Dakhuul al-Masiih fi Madiinat al-Khudus
21
Wa Isa wa talaamiizah garrabo le Madiinat al-Khudus wa lihgo hille usumha Beet Faaji fi Jabal al-Zaytuun.
Wa Isa rassal giddaamah itneen min talaamiizah
2 wa gaal leehum :
Amchu fi l-hille al-giddaamna di wa ajala talgo humaara marbuuta be sakhiirha.
Hilluuhum wa jiibuuhum leyi hini.
3 Wa kan naadum buguul leeku kalaam,
guulu leyah «
Al-Rabb bidoorhum ».
Wa kan gultu leyah ke,
yikhalliihum yaju ajala.
4 Wa bigi misil da achaan kalaam Allah yitimm.
Zamaan al-nabi gaal
5 <Guulu le Madiinat al-Khudus al-gaaʼide fi Jabal Sahyuun :
Chiifi,
da sayyidki al-malik jaayi leeki.
Wa hu daluul wa raakib fi humaar.
Aywa,
hu raakib fi wileed hana humaara>.
6 Wa l-talaamiiz al-itneen sawwo misil Isa gaal leehum.
7 Wa jaabo al-humaara be sakhiirha wa chaalo khulgaanhum wa farrachoohum fi l-humaara wa fi l-dahach wa Isa rikib.
8 Wa naas katiiriin bilheen lammo wa gammo sawwo ziina le l-chaariʼ wa farracho khulgaanhum fi l-derib.
Wa naas aakhariin gataʼo furuuʼ al-chadar wa farrachoohum fi l-derib.
9 Wa naas katiiriin jaayiin maʼa Isa giddaamah wa waraayah wa kulluhum gaaʼidiin yachkuru be hiss aali wa buguulu :
Allah yansur Ibn Dawuud !
Mabruuk le l-jaayi be usum Allah !
Subhaan Allah wa taʼaala !
10 Wa wakit Isa dakhal fi Madiinat al-Khudus kulla naas al-madiina harrako wa assaaʼalo ambeenaathum wa gaalo :
Al-naadum da yaatu ?
11 Wa l-naas al-jaayiin maʼa Isa raddo leehum wa gaalo :
Da Isa al-nabi min hillit al-Naasira fi daar al-Jaliil.
Al-Masiih fi Beet Allah
12 Wa Isa dakhal fi Beet Allah wa taradaahum le kulla l-naas al-gaaʼidiin bisaawugu fi l-hooch.
Wa chaglab kulla taraabiiz al-naas al-bibaddulu gurus wa kulla banbar al-naas al-bisaawugu hamaam.
13 Wa Isa gaal leehum :
Fi l-Kitaab Allah gaal <Beeti binaaduuh beet hana l-sala>
wa laakin intu <sawweetuuh beet hana saraariig>.
14 Wa wakit Isa gaaʼid fi Beet Allah,
al-amyaaniin wa l-maʼduuriin jo leyah wa hu daawaahum.
15 Wa kubaaraat rujaal al-diin wa l-ulama chaafo al-ajaayib al-Isa bisawwiihum wa simʼo fi Beet Allah hiss al-iyaal al-bachkuru be hiss aali wa buguulu «
Allah yansur Ibn Dawuud ».
Wa Isa radda leehum wa gaal :
Aywa,
simiʼt kalaamhum.
Wa taʼarfu kadar al-Kitaab buguul <Inta sawweet al-iyaal al-sukhaar wa l-bardaʼo yamdaho be madih adiil marra waahid>.
17 Wa khalaas marag khallaahum.
Wa marag min al-madiina wa macha fi hille usumha Beet Anya wa ragad hinaak.
Chadarat al-tiin al-naʼalaaha al-Masiih
18 Wa ambaakir fajur,
Isa gamma jaayi fi l-madiina.
Wa hu jiiʼaan.
19 Wa chaaf chadara hana tiin* jamb al-derib.
Wa macha leeha wa laakin ma ligi iyaal fiiha illa l-warchaal.
Wa Isa gaal le l-chadara di :
Battaan ma talda iyaal marra waahid.
Wa ajala ke al-chadara yibsat.
20 Wa l-talaamiiz chaafooha wa ajjabo bilheen wa gaalo :
Al-chadara yibsat ajala marra waahid.
21 Wa Isa radda leehum wa gaal :
Nuguul leeku al-hagg,
kan aamantu wa ma tichakkuku,
intu ma tisawwu bas misil ana sawweet le l-chadara di.
Kan gultu le l-hajar da «
Amrug min hini wa agaʼ fi l-bahar »,
khalaas yabga misil kalaamku.
22 Wa kan induku iimaan,
kulla cheyy al-tasʼalooh fi duʼa,
Allah yantiiku.
Al-Masiih saʼalooh yaatu al-antaah izin
23 Wa lihgo Beet Allah wa Isa bada yiʼallim al-naas.
Wa kubaaraat rujaal al-diin wa l-chuyuukh jo leyah wa saʼalooh wa gaalo :
Tisawwi al-khidme di be izin yaatu ?
Wa yaatu al-antaak al-izin da ?
24 Wa Isa radda leehum wa gaal :
Wa ana kula indi suʼaal nasʼalku.
Kan intu turuddu leyi,
ana nuguul leeku yaatu antaani al-izin achaan nisawwi al-khidme di.
25 Yahya khattas al-naas be izin yaatu ?
Indah izin min Allah walla indah izin min al-naas bas ?
Wa achchaawaro ambeenaathum wa gaalo :
Kan nuguulu «
Yahya indah izin min Allah »,
akiid Isa yuguul leena «
Maala ma saddagtu kalaamah ? »
26 Wa kan nuguulu «
Yahya indah izin min al-naas bas »,
aniina nakhaafo min al-naas al-laammiin hini dool.
Akuun yikhabbunu foogna wa yisawwu leena cheyy fasil achaan fi fikir kulla l-naas dool Yahya hu nabi.
27 Wa raddo le Isa wa gaalo :
Da ma naʼarfuuh.
Wa Isa radda leehum wa gaal :
Khalaas,
ana kula ma niʼooriiku yaatu al-antaani izin achaan nisawwi amali.
Masal al-awlaad al-itneen
28 Wa fikirku chunu ?
Naadum waahid indah awlaad itneen.
Wa macha le l-kabiir wa gaal :
Wileedi,
amchi akhdim al-yoom fi jineenti.
29 Wa l-wileed gaal :
La,
ma namchi.
Wa laakin baʼadeen al-wileed nidim le l-kalaam al-gaalah wa macha wa khadam fi l-jineene.
30 Wa l-raajil macha le wileedah al-sakhayyar wa gaal leyah nafs al-cheyy.
Wa l-sakhayyar gaal :
Aywa,
sayyidna,
namchi.
Wa l-kubaaraat gaalo :
Al-awwal.
Wa Isa gaal leehum :
Wa nuguul leeku al-hagg,
naas al-jamaarik wa l-charaamiit yindasso fi mamlakat Allah giddaamku.
32 Yahya ja leeku fi derib al-hagg wa intu ma saddagtu kalaamah.
Laakin naas al-jamaarik wa l-charaamiit saddagooh.
Wa wakit chiftuuhum taabo min zunuubhum,
intu ma khayyartu fikirku al-awwal wa ma tubtu wa ma saddagtu kalaamah.
Masal al-harraatiin al-fasliin
33 Asmaʼo,
nuguul leeku masal aakhar.
Naadum waahid siid al-maal maggan inab fi jineene wa zarabaaha wa nakat nugra achaan yiʼassuru foogha al-inab wa bana beet hana haraasa.
Wa hu ajjar harraatiin achaan yakhdumu foogha wa khalaas khatar wa macha fi balad aakhara.
34 Wa wakit hana lammiin al-inab garrab wa hu rassal abiidah le l-harraatiin achaan yichiilu al-inab al-muwaaliih.
35 Wa l-harraatiin karabo abiidah wa l-waahid daggooh wa l-aakhar katalooh wa aakhar battaan rajamooh.
36 Wa baʼadeen siid al-jineene rassal abiid aakhariin,
ziyaada min al-awwal.
Wa l-harraatiin sawwo leehum misil sawwo le l-naas al-jo awwal.
37 Wa khalaas rassal leehum wileedah wa gaal :
Akiid yikarrumu wileedi.
38 Wa laakin al-harraatiin chaafo wileed sayyidhum wa gaalo ambeenaathum :
Da bas al-yawris.
Khalli naktuluuh wa nichiilu warasatah.
39 Wa khalaas karabooh wa zagalooh barra min al-jineene wa katalooh.
40 Wa wakit siid al-jineene yigabbil min al-safar wa yaji le l-harraatiin dool,
hu yisawwi leehum chunu ?
41 Wa l-naas raddo leyah wa gaalo :
Akiid yaktulhum le l-naas al-fasliin dool.
Wa yijiib fi l-jineene harraatiin aakhariin al-yantuuh al-inab fi l-wakit al-waajib.
42 Wa Isa gaal leehum :
Akiid gareetu al-kalaam al-maktuub fi l-Kitaab al-buguul <Al-hajar al-bannaayiin al-beet awwal ma dawwarooh bigi al-hajar al-muhimm fi buna al-beet.
Wa l-cheyy da,
Allah bas sawwaah wa da bigi leena ajiib>.
43 Wa achaan da,
nuguul leeku Allah yichiil mamlakatah minku wa yantiiha le l-naas al-yijiibu leyah faayde.
44 Wa ayyi naadum al-yagaʼ foog al-hajar da,
yinkasir marra waahid.
Wa kan al-hajar da yagaʼ foog naadum,
yarhakah misil dagiig.