Masal al-aazuuma wa l-diifaan
22
Wa battaan Isa hajja leehum be amsaal wa gaal :
2 Mamlakat Allah tichaabih misil malik waahid al-sawwa aazuuma fi iris hana wileedah.
3 Wa rassal abiidah achaan binaadu al-naas al-maʼzuumiin fi l-aazuuma wa laakin al-maʼzuumiin abo ma yaju.
4 Wa l-malik rassal abiid aakhariin wa gaal leehum :
Guulu le l-naas al-azamtuhum «
Asmaʼo,
ana jahhazt al-akil khalaas.
Tiiraani wa ijaali al-adiiliin dabahtuhum wa kulla cheyy haasil.
Taʼaalu le l-aazuuma ».
5 Wa laakin al-naas al-azamaahum abo.
Al-waahid macha fi l-zereʼ wa l-aakhar macha yisaawig.
6 Wa l-aakhariin karabo abiid al-malik wa ayyaroohum wa kataloohum.
7 Wa l-malik ziʼil bilheen wa rassal askarah wa katalo al-kattaaliin dool wa tachcho hillithum.
8 Wa gaal le abiidah :
Akil al-aazuuma haasil wa laakin al-naas al-azamtuhum ma waajib leehum.
9 Khalaas,
amchu fi kulli mawgaf wa ayyi naadum al-ligiituuh naaduuh fi l-aazuuma.
10 Wa l-abiid marago wa macho fi l-chawaariʼ wa lammo kulla l-naas al-ligoohum.
Wa lammo al-fasliin maʼa l-adiiliin sawa wa l-beet anmala diifaan.
11 Wa l-malik andassa fi lubb al-beet achaan yisallim al-diifaan wa chaaf naadum waahid ma laabis khalag hana l-iris.
12 Wa l-malik gaal :
Akhuui,
kikkeef dakhalt wa ma laabis al-khalag al-anteetah le l-diifaan ?
Wa l-naadum da ma radda leyah kalaam.
13 Wa l-malik amaraahum le abiidah wa gaal :
Arbutu rijileenah wa iideenah wa azguluuh fi l-dalaam al-barraani.
Hinaak naas yabku wa yiʼaddu asaabiʼhum min al-azaab.
14 Achaan Allah yinaadi naas katiiriin wa laakin yikhtaar naas chiyya.
Al-suʼaal fi l-miiri
15 Wa l-Fariisiyiin macho achchaawaro fi kikkeef bitchaatchu Isa achaan yarmuuh be suʼaal.
16 Wa rassalo le Isa waahidiin min talaamiizhum maʼa naas min hizib Hiruudus.
Wa gaalo leyah :
Ya muʼallim,
naʼarfu kadar inta naadum zeen wa tiʼallim derib Allah le l-naas be kalaam sahiih wa inta ma khaayif min ayyi naadum wa ma takhaaf min wijih al-naas.
17 Khalaas,
guul leena fikrak chunu ?
Hasab al-Tawraat,
waajib leena nikaffu al-miiri le sultaan al-Roomaaniyiin walla ma waajib ?
18 Wa Isa irif niiyithum cheene wa gaal leehum :
Ya munaafikhiin.
Maala tidooru tijarrubuuni ?
19 Wassufuuni riyaal hana l-miiri.
Wa antooh diinaar waahid.
20 Wa saʼalaahum wa gaal :
Al-suura wa l-usum al-maktuub foogah da hana yaatu ?
21 Wa raddo leyah wa gaalo :
Hana sultaan al-Roomaaniyiin.
Wa gaal leehum :
Khalaas.
Hana l-sultaan,
antuuh le l-sultaan wa hana Allah,
antuuh le Allah.
22 Wa ajjabo bilheen fi kalaamah wa faato khallooh.
Al-suʼaal fi l-Giyaama
23 Wa fi l-yoom da,
naas waahidiin min al-Sadduukhiiya jo le Isa.
Wa l-Sadduukhiyiin ma muʼminiin be l-giyaama.
Wa saʼalooh
24 wa gaalo :
Ya al-sayyid,
fi l-Tawraat,
Muusa gaal kan raajil maat wa ma indah iyaal,
akhu al-raajil da waajib yaakhud al-mara wa yalda minha zurriiye le akhuuh al-marhuum.
25 Zeen.
Awwal sabʼa akhwaan gaaʼidiin ambeenaatna.
Wa l-kabiir minhum akhad mara wa baʼad wakit maat.
Wa ma indah iyaal wa achaan da,
waajib le akhuuh yaakhudha.
26 Wa l-akhu al-taani akhad al-mara wa maat.
Wa baʼad da,
al-akhu al-taalit wa kulluhum lahaddi al-saabiʼ akhadooha wa maato.
27 Wa baʼad kulla l-akhwaan maato,
al-mara kula maatat.
28 Wa khalaas wakit al-maytiin yabʼaso,
hi tabga marit yaatu min al-akhwaan al-sabʼa ?
Kulluhum akhadooha.
29 Wa Isa radda leehum wa gaal :
Intu muwaddiriin achaan ma taʼarfu wa la Kitaab Allah wa la gudrat Allah.
30 Achaan wakit al-naas yabʼaso,
al-rujaal ma yaakhudu awiin wa l-awiin ma yaakhudan rujaal wa yabgo misil malaaʼikat Allah fi l-samaawaat al-ambeenaathum akhiide ma fi.
31 Wa fi l-cheyy al-bukhuss al-buʼaas,
hal nisiitu al-kalaam al-gareetuuh al-Allah gaalah leeku walla ?
32 Gaal <Ana Allah Rabb hana Ibraahiim wa Rabb Ishaakh wa Rabb Yaakhuub>.
Wa hu Rabb al-naas al-gaaʼidiin hayyiin wa ma Rabb al-naas al-ma fiihum.
33 Wa l-naas simʼo taʼliimah wa ajjabo bilheen.
Al-wasiiye al-akbar
34 Wa wakit al-Fariisiyiin simʼo kadar Isa sakkat al-Sadduukhiyiin,
khalaas humman lammo maʼaayah achaan yasʼalooh.
35 Wa naadum waahid minhum aalim fi l-Tawraat wa dawwar yasʼalah achaan yijarribah.
36 Wa saʼalah wa gaal :
Ya l-sayyid,
min kulla l-wasaaya al-fi l-Tawraat,
weeni l-wasiiye al-akbar ?
37 Wa Isa radda leyah wa gaal :
<Hibb Rabbak Allah be kulla galbak wa be kulla nafsak wa be kulla fikrak>.
38 Di hi al-wasiiye al-akbar wa ma fi wasiiye akbar minha.
39 Wa l-wasiiye al-taaniye tichaabihha wa di hi <Hibb akhuuk misil tihibb nafsak>.
40 Wa l-wasaaya al-itneen deel,
humman amm al-Tawraat wa kutub al-nubuuwa kulluhum.
Suʼaal al-Masiih fi Ibn Dawuud
41 Wa wakit al-Fariisiyiin gaaʼidiin maʼa Isa,
hu saʼalaahum wa gaal :
42 Chunu fikirku fi l-Masiih ?
Al-Masiih yabga ibn yaatu ?
Wa raddo leyah wa gaalo :
Al-Masiih Ibn Dawuud.
43 Wa saʼalaahum wa gaal :
Kan kalaamku sahiih,
kikkeef Dawuud gaal al-Masiih hu siidah wakit gaaʼid yikallim be gudrat al-Ruuh al-Khudduus wa gaal
44 <Allah kallam le siidi al-malik wa gaal :
Agood fi nussi al-zeenaay lahaddi nukhutt udwaanak tihit rijileenak> ?
45 Kan Dawuud gaal al-Masiih siidah,
kikkeef al-Masiih yabga wileedah ?
46 Wa ma gidro yuruddu leyah kalaam.
Wa min al-yoom da,
naadum waahid ma jarrabah be ayyi suʼaal.