
Wa fi fikir al-naas hu wileed Yuusuf wileed Ali.
24 Wa Ali wileed Mattaat wileed Laawi wileed Malki wileed Yanna wileed Yuusuf.
25 Wa Yuusuf wileed Mattataaya wileed Amuus wileed Naahuum wileed Hasli wileed Naggaay.
26 Wa Naggaay wileed Maʼaat wileed Mattataaya wileed Simʼiin wileed Yuusikh wileed Yahuuza.
27 Wa Yahuuza wileed Yuuhanna wileed Riisa wileed Zarubbaabil wileed Chaltiyiil wileed Niiri.
28 Wa Niiri wileed Malki wileed Addi wileed Khuusam wileed Almuudaam wileed Iir.
29 Wa Iir wileed Yachuuʼa wileed Aliʼaazar wileed Yuuriim wileed Mattaat wileed Laawi.
30 Wa Laawi wileed Chimʼuun wileed Yahuuza wileed Yuusuf wileed Yuunaan wileed Aliyaakhim.
31 Wa Aliyaakhim wileed Malaya wileed Manna wileed Mattata wileed Naataan wileed Dawuud.
32 Wa Dawuud wileed Yassa wileed Ubeed wileed Buʼaaz wileed Salmuun wileed Nahchuun.
33 Wa Nahchuun wileed Aminadaab wileed Admi wileed Arni wileed Hasruun wileed Faaris wileed Yahuuza.
34 Wa Yahuuza wileed Yaakhuub wileed Ishaakh wileed Ibraahiim wileed Taarah wileed Naahuur.
35 Wa Naahuur wileed Saruug wileed Raʼu wileed Faalag wileed Abir wileed Chaalah.
36 Wa Chaalah wileed Khinaan wileed Arfakchaad wileed Saam wileed Nuuh wileed Laamak.
37 Wa Laamak wileed Matuuchalah wileed Akhnuukh wileed Yaarad wileed Mahlaliil wileed Khinaan.
38 Wa Khinaan wileed Anuuch wileed Chiit wileed Adam al-hu min Allah.