Al-sadakha
6
Awʼu baalku.
Kan tisawwu amal diinku giddaam al-naas achaan tidooru humman yichiifuuku bas,
da ma yanfaʼ.
Ma talgo ajur min abuuku Allah.
2 Wakit tanti sadakha le naadum miskiin,
ma tisawwi haraka katiire misil al-munaafikhiin.
Humman yantu sadakha fi buyuut al-sala wa fi l-chawaariʼ achaan al-naas yachkuruuhum.
Nuguul leeku al-hagg,
ma yalgo ajur illa l-chukur al-ligooh min al-naas.
3 Laakin inta wakit tanti sadakha,
ma tikhalli iidak al-isra taʼarif al-cheyy al-iidak al-zeene gaaʼide tisawwiih.
4 Wa misil da,
wakit tanti sadakha ma tikhalli naadum waahid yaʼarfah wa abuuk Allah al-yichiif al-cheyy al-naas ma yichiifuuh,
hu bas yantiik ajrak.
Al-sala
5 Wa wakit tisallu,
ma tisallu misil al-munaafikhiin.
Humman yiriidu yisallu fi buyuut al-sala wa fi l-chawaariʼ achaan al-naas bichiifuuhum.
Nuguul leeku al-hagg,
ma yalgo ajur illa l-chukur al-ligooh min al-naas.
6 Wa laakin inta wakit tidoor tisalli,
amchi daakhal fi beetak wa sidd derbak wa salli le Allah abuuk al-ma binchaaf.
Wa abuuk Allah al-bichiif al-cheyy al-naas ma bichiifuuh,
hu bas yantiik ajrak.
7 Wa wakit tisallu ma tiraddudu kalaam al-ma indah faayde misil al-naas al-ma baʼarfu Allah.
Fi fikirhum,
Allah ma yasmaʼ kalaamhum illa kan kalaamhum katiir.
8 Ma tabgo misilhum achaan al-cheyy al-intu tidooruuh,
Allah baʼarfah gubbaal ma tasʼalooh minnah.
9 Khalaas,
sallu misil al-sala di.
Ya Abuuna al-fi l-samaawaat,
majjid usmak al-khudduus.
10 Khalli mamlakatak taji.
Khalli yisawwu muraadaatak fi l-ard misil yisawwu muraadaatak fi l-sama.
11 Antiina al-yoom al-akil al-yitimmina.
12 Saamih leena khataana misil aniina nisaamuhu al-naas al-khito foogna.
13 Ma tiwaddiina fi l-bakaan al-yijarrib iimaanna,
laakin najjiina min charr Ibliis.
Wa l-mamlaka wa l-gudra wa l-majd hanaak inta bas daayman wa ila l-abad.
Aamiin.
14 Kan intu saamahtu al-naas al-khito foogku,
abuuku Allah yisaamihku.
15 Wa kan intu ma saamahtu al-naas al-khito foogku,
abuuku Allah ma yisaamih leeku khataayaaku.
Al-siyaam
16 Wa wakit tusuumu,
ma tarbutu wujuuhku misil al-munaafikhiin.
Humman yikarchumu wujuuhhum achaan yidooru al-naas yaʼarfu humman saaymiin.
Nuguul leeku al-hagg,
ma yalgo ajur illa l-chukur al-ligooh min al-naas.
17 Wa laakin inta da,
khassil wijhak wakit inta saayim,
wa massih raasak be itir misil naadum yiʼayyid
18 achaan naadum waahid ma yaʼarif inta saayim illa abuuk Allah al-ma binchaaf.
Wa abuuk Allah,
al-bichiif al-cheyy al-naas ma bichiifuuh,
hu bas yantiik ajrak.
Al-maal
19 Ma tudummu al-maal fi l-ard achaan hini fi l-ard al-arda wa l-sagar bitallufuuh wa l-saraariig yadkhulu yasurguuh.
20 Akheer tudummu al-maal fi bakaan Allah fi l-samaawaat.
Hinaak al-arda wa l-sagar ma bitallufuuh wa l-saraariig ma yadkhulu yasurguuh.
21 Achaan al-bakaan al-maalak gaaʼid foogah,
da bas al-bakaan al-galbak gaaʼid foogah.
22 Al-een hi faanuus hana l-jilid.
Kan eenak taybe*,
jildak kulla ke gaaʼid fi l-nuur.
23 Wa kan eenak talfaane,
inta gaaʼid fi l-dalaam.
Wa kan nuurak bigi adlam,
inta gaaʼid fi dalaam azrag marra waahid.
24 Ma mumkin naadum yabga abid le siyaad itneen.
Achaan hu yakrah al-waahid wa yiriid al-taani walla yihibbah le l-awwal be kulla galbah wa yahgir al-aakhar.
Wa intu kamaan ma tagdaro tabgo abiid le Allah wa abiid le l-maal.
Al-kalaam al-bukhuss al-hamm
25 Wa fi chaan da,
nuguul leeku ma tihimmu le hayaatku leechaan al-akil wa la leechaan al-churaab wa ma tihimmu le jilidku leechaan al-khulgaan.
Al-haya ma akheer min al-akil walla ?
Wa l-jilid ma akheer min al-khulgaan walla ?
26 Chiifu al-tuyuur wa fakkuru fiihum.
Humman ma yiteerubu wa la yahartu wa la yagtaʼo wa la yakhzunu wa laakin abuuku Allah yiʼayyichhum.
Wa intu ke ma akheer le Allah ziyaada min al-tuyuur walla ?
27 Wa kan naadum minku yihimm katiir bilheen kula,
al-hamm da yagdar yiziid umrah be saaʼa waahide walla ?
28 Wa maala tihimmu leechaan al-khulgaan ?
Chiifu al-nuwaar fi l-kadaade wa fakkuru kikkeef yugumm.
Ma yakhdim wa ma yisawwi kiswe.
29 Wa laakin nuguul leeku akiid al-malik Suleymaan zaatah fi darajatah al-kabiire abadan ma libis khalag jamiil misil jamaal al-nuwaar da.
30 Wa kan Allah yilabbis gechch al-kadaade be nuwaar jamiil wa l-gechch da gaaʼid al-yoom wa ambaakir yagtaʼooh wa yazguluuh fi l-naar,
akiid Allah yilabbisku intu.
Chiddu heelku intu al-iimaanku lissaaʼ daʼiif.
31 Khalaas,
ma tihimmu wa ma tasʼalo nufuusku «
Naakulu chunu ?
Nacharbo chunu ?
Nalbaso chunu ? »
32 Kulla naas al-dunya khaattiin baalhum fi l-achya dool wa abuuku Allah yaʼarif kulla cheyy al-intu tidooruuh.
33 Wa laakin intu gubbaal kulla cheyy,
khuttu baalku fi mamlakat Allah wa fi l-haal al-saalhe al-Allah bidoorha wa Allah yantiiku kulla cheyy hana hayaatku.
34 Ma tihimmu le kalaam hana ambaakir.
Ambaakir zaatah ke yihimm le nafsah.
Taʼab hana yoom waahid yakfi le yoom waahid.