Khilaaf fi yoom al-sabit
12
Wa fi l-wakit da,
Isa raayikh fi ust al-ziraaʼa fi yoom al-sabit wa da yoom al-raaha hana l-Yahuud.
Wa talaamiizah jiiʼaaniin wa kassaro ganaadiil al-gameh wa akaloohum.
2 Wa l-Fariisiyiin chaafoohum wa gaalo leyah :
Talaamiizak gaaʼidiin yisawwu khidme ma halaal fi yoom al-sabit.
3 Wa Isa saʼalaahum wa gaal :
Ma gareetu al-Kitaab walla ?
Nisiitu al-cheyy al-Dawuud wa jamaaʼtah sawwooh wakit al-juuʼ sawwaahum walla ?
4 Hu andassa fi Beet Allah wa akal al-khubza al-antooha al-naas le Allah wa da ma halaal le Dawuud wa la le l-naas al-maʼaayah.
Wa da ma halaal illa le rujaal al-diin.
5 Walla ma gareetu kalaam al-Tawraat ?
Kulli yoom al-sabit rujaal al-diin yikhaalufu wasaaya al-sabit achaan yakhdumu fi Beet Allah wa Allah ma yajʼalhum muznibiin.
6 Wa laakin nuguul leeku cheyy akbar min Beet Allah gaaʼid hini giddaamku.
7 Wa Allah gaal <Sawwu al-kheer.
Da bas al-nidoorah minku,
ma al-dahiiye>.
Wa kan awwal fihimtu maʼana al-kalaam da,
ma tuluumu al-naas al-ma muznibiin.
8 Wa khalaas Ibn al-Insaan hu Rabb yoom al-sabit wa ana bas hu.
Al-Masiih daawa naadum fi yoom al-sabit
9 Wa macha giddaam wa andassa fi beet al-sala hanaahum.
10 Wa ligi naadum iidah mayte.
Wa l-Fariisiyiin dawwaro fursa achaan yathamo Isa.
Wa achaan da,
saʼalooh wa gaalo :
Kan naadum yidaawi al-mardaaniin fi yoom al-sabit,
da halaal walla haraam ?
11 Wa Isa radda leehum wa gaal :
Kan naadum minku indah kabich wagaʼ fi nugra fi yoom al-sabit,
hu ma yakurbah ajala wa yisillah walla ?
12 Wa insaani ma akheer ziyaada min kabich walla ?
Khalaas,
halaal leena nisawwu al-kheer fi yoom al-sabit.
13 Wa Isa gaal le l-raajil :
Midd iidak.
Wa l-raajil maddaaha wa iidah hiyat wa bigat aafe misil al-aakhara.
14 Wa laakin al-Fariisiyiin marago wa rakano kikkeef yaktulu Isa.
Kalaam al-nabi tamma fi l-Masiih
15 Wa Isa irif fikirhum wa macha min hinaak.
Wa naas katiiriin bilheen taabaʼooh wa daawaahum kulluhum.
16 Wa amaraahum achaan ma yihajju beyah le naas aakhariin.
17 Wa misil da,
al-kalaam al-Allah gaalah be khachum al-nabi Ichaʼya tamma khalaas.
18 Wa Ichaʼya gaal <Daahu khaddaami al-ikhtirtah wa daahu al-nihibbah wa ana farhaan minnah.
Wa nukhutt ruuhi foogah wa hu yiballikh khabar hana adaalat Allah le kulla l-umam.
19 Wa ma yikhaasim wa ma yikoorik wa l-naas ma yasmaʼo hissah fi l-chawaariʼ.
20 Hu ma yikassir ageegaay mafjuukha wa ma yaktul naar hana l-faanuus al-gariib tumuut wa yuguud adaalat Allah lahaddi tinnasir.
21 Wa kulla l-umam yiwakkulu nufuushum le usmah>.
Gaalo gudrat al-Masiih min Ibliis
22 Wa baʼadeen jaabo raajil amyaan wa abkam achaan indah cheetaan wa Isa daawaah wa l-raajil gamma yichiif wa yihajji.
23 Wa kulla l-naas ajjabo bilheen wa gaalo :
Akuun al-naadum da Ibn Dawuud al-narjooh.
24 Wa laakin al-Fariisiyiin simʼo al-kalaam da wa gaalo :
Al-naadum da ma yatrud al-chawaatiin illa be gudrat Ibliis kabiir al-chawaatiin.
25 Wa Isa irif fikirhum wa gaal leehum :
Ayyi mamlaka takhrab kan naasha bidaawusu ambeenaathum.
Wa ma fi madiina wa la beet yagood saabit kan naasah binfargu wa bidaawusu ambeenaathum.
26 Wa be misil da,
kan al-Cheetaan yatrud al-chawaatiin,
hu bidaawis nafsah wa kikkeef mamlakatah tagood saabte ?
27 Kan ana taradt al-chawaatiin be izin Ibliis,
naasku yaturdu al-chawaatiin be izin yaatu ?
Wa misil da,
naasku bas humman al-yisabbutu foogku al-kalaam.
28 Wa kan ana taradt al-chawaatiin be Ruuh Allah kamaan,
mamlakat Allah garrabat leeku.
29 Wa be masal aakhar,
nifassir leeku kikkeef natrud al-chawaatiin.
Naadum ma yadkhul fi beet raajil gawi wa ma yasrig khumaamah illa kan awwal rabat al-raajil al-gawi da.
Kan rabatah,
yagdar yichiil kulla khumaamah.
Al-naadum al-ma maʼa l-Masiih adu al-Masiih
30 Ayyi naadum al-ma maʼaayi aduui wa ayyi naadum al-ma yilimm al-naas maʼaayi,
yichattithum.
31 Wa be misil da,
nuguul leeku Allah yisaamih le l-naas kulla zunuubhum wa kulla kalaamhum hana l-kufur
32 laakin ma yisaamih leehum kalaam al-kufur didd al-Ruuh al-Khudduus.
Da ma yisaamihah leehum.
Wa kan naadum buguul kilme diddi ana,
Ibn al-Insaan,
Allah yisaamihah.
Wa laakin Allah ma yisaamih al-naadum al-buguul kilme didd al-Ruuh al-Khudduus wa la fi l-dunya wa la fi l-aakhira.
Allah yihaasib kalaam al-naas
33 Wa l-chadara al-adiile talda iyaal adiiliin wa l-chadara al-fasle talda iyaal fasliin.
Wa l-naas baʼarfu al-chadara min iyaalha.
34 Ya iyaal al-dabaayib,
intu fasliin wa misil da kikkeef tagdaro tuguulu kalaam adiil ?
Achaan al-cheyy al-galib al-naadum malaan beyah,
da bas al-yamrug min khachmah kan yihajji.
35 Al-galib hu misil makhazan.
Wa l-naadum al-adiil yudumm kalaam adiil fi galbah wa l-kalaam al-yamrug minnah kula adiil.
Wa l-naadum al-fasil yudumm kalaam fasil fi galbah wa l-kalaam al-yamrug minnah fasil.
36 Wa khalaas nuguul leeku,
fi yoom al-Hisaab,
Allah yihaasib kulla l-kalaam al-ma indah faayde al-naas gaalooh.
37 Achaan Allah yibarriik hasab kalaamak wa Allah yahkimak hasab kalaamak.
Alaamat al-nabi Yuunus
38 Wa naas waahidiin min al-ulama wa min al-Fariisiyiin raddo leyah wa gaalo :
Ya sayyidna,
nidooru inta tisawwi leena alaama achaan niʼaamunu beek.
39 Wa Isa radda leehum wa gaal :
Naas wakitna fasliin wa khaayniin wa yidooru alaama achaan yiʼaamunu.
Wa Allah ma yantiihum alaama illa alaamat al-nabi Yuunus.
40 Wa misil Yuunus gaʼad talaata yoom wa talaata leele fi batun al-huutaay,
Ibn al-Insaan kula yagood fi lubb al-ard talaata yoom wa talaata leele.
41 Wa fi yoom al-Hisaab,
naas madiinat Niinawa yugummu foog maʼa naas hana wakitna wa yisabbit fooghum al-tuhma,
achaan naas Niinawa taabo min zunuubhum wakit Yuunus kallamaahum be kalaam Allah.
Wa hu al-yikallim leeku hassaʼ akbar min Yuunus wa intu ma tubtu.
42 Wa fi yoom al-Hisaab,
malikat al-Wati hi tugumm maʼa naas hana wakitna wa tisabbit foogku al-tuhma achaan hi khatarat wa jaat min bakaan baʼiid marra waahid achaan tasmaʼ kalaam Suleymaan al-Hakiim wa tichiif ilmah.
Wa hu al-yikallim leeku hassaʼ akbar min Suleymaan wa intu ma tubtu.
Masal al-cheetaan al-taradooh
43 Wa wakit al-cheetaan yamrug min naadum muchootin,
al-cheetaan yamchi misil naadum muwaddir fi l-sahara wa yifattich bakaan yinjamma foogah wa ma yalgaah.
44 Wa yuguul «
Khalaas,
nigabbil fi l-beet al-maragt minnah ».
Wa wakit yigabbil,
yalga al-naadum misil beet yaabis wa nadiif wa mufarrach.
45 Wa yamchi yijiib maʼaayah sabʼa chawaatiin fasliin minnah ziyaada.
Wa kulluhum yindasso wa yaskunu fi l-naadum da wa khalaas haalat al-naadum da tabga hawaane min awwal.
Wa yabga misil da le l-naas al-fasliin hana wakitna dool.
Amm al-Masiih wa akhwaanah
46 Wa Isa gaaʼid yihajji le naas katiiriin wa ammah wa akhwaanah jo wa wigfo barra.
Wa dawwaro bihajju maʼaayah.
47 Wa naadum waahid ja ooraah wa gaal :
Ammak wa akhwaanak gaaʼidiin barra wa bidooru bihajju maʼaak.
48 Wa Isa radda le l-naadum al-ooraah wa gaal :
Ammi ween ?
Wa akhwaani ween ?