Al-Masiih khafar le l-mukarsah zunuubah
9
Wa khalaas,
Isa rikib fi l-markaba wa gataʼ al-bahar wa gabbal fi hillitah Kafar Naahuum.
2 Wa naas waahidiin jaabo leyah raajil mukarsah raagid fi sariirah.
Wa Isa chaaf iimaanhum wa gaal le l-raajil al-maʼduur :
Ya wileedi,
chidd heelak !
Ana khafart leek zunuubak.
3 Wa waahidiin min al-ulama gaalo fi guluubhum :
Kalaam al-naadum da kalaam muchrik.
4 Wa Isa irif fikirhum.
Wa saʼalaahum wa gaal :
Maala tuguulu cheyy fasil fi guluubku ?
5 Weenu al-hayyin nuguulah min al-kalaam al-itneen dool ?
Nuguul «
khafart leek zunuubak »
walla nuguul «
gumm wa ruukh » ?
6 Ana nidoor intu taʼarfu kadar ana Ibn al-Insaan indi gudra fi l-ard le nakhfir al-zunuub le l-naas.
Wa hajja le l-maʼduur wa gaal :
Gumm,
chiil sariirak wa amchi beetak.
7 Wa khalaas al-naadum gamma wa macha beetah.
8 Wakit al-naas chaafooh,
khaafo bilheen wa chakaro Allah achaan hu anta gudra misil di le l-naas.
Al-Masiih naada Matta
9 Wa Isa maachi jamb maktab al-jamaarik wa chaaf naadum waahid gaaʼid bakhdim foogah wa usmah Matta.
Wa Isa gaal leyah :
Taʼaal taabiʼni.
Wa khalaas gamma foog wa taabaʼah.
10 Wa Isa achcha fi beet Matta wa naas katiiriin jo min naas al-jamaarik wa muznibiin aakhariin misilhum.
Wa jo gaʼado maʼa Isa wa talaamiizah.
11 Wa waahidiin min al-Fariisiyiin chaafoohum wa saʼalo talaamiizah wa gaalo :
Maala sayyidku yaakul maʼa naas al-jamaarik wa l-muznibiin ?
12 Wa Isa simiʼ kalaamhum wa gaal :
Naas tayyibiin ma hawjaaniin daktoor,
illa l-mardaaniin bas al-hawjaaniin.
13 Amchu agru kalaam Allah al-buguul <Sawwu al-kheer.
Da bas al-nidoorah minku,
ma al-dahiiye>
wa fakkuru fi maʼanaatah.
Wa khalaas,
ana ma jiit achaan ninaadi al-saalihiin le l-tooba laakin jiit achaan ninaadi al-muznibiin.
Al-Masiih saʼalooh fi l-siyaam
14 Waahidiin min talaamiiz Yahya jo le Isa wa saʼalooh wa gaalo :
Aniina nusuumu wa l-Fariisiyiin kula busuumu.
Maala talaamiizak ma busuumu ?
15 Wa Isa radda leehum wa gaal :
Kan naas gaaʼidiin fi iris wa l-ariis maʼaahum,
yahazno walla ?
Wa laakin yoom waahid baji wa l-ariis bichiiluuh minhum wa fi l-wakit daak,
busuumu.
16 Ma fi naadum al-yargaʼ gitʼe jadiide fi khalag gadiim achaan al-rugʼa al-jadiide ticharrit al-khalag al-gadiim wa l-gadd yabga ziyaada min awwal.
17 Wa l-naas ma busubbu khamar jadiid fi girbe gadiime achaan kan sawwo misil da,
al-girbe tinchagga.
Wa misil da,
al-khamar bidaffig wa l-girbe tatlaf.
Wa laakin busubbu al-khamar al-jadiid fi girbe jadiide wa misil da yahfado al-khamar maʼa l-girbe sawa.
Al-bineeye al-maatat wa l-mara al-mardaane
18 Wa wakit Isa gaaʼid yihajji fi l-kalaam da,
naadum waahid masʼuul fi beet al-sala ja wa sajad giddaamah wa gaal :
19 Bineeyti dahaabha maatat wa laakin taʼaal almasha be iidak wa hi tahya.
Wa Isa gamma wa macha maʼaayah wa talaamiizah kula macho maʼaayah sawa.
20 Wa mara waahide garrabat le Isa min waraayah wa hi taʼbaane.
Dammaha bidaffig min atnaachar sana.
Wa jaat limsat taraf khalagah
21 wa gaalat fi galibha :
Kan limist khulgaanah nalga al-aafe.
22 Wa Isa anlafat wa chaafaaha wa gaal :
Ya bineeyti,
chiddi heelki.
Iimaanki beyi najjaaki.
Wa khalaas min al-wakit da bas,
hi ligat al-aafe.
23 Wa Isa dakhal fi beet al-masʼuul wa chaaf darraabiin al-keeta hana l-moot wa naas gaaʼidiin yabku katiir.
24 Wa Isa gaal leehum :
Yalla amchu.
Al-bineeye ma maatat.
Hi naayme bas.
Wa dihiko leyah.
25 Wa wakit kulla l-naas marago,
Isa dakhal fi lubb al-beet wa karab iid al-bineeye wa hi gammat.
26 Wa l-khabar da ansamaʼ fi kulla l-balad di.
Al-amyaaniin wa l-naadum l-abkam
27 Wa Isa maachi giddaam wa amyaaniin itneen taabaʼooh.
Wa gaaʼidiin yasarkho wa gaalo :
Ya Ibn Dawuud,
arhamna.
28 Wa wakit Isa dakhal fi l-beet,
humman jo leyah wa hu saʼalaahum wa gaal :
Sahiih intu tiʼaamunu kadar indi gudra nidaawiiku walla ?
Wa raddo leyah wa gaalo :
Aywa sayyidna.
29 Wa Isa limis uyuunhum wa gaal :
Khalli yabga leeku misil aamantu beyah.
30 Wa khalaas,
uyuunhum anfataho wa chaafo.
Wa Isa amaraahum wa gaal :
Angarʼu!
Ma tiʼooru beyah naadum waahid.
31 Wa laakin macho wa chattato al-khabar da wa usmah talaʼ fi kulla l-balad di.
32 Wa wakit al-rujaal dool maargiin min al-beet,
naas waahidiin jaabo naadum abkam wa hu muchootin.
33 Wa Isa tarad cheetaanah wa l-abkam gamma bihajji.
Wa l-naas ajjabo bilheen wa gaalo :
Cheyy ajiib misil da abadan ma chifna fi daar Israaʼiil.
34 Wa laakin al-Fariisiyiin gaalo :
Al-naadum da yatrud al-chawaatiin be gudrat kabiir al-chawaatiin.
Al-khaddaamiin chiyya
35 Isa gaaʼid yuruukh fi ayyi madiina wa ayyi hille wa yiʼallim al-naas fi buyuut al-sala wa yiballikh bichaarat al-mamlaka wa yidaawi kulla naadum al-indah ayyi marad.
36 Wa Isa chaaf naas katiiriin bilheen jaayiin leyah wa hanna fooghum achaan humman taʼbaaniin wa muchattatiin misil khanam al-ma induhum raaʼi.
37 Wa gaal le talaamiizah :
Al-naas dool misil zereʼ kabiir wa khallitah nijdat khalaas wa laakin al-naas al-yakhdumu chiyya.
38 Achaan da,
atlubu min siid al-zereʼ hu yirassil khaddaamiinah yilimmu khallitah.