Ma tuluumu al-naas
7
Ma tuluumu al-naas achaan Allah ma yuluumku intu.
2 Achaan misil intu tuluumu al-naas,
misil da bas Allah yuluumku intu.
Hu yikiil leeku be nafs al-kiyaala al-intu tikiilu beeha le l-naas.
3 Kikkeef tichiif gechchaay fi een akhuuk wa laakin ma tichiif al-uud al-kabiir al-gaaʼid fi eenak inta ?
4 Walla kikkeef tuguul le akhuuk «
Khalliini nisill al-gechchaay min eenak »
wa l-uud lissaaʼ gaaʼid fi eenak ?
5 Ya munaafikh,
awwal ke sill al-uud al-fi eenak wa misil da tichiif adiil wa khalaas tagdar tisill al-gechchaay al-fi een akhuuk.
6 Ma tantu chokhol khaass le Allah le l-kulaab wa la tidaffugu cheyy jamiil le khanaaziir achaan al-khanaaziir yifajjukhuuh bas wa l-kulaab yigabbulu wa yaakuluuku.
Al-duʼa
7 Asʼalo min Allah wa hu yantiiku.
Fattuchu wa talgo.
Duggu baab hana Allah wa yinfatih leeku.
8 Achaan kulla naadum al-basʼal da,
Allah bantiih.
Wa ayyi naadum al-bifattich,
balga.
Wa ayyi naadum al-budugg baab Allah,
al-baab binfatih leyah.
9 Hal fi naadum minku kan wileedah batlub minnah eech,
bantiih hajar walla ?
10 Walla kan wileedah batlub minnah huutaay,
bantiih daabi ?
11 Sahiih,
intu muznibiin wa laakin taʼarfu kikkeef tantu chokhol sameh le iyaalku.
Wa akiid abuuku Allah akheer ziyaada minku.
Wa kikkeef hu ma yanti chokhol sameh le l-naas al-yasʼalooh ?
12 Wa khalaas,
al-cheyy al-tidooru al-naas yisawwuuh leeku,
da bas al-cheyy al-waajib tisawwuuh leehum.
Daahu zibdit kalaam al-Tawraat wa l-Nubuuwa.
Masal al-duruub al-itneen
13 Adkhulu be l-baab al-dayyig.
Achaan al-baab al-yiwaddi al-naas le Jahannam wasiiʼ wa derbah hayyin wa naas katiiriin yadkhulu beyah.
14 Wa l-derib al-yiwaddi al-naas le l-haya gaasi bilheen wa baabah dayyig marra waahid.
Wa naas chiyya bas yalgooh.
Masal iyaal al-chadar
15 Angarʼu min al-naas al-bisawwu nufuushum anbiya.
Yaju leeku daluuliin misil iyaal khanam wa laakin fi galibhum humman misil maraafiʼiin al-bidooru baakuluuku.
16 Taʼarfu nafar hana chadara min iyaalha wa taʼarfu al-kaddaabiin dool min khidmithum.
Al-naas yagtaʼo inab min chadara hana chook walla ?
Wa yagtaʼo iyaal al-jimmeez min al-direese walla ?
17 Wa misil da,
kulli chadara adiile talda iyaal adiiliin wa laakin al-chadara al-fasle talda iyaal fasliin.
18 Al-chadara al-adiile ma tagdar talda iyaal fasliin wa l-chadara al-fasle ma tagdar talda iyaal adiiliin.
19 Wa ayyi chadara al-ma talda iyaal adiiliin yagtaʼooha wa yazguluuha fi l-naar.
20 Wa khalaas,
misil taʼarfu al-chadar min iyaalhum,
taʼarfu al-naas dool min khidmithum.
Fi Yoom al-Hisaab
21 Ma kulla l-naas al-yinaaduuni «
Ya sayyidna,
ya sayyidna »
yadkhulu fi mamlakat Allah,
illa l-naas al-yisawwu muraadat abuui Allah yadkhulu.
22 Fi yoom al-Hisaab,
naas katiiriin yuguulu leyi «
Ya sayyidna,
ya sayyidna.
Aniina ma ballakhna be usmak kalaam Allah walla ?
Wa be usmak ma taradna chawaatiin walla ?
Wa be usmak ma sawweena ajaayib katiiriin walla ? »
23 Wa laakin niʼooriihum be kalaam waadih wa nuguul abadan ma iriftuku.
Yalla,
kussu minni baʼiid.
Khidmitku di charr bas.
Masal al-buyuut al-itneen
24 Ayyi naadum al-yasmaʼ kalaami da wa yitaabiʼah,
yabga misil raajil faahim al-bana beetah fi l-hajar.
25 Wa l-matar sabba wa l-seel ja wa l-riih saagat chadiid wa kulluhum darabo al-beet wa l-beet ma wagaʼ achaan gaʼarah fi l-hajar.
26 Wa ayyi naadum al-yasmaʼ kalaami da wa ma yitaabiʼah,
hu misil al-raajil al-ajami al-bana beetah fi l-sinyaaka.
27 Wa l-matar sabba wa l-seel ja wa l-riih saagat chadiid wa darabo al-beet daak.
Wa khalaas al-beet wagaʼ wa tilif marra waahid.