Kalaam al-Masiih fi Yahya
11
Wa baʼad Isa gaal kulla l-kalaam da le talaamiizah al-atnaachar,
hu gamma min hinaak wa macha yiʼallim al-naas wa yiballikh al-bichaara fi hillaalhum.
2 Wa fi l-wakit da,
Yahya gaaʼid fi l-sijin.
Wa simiʼ khabar hana amal al-Masiih wa rassal waahidiin min talaamiizah le Isa
3 achaan yasʼalooh wa yuguulu leyah :
Inta al-naadum al-yaji walla waajib narjo naadum aakhar ?
4 Wa Isa radda leehum wa gaal :
Amchu wa ooru Yahya be kulla cheyy al-chiftuuh wa l-simiʼtuuh.
5 Al-amyaaniin gaaʼidiin bichiifu wa l-uruj buruukhu wa l-induhum baras balgo al-aafe wa l-tarchaaniin basmaʼo wa l-maytiin babʼaso wa l-masaakiin gaaʼidiin basmaʼo al-bichaara.
6 Wa mabruuk le l-naadum al-ma bichakkik foogi.
7 Wa wakit talaamiiz Yahya gammo maachiin,
Isa bada yihajji fi Yahya le l-naas al-gaaʼidiin maʼaayah.
Wa gaal :
Wakit Yahya gaaʼid fi l-kadaade,
intu maragtu leyah.
Wa dawwartu tichiifu chunu ?
Dawwartu tichiifu ageegaay bas al-riih tihizzaha walla ?
8 Wa kan ma ke,
dawwartu tichiifu chunu ?
Naadum laabis khalag sameh ?
La.
Achaan al-naas al-laabsiin khulgaan samhiin gaaʼidiin fi buyuut al-muluuk.
9 Zeen,
maragtu achaan tichiifu chunu ?
Achaan tichiifu nabi ?
Aywa wa nuguul leeku chiftu naadum akbar min nabi.
10 Wa da bas hu al-be sababah al-Kitaab buguul <Asmaʼo.
Nirassil marsuuli giddaamak wa hu yiʼaddil leek al-derib>.
11 Wa nuguul leeku al-hagg,
ma fi naadum mawluud min mara akbar min Yahya al-Mukhattis.
Wa laakin al-naadum al-sakhayyar fi mamlakat Allah akbar minnah.
12 Wa min awwal yoom hana khidmit Yahya al-Mukhattis,
naas gaaʼidiin yiʼassuru mamlakat Allah wa naas yamsukuuha be gu.
13 Allah kallam le l-naas fi l-Tawraat wa fi kutub al-nubuuwa kulluhum lahaddi Yahya ja.
14 Wa kan induku niiye tisaddugu kalaami da,
Yahya hu Iliyaas al-gaaʼidiin tarjooh.
15 Ayyi naadum al-indah adaan khalli yasmaʼ.
Kalaam al-Masiih foog naas waktah
16 Wa nuguul chunu fi naas hana wakitna ?
Bichaabuhu chunu ?
Humman misil iyaal dugaag laammiin fi l-door wa binaadu rufgaanhum wa buguulu
17 « Saffagna leeku wa intu ma liʼibtu.
Aniina khanneena khine hana l-moot wa intu ma bakeetu ! ».
18 Yahya ja wa hu ma baakul wa ma bachrab wa gaalo «
Hu muchootin ».
19 Wa baʼadeen ana Ibn al-Insaan jiit wa ana gaaʼid naakul wa nachrab wa gaalo «
Hu akkaal wa sakkaari wa rafiig le naas al-jamaarik wa l-muznibiin ».
Laakin hagg hana fikir Allah yinchaaf fi l-naas al-yitaabuʼuuh.
20 Wa Isa bada yahrij al-hillaal al-sawwa fooghum ajaayib katiiriin wa naashum ma taabo min zunuubhum.
21 Wa gaal :
Al-azaab yarjaaki,
ya hillit Kuuraziin !
Al-azaab yarjaaki,
ya hillit Beet Seeda !
Kan awwal naadum sawwa l-ajaayib dool fi Suur wa fi Seeda*,
naas al-mudun dool yutuubu min zunuubhum min zamaan wa yalbaso chawaawiil wa yagoodu fi ramaad achaan yistakhfaro.
22 Wa nuguul leeku,
fi yoom al-Hisaab,
al-azaab al-yanzil foog muznibiin hana Suur wa Seeda ma yabga chadiid misil al-azaab al-yanzil foog naasku.
23 Wa inti hillit Kafar Naahuum,
rafaʼti raaski lahaddi l-sama walla ?
Nuguul leeki Allah yarmiiki fi Jahannam achaan kan awwal naas hana Saduum chaafo al-ajaayib al-naaski chaafoohum,
hillit Saduum tagood lahaddi l-yoom.
24 Wa laakin nuguul leeku,
fi yoom al-Hisaab,
al-azaab al-yanzil foog naas Saduum ma yabga chadiid misil al-azaab al-yanzil foog naaski.
Al-Masiih naada al-taʼbaaniin
25 Wa fi l-wakit da,
Isa hajja wa gaal :
Chukran,
ya abuui Rabb al-samaawaat wa l-ard achaan inta labbadt kalaamak da min al-faahimiin wa min al-ulama wa wassaftah le l-naas al-jaahiliin marra waahid.
26 Aywa,
ya abuui,
achaan da bas al-cheyy al-inta raadi beyah.
27 Abuui Allah wakkalaani be kulla cheyy.
Ma fi naadum al-yaʼarif Ibn Allah illa abuuh.
Wa ma fi naadum al-yaʼarif Allah illa Ibn Allah wa l-naadum al-Ibn Allah yidoor yiwassif leyah abuuh.