Al-Masiih rassal rusulah
10
Wa Isa naada talaamiizah al-atnaachar wa antaahum gudra achaan yaturdu al-chawaatiin wa yidaawu kulla naadum al-indah ayyi marad.
2 Wa asaame al-rujaal al-atnaachar al-jaʼalaahum rusul humman awwal Simʼaan al-binaaduuh Butrus wa akhuuh Andareeyas,
wa Yaakhuub wileed Zabadi wa akhuuh Yuuhanna,
3 wa Filibbus wa Bartulma,
wa Tuuma wa Matta al-jumriki,
wa Yaakhuub wileed Halfa wa Taddaaya,
4 wa Simʼaan al-Sawri wa Yahuuza al-Iskhariyooti,
al-naadum al-khaan Isa.
5 Dool humman al-rusul al-atnaachar.
Wa Isa rassalaahum fi ust al-naas.
Wa amaraahum wa gaal :
Ma tamchu le l-naas al-ma Yahuud wa ma tadkhulu fi ayyi hille hana l-Samaariyiin.
6 Amchu illa fi ust al-khanam al-muwaddariin hana Bani Israaʼiil.
7 Wa wakit intu maachiin fi l-derib,
ballukhu al-bichaara guulu Mamlakat Allah garrabat.
8 Al-mardaaniin daawuuhum wa l-maytiin gawwumuuhum wa l-induhum baras antuuhum al-aafe wa l-chawaatiin aturduuhum min al-naas.
Ana anteetku wa ma saʼalt minku cheyy wa khalaas,
antu le l-naas wa ma tasʼalo minhum cheyy.
9 Ma tichiilu maʼaaku gurus wa la dahab wa la fudda wa la nahaas.
10 Wa ma tichiilu zaad wa la jalaaliib itneen wa la niʼiilaat wa ma tichiilu asa.
Achaan al-akil waajib le l-khaddaam wa akiid talgooh.
11 Wa ayyi madiina walla hille dakhaltu foogha,
fattuchu fiiha naadum zeen wa dallu fi beetah lahaddi tamchu min al-bakaan da.
12 Wa wakit intu tadkhulu fi l-beet,
asʼalo salaam Allah foogah.
13 Wa kan naas al-beet zeeniin,
khalli salaamku yagood foog al-beet da.
Wa kan naas al-beet ma zeeniin,
khallu salaamku yigabbil leeku.
14 Wa kan naas hana ayyi beet walla ayyi hille ma yakhbalooku wa ma yidooru kalaamku,
amurgu min al-bakaan da wa hittu al-ajaaj min rijileenku.
15 Nuguul leeku al-hagg,
fi yoom al-Hisaab,
al-azaab al-yanzil foog naas al-bakaan da yabga ziyaada min al-azaab al-yanzil foog naas al-mudun Saduum wa Gamuura*.
Taʼab al-talaamiiz fi l-dunya
16 Asmaʼo,
nirassilku fi ust al-naas wa tabgo misil khanam fi ust al-maraafiʼiin.
Achaan da,
laazim tabgo nujaad bilheen wa daluuliin marra waahid.
17 Awʼu baalku min al-naas,
achaan yiwadduuku le l-chariiʼa wa yajluduuku fi buyuut al-sala.
18 Wa yiwadduuku giddaam al-hukkaam wa l-salaatiin achaan intu naasi.
Wa fi l-bakaan da,
tachhado leyi giddaam al-naas al-induhum diin wa giddaam al-naas al-ma induhum diin.
19 Wa wakit yakurbuuku wa yiwadduuku le l-kubaaraat,
ma tihimmu le l-kalaam al-tuguuluuh walla kikkeef tihajju.
Achaan fi l-wakit da,
Allah yantiiku al-kalaam al-tuguuluuh.
20 Al-kalaam ma baji minku wa laakin min Ruuh abuuku Allah.
Hu yihajji be khuchuumku.
21 Wa fi l-wakit al-jaayi da,
naadum waahid yisallim akhuuh le l-moot wa abu iyaal yisallim wileedah wa l-iyaal yabgo aasiyiin le waaldeenhum wa yaktuluuhum.
22 Wa kulla l-naas yakrahooku achaan usmi.
Wa laakin al-naadum al-yagood saabit lahaddi kumaalit kulla cheyy,
hu yanja.
23 Wa wakit yitaʼʼubuuku fi hille waahide,
ajru fi hille aakhara.
Nuguul leeku al-hagg,
ma tagdaro tikammulu amalku fi hillaal Israaʼiil gubbaal Ibn al-Insaan ma yaji.
Ma takhaafo min al-naas
24 Al-tilmiiz ma akbar min sayyidah wa l-abid ma akbar min siidah.
25 Wa l-tilmiiz radyaan kan yabga misil sayyidah wa l-abid radyaan kan yabga misil siidah.
Wa kan buguulu siid al-beet «
hu Ibliis »,
akiid buguulu nafs al-cheyy ziyaada fi naas beetah.
26 Ma takhaafo minhum.
Ma fi cheyy mulabbad al-baʼadeen ma yibiin wa ma fi achiir al-ma binʼarif.
27 Ayyi cheyy al-nuguulah leeku fi l-leel,
guuluuh fi l-nahaar.
Wa l-kalaam al-simiʼtuuh be raaha,
ballukhuuh barra fi l-chawaariʼ.
28 Ma takhaafo min al-naas.
Yagdaro yaktulu al-naadum wa laakin ma yagdaro yaktulu ruuhah.
Akheer leeku takhaafo min Allah.
Hu yagdar yidammir al-jilid wa l-ruuh sawa fi Jahannam.
29 Taʼarfu kadar bibiiʼu tuyuur itneen be riyaal waahid.
Wa be da kula,
kan waahid minhum yagaʼ fi l-turaab,
abuuku Allah yaʼarfah.
30 Wa leeku intu,
Allah gaaʼid yifakkir fiiku wa yaʼarif adad al-suuf al-fi raasku.
31 Khalaas,
ma takhaafo.
Ayyi naadum minku akheer le Allah ziyaada min tuyuur katiiriin.
32 Ayyi naadum al-bachhad leyi giddaam al-naas,
ana kula nachhad leyah giddaam abuui Allah.
33 Wa ayyi naadum al-yankurni giddaam al-naas,
ana kula nankurah giddaam abuui Allah.
Taʼab al-muʼminiin fi beethum
34 Ma tukhuttu fi uguulku kadar ana jiit achaan nijiib al-salaam fi l-ard.
Ma jibt al-salaam laakin jibt al-seef.
35 Ana jiit achaan nikhaalif al-wileed maʼa abuuh wa l-bineeye maʼa ammaha wa mara maʼa nasiibitha.
36 Wa be misil da,
naas beetah yabgo aduuh le l-naadum.
37 Ayyi naadum al-yihibb abuuh walla ammah ziyaada minni ma waajib leyah yabga tilmiizi.
Wa ayyi naadum al-yihibb wileedah walla bineetah ziyaada minni ma waajib leyah yabga tilmiizi.
38 Wa ayyi naadum al-aba ma yakrub taʼab al-saliib* wa ma yitaabiʼni le l-moot ma waajib leyah yabga tilmiizi.
39 Ayyi naadum al-yidoor yinajji nafsah,
yiwaddir.
Wa l-naadum al-yiwaddir nafsah fi chaani,
hu bas yanja.
40 Wa ayyi naadum al-khiblaaku khiblaani.
Wa l-naadum al-khiblaani khibil Allah al-rassalaani.
41 Wa ayyi naadum al-yakhbal nabi fi beetah achaan hu nabi,
yalga ajur hana nabi.
Wa ayyi naadum al-yakhbal raajil saalih achaan hu raajil saalih,
yalga ajur hana raajil saalih.
42 Wa ayyi naadum al-yanti le naadum min naasi al-sukhaar dool chokhol sakhayyar misil kaas hana almi baarid achaan hu tilmiizi,
nuguul leeku al-hagg,
ajrah ma yiwaddir abadan.