Naas hana Mamlakat Allah
5
Wa wakit Isa chaaf al-naas al-katiiriin al-yidooru yasmaʼo kalaamah,
hu talaʼ fi l-hajar wa gaʼad tihit wa talaamiizah jo leyah.
2 Wa bada yiʼallimhum wa gaal :
3 Mabruuk le l-naas al-yaʼarfu nufuushum masaakiin giddaam Allah,
achaan mamlakat Allah hanaahum.
4 Mabruuk le l-naas al-haznaaniin,
Allah yantiihum al-salaam.
5 Mabruuk le l-naas al-daluuliin,
humman yawrusu al-ard.
6 Mabruuk le l-naas al-yidooru yabgo saalihiin misil al-jiiʼaan yidoor yaakul wa l-atchaan yidoor yachrab.
Allah yichabbiʼhum.
7 Mabruuk le l-naas al-yarhamo akhwaanhum,
humman yalgo rahma min Allah.
8 Mabruuk le l-naas al-galibhum taahir,
humman yichiifu Allah.
9 Mabruuk le l-naas al-yijiibu al-salaam,
Allah yajʼalhum iyaalah.
10 Mabruuk le l-naas al-yitaʼʼubuuhum fi chaan al-hagg,
Mamlakat Allah hanaahum.
Talaamiiz al-Masiih nuur wa mileh
11 Mabruuk leeku intu wakit al-naas yiʼayyuruuku wa yaturduuku wa be l-kidib yukhuttu foogku kalaam cheen achaan intu talaamiizi.
12 Afraho wa anbastu katiir achaan ajurku fi l-aakhira yabga kabiir bilheen.
Achaan awwal al-naas taʼʼabo misil da al-anbiya al-jo gubbaalku wa khalaas intu bigiitu misilhum.
13 Intu misil mileh le naas al-ard.
Wa kan taʼaam al-mileh bigi ma fiih,
chunu yigabbilah ?
Ma indah faayde wa khalaas yidaffuguuh barra wa l-naas yifajjukhuuh.
14 Wa intu nuur le naas al-dunya.
Kan hille kabiire gaaʼide fi raas hajar ma mumkin yilabbuduuha.
15 Wa l-naas ma yiwalluʼu faanuus wa yidissuuh fi tihit doozam laakin yukhuttuuh fi bakaan foog achaan yidaawi le kulla l-naas al-fi l-beet.
16 Wa misil da,
khallu nuurku yidaawi giddaam al-naas.
Wa khalluuhum yichiifu khidmitku al-samhe wa yachkuru abuuku Allah al-gaaʼid fi l-samaawaat.
Al-Masiih ma yibattil al-kutub
17 Ma tifakkuru ana jiit achaan nibattil al-Tawraat wa la kutub al-nubuuwa.
Ana ma jiit achaan nibattilhum,
laakin achaan nitammimhum.
18 Nuguul leeku al-hagg,
harif waahid ma yingachcha min al-Tawraat wa la nugtaʼ waahide kula lahaddi al-sama wa l-ard yabgo ma fiihum wa kulla cheyy yitimm.
19 Wa ayyi naadum al-yikhaalif wasiiye min al-wasaaya dool,
kan hi al-sakhayre kula,
wa yiʼallim akhwaanah yisawwu nafs al-cheyy,
yajʼalo al-naadum da al-sakhayyar fi mamlakat Allah.
Wa laakin al-naadum al-yitabbig al-wasaaya dool wa yiʼallimhum le akhwaanah,
yajʼalooh kabiir fi mamlakat Allah.
20 Wa nuguul leeku kan intu ma bigiitu saalihiin ziyaada min al-ulama wa l-Fariisiyiin,
abadan ma tadkhulu fi Mamlakat Allah.
Al-katil wa l-khadab
21 Wa simiʼtu Allah kallam le naas al-zamaan wa gaal <Ma taktul>
wa <Al-naadum al-katal waajib yichaaruʼuuh>.
22 Wa laakin ana nuguul leeku ayyi naadum al-khadbaan min akhuuh waajib yichaaruʼuuh.
Wa ayyi naadum al-yuguul le akhuuh «
inta ajami »,
waajib yigaddumuuh giddaam al-Majlis al-Kabiir.
Wa ayyi naadum al-yuguul le akhuuh «
inta jaahil »,
waajib yazguluuh fi naar Jahannam.
23 Wa kan taji fi bakaan al-ibaada achaan tigaddim dahiiye le Allah wa hinaak bas tifakkir kadar akhuuk indah muchkila maʼaak,
24 khalli al-bahiime al-tidoor tadbahha wa amchi ajala wa assaamaho maʼa akhuuk.
Wa baʼad da bas,
gabbil wa gaddim dahiiye le Allah.
25 Wa kan naadum mazluum foogak,
yalla assaamaho maʼaayah ajala wakit intu lissaaʼ fi l-derib wa gubbaal ma tawsulu fi bakaan al-chariiʼa.
Assaamaho maʼaayah gubbaal ma yiwaddiik le l-gaadi achaan al-gaadi ma yiwaddiik le l-boliis wa yakurbuuk wa yidissuuk fi l-sijin.
26 Nuguul leeku al-hagg.
Inta ma tamrug illa kan kaffeet kulla l-gurus al-yidooruuh minnak.
Al-zina wa l-talaag
27 Simiʼtu Allah gaal <Ma tazna>.
28 Wa laakin ana nuguul leeku ayyi raajil al-gaaʼid yichiif mara be chahwa,
hu zanaaha khalaas fi galbah.
29 Wa kan eenak al-zeene tidoor tamurgak min al-derib al-adiil,
sillaha.
Azgulha baʼiid minnak achaan kan waddart cheyy waahid min jildak akheer leek min yazgulu kulla jildak fi naar Jahannam.
30 Wa kan iidak al-zeene tidoor tamurgak min al-derib al-adiil,
agtaʼha.
Azgulha baʼiid minnak achaan kan waddart cheyy waahid min jildak akheer leek min yazgulu kulla jildak fi naar Jahannam.
31 Wa gaalo leeku kula <Ayyi naadum al-tallag martah waajib yantiiha chahaada hana l-talaag>.
32 Wa laakin ana nuguul leeku ayyi naadum al-yitallig martah ma be sabab hana l-zina yisawwiiha zannaaye.
Wa l-naadum al-yaakhud al-mara al-mutallaga yazna.
Kalaam al-haliife
33 Simiʼtu gaalo le naas al-zamaan <Ma tafchul haliiftak,
laakin al-cheyy al-inta gultah le Allah,
da bas waajib titimmah>.
34 Wa laakin ana nuguul leeku ma tahlif marra waahid wa la be l-sama achaan hu kursi Allah
35 wa la be l-ard achaan da bakaan rijileenah wa la be Madiinat al-Khudus achaan hi madiinat al-Malik al-aziim.
36 Wa ma tahlif be raasak achaan ma tagdar tisawwi suufaay waahide beeda walla zarga.
37 Kan kalaamak «
aywa »
guul «
aywa ».
Wa kan kalaamak «
la »,
guul «
la ».
Wa ayyi kalaam al-ziyaada min da jaayi min al-Cheetaan.
Een be een
38 Simiʼtu gaalo <Een be een wa sinn be sinn>.
39 Wa laakin ana nuguul leeku ma tigabbil al-fasil le l-naadum al-sawwa leek al-fasil.
Wa kan naadum daggaak fi chidgak al-zeene,
antiih al-isra kula.
40 Wa kan naadum yiwaddiik le l-chariiʼa achaan yichiil jawwaaniiytak,
khalaas khalliih yichiil jalaabiiytak kula.
41 Wa kan naadum jabbaraak achaan tiwaddi khumaamah kiilomitir waahid,
khalaas amchi maʼaayah kiilomitir itneen.
42 Wa kan naadum saʼal minnak chokhol,
antiih leyah.
Wa kan naadum yasʼal minnak deen,
ma tigabbilah yaabis.
Hibbu aduuku
43 Simiʼtu gaalo «
Hibb akhuuk wa akrah aduuk ».
44 Wa laakin ana nuguul leeku hibbu aduuku wa asʼalo be l-kheer Allah fi chaan al-naas al-yitaʼʼubuuku wa yaturduuku.
45 Wa kan tisawwu ke,
intu tabgo iyaal abuuku Allah.
Achaan hu yamrug al-harraay le l-naas al-fasliin wa le l-naas al-saalihiin kula wa yikhalli al-matar yusubb foog al-naas al-adiiliin wa foog al-naas al-ma adiiliin kula.
46 Wa kan tihibbu al-naas al-bihibbuuku bas,
ajurku chunu ?
Naas al-jamaarik al-fasliin dool ma bihibbu al-naas al-bihibbuuhum walla ?
47 Wa kan intu tisallumu akhwaanku bas,
intu ma tisawwu kheer ziyaada min ayyi naadum.
Al-kuffaar kula ma yisawwu nafs al-cheyy walla ?
48 Khalaas,
abgo naas ma induhum eeb misil abuuku Allah ma indah eeb.