Al-Masiih daawa naadum indah baras
8
Wakit Isa dalla min al-hajar,
naas katiiriin marra waahid taabaʼooh.
2 Wa raajil indah baras ja leyah.
Hu ja wa sajad giddaam Isa wa gaal :
Ya sayyidna,
kan tidoor tidaawiini,
akiid inta tagdar wa nabga taahir.
3 Wa Isa madda iidah wa limis al-indah baras wa gaal :
Nidoor nidaawiik.
Abga taahir.
Wa ajala ke bigi taahir min al-baras.
4 Wa Isa gaal leyah :
Awʼa baalak,
ma tiʼoori naadum waahid lahaddi tamchi tiwassif nafsak le raajil al-diin wa tigaddim dahiiye le Allah misil al-nabi Muusa amaraana beeha.
Wa misil da,
al-naas yaʼarfu inta ligiit al-aafe wa bigiit taahir.
Iimaan hana kabiir al-askar
5 Wa Isa macha fi hillit Kafar Naahuum wa ajala naadum waahid ja leyah.
Hu kabiir al-askar al-roomaaniyiin wa chahadah le Isa.
6 Wa gaal :
Ya sayyidna,
khaddaami mardaan wa bigi mukarsah.
Jildah bigi mayyit.
Hu raagid fi l-beet wa gaaʼid fi azaab chadiid.
7 Wa Isa gaal leyah :
Khalaas,
namchu wa nidaawiih.
8 Wa kabiir al-askar da radda leyah wa gaal :
Ya sayyidna,
ana ma tammeet al-naadum al-inta tadkhul fi beetah.
Wa laakin guul kilme waahide bas wa khaddaami yalga al-aafe.
9 Ana kula indi kabiir foog minni wa indi askar tihti.
Wa nuguul le waahid «
Amchi »
wa hu yamchi.
Wa nuguul le naadum aakhar «
Taʼaal »
wa hu baji.
Wa nuguul le khaddaami «
Sawwi ke »
wa hu yisawwiih.
10 Wa Isa simiʼ kalaamah wa ajjab bilheen wa hajja le l-naas al-gaaʼidiin yitaabuʼuuh wa gaal :
Nuguul leeku al-hagg,
ma ligiit naadum waahid min Bani Israaʼiil al-indah iimaan chadiid misil iimaan al-naadum da !
11 Wa nuguul leeku,
naas katiiriin yaju min al-sabaah wa min al-kharib wa yilʼachcho maʼa Ibraahiim wa Ishaakh wa Yaakhuub fi mamlakat Allah.
12 Wa laakin al-naas al-waajib yamluku al-mamlaka,
Allah yatrudhum fi l-dalaam al-barraani.
Hinaak naas yabku wa yandumu nadaama chadiide bilheen.
13 Wa Isa hajja le kabiir al-askar wa gaal :
Khalaas amchi wa khalli yabga leek misil inta aamant beyah.
Wa fi l-wakit da bas khaddaamah ligi al-aafe.
Al-Masiih fi beet Butrus
14 Wa Isa macha fi beet Butrus wa ligi nasiibtah le Butrus wa hi raagde maaruuda.
15 Wa Isa limis iidha wa l-wirde khallatha wa hi gammat takhdim leyah.
16 Wa fi l-makharib,
naas katiiriin jo leyah wa jaabo muchootiniin katiiriin wa Isa gaaʼid yatrud al-chawaatiin be kilme waahide bas wa l-mardaaniin daawaahum kulluhum.
17 Wa misil da,
al-kalaam al-Allah gaalah be khachum al-nabi Ichaʼya tamma.
Al-nabi gaal <Hu chaal wajaʼna wa himil maradna>.
Al-naaseen al-dawwaro yitaabuʼu al-Masiih
18 Wa Isa chaaf naas katiiriin lammo foogah wa amaraahum le talaamiizah wa gaal :
Nagtaʼo al-bahar.
19 Wa waahid min al-ulama ja leyah wa gaal :
Ya sayyidna,
nitaabiʼak ayyi bakaan al-tamchi foogah.
20 Wa Isa radda leyah wa gaal :
Al-baʼachoom indah nugra wa l-teer indah uchch wa laakin Ibn al-Insaan ma indah bakaan yargud foogah.
21 Wa naadum aakhar min talaamiizah gaal :
Ya sayyidna,
antiini izin achaan namchi nadfin abuui.
Wa baʼad da naji nitaabiʼak.
22 Wa Isa radda leyah wa gaal :
Taʼaal taabiʼni hassaʼ wa khalli al-maytiin yadfunu maytiinhum.
Al-Masiih waggaf al-riih al-chadiide
23 Wa khalaas rikib fi l-markaba wa talaamiizah taabaʼooh.
24 Wa baʼadeen riih chadiide bilheen saagat foog al-bahar wa gawwamat challaal wa l-almi bada yamla al-markaba.
Wa Isa naayim.
25 Wa l-talaamiiz jo leyah wa gawwamooh min al-noom wa gaalo :
Ya sayyidna,
najjiina !
Aniina mutna !
26 Wa gaal leehum :
Iimaanku lissaaʼ daʼiif.
Maala takhaafo ?
Wa gamma foog wa kachcha le l-riih wa l-bahar.
Wa ajala ke,
al-wata bigat haadiye marra waahid.
27 Wa l-naas ajjabo wa gaalo :
Al-naadum da yaatu ?
Al-riih wa l-bahar kula yasmaʼo kalaamah !
Muchootiniin itneen ligo al-aafe
28 Wa baʼad Isa gataʼ al-bahar hu wisil fi daar al-Jadariyiin wa rujaal itneen marago min bakaan al-khubuur wa jo laagooh.
Wa humman muchootiniin wa mujrimiin bilheen wa l-naas khaafo minhum wa naadum waahid ma yagdar yamchi be l-derib da.
29 Wa ajala al-muchootiniin aato wa gaalo :
Ya Ibn Allah,
tidoor minnina chunu ?
Inta jiit achaan tiʼazzibna gubbaal al-Hisaab walla ?
30 Wa khanaaziir katiiriin gaaʼidiin basraho gariib leehum.
31 Wa l-chawaatiin gaalo le Isa :
Kan tidoor tatrudna,
khalaas,
rassilna fi l-khanaaziir dool.
32 Wa Isa gaal leehum :
Yalla amchu.
Wa marago min al-rujaal wa faato dakhalo fi l-khanaaziir.
Wa l-khanaaziir kulluhum jaro min juruf al-hajar wa wagaʼo fi l-bahar wa khalaas al-almi akalaahum.
33 Wa ruʼyaan al-khanaaziir jaro fi l-hille wa ooro akhwaanhum be kulla cheyy al-chaafooh wa kikkeef al-muchootiniin ligo al-aafe.
34 Wa naas al-hille kulluhum marago achaan yigaabulu Isa wa wakit ligooh,
chahadooh achaan yamrug min daarhum.