Ibliis jarrab al-Masiih
4
Wa l-Ruuh al-Khudduus wadda Isa fi l-khala achaan Ibliis yijarribah.
2 Wa hu saayim leel wa nahaar arbaʼiin yoom wa baʼad da juuʼ sawwaah.
3 Wa Ibliis ja leyah wa gaal :
Kan sahiih inta Ibn Allah,
guul le l-hujaar al-dugaag dool yabgo leek akil.
4 Wa Isa radda leyah wa gaal :
Maktuub fi Kitaab Allah <Al-insaan ma yiʼiich be l-akil wiheedah laakin yiʼiich be kulli kilme al-maarge min khachum Allah>.
5 Wa Ibliis waddaah fi Madiinat al-Khudus wa khattah fi bakaan aali fi raas Beet Allah.
6 Wa gaal leyah :
Kan sahiih inta Ibn Allah,
nutt agaʼ tihit achaan fi l-Kitaab maktuub <Allah yirassil malaaʼikatah achaan yahfadook>
wa <Yichiiluuk fi iideenhum achaan rijileenak ma yintaggu fi hajar waahid>.
7 Wa Isa gaal leyah :
Wa kula maktuub fi l-Kitaab <Ma tijarrib Rabbak Allah>.
8 Wa Ibliis waddaah battaan wa khattah fi raas hajar tawiil bilheen wa wassaf leyah kulla l-mamaalik al-fi l-dunya wa darajithum.
9 Wa gaal le Isa :
Nantiik kulluhum ke kan inta tasjud giddaami wa taʼabudni.
10 Wa Isa gaal leyah :
Amchi minni baʼiid,
ya Cheetaan,
achaan maktuub fi l-Kitaab <Le Rabbak Allah bas tasjud wa hu wiheedah taʼabudah>.
11 Wa khalaas Ibliis khallaah wa malaaʼika jo saaʼadooh.
Al-Masiih bada khidimtah
12 Wa Yahya karabooh fi l-sijin.
Wa Isa simiʼ al-khabar da wa gabbal fi daar al-Jaliil.
13 Wa khalla hillit al-Naasira wa macha sakan fi hillit Kafar Naahuum al-gaaʼide fi jamb al-bahar fi daar Bani Zabuluun wa daar Bani Naftaali.
14 Wa macha hinaak achaan misil da,
al-kalaam al-Allah gaalah be khachum al-nabi Ichaʼya yitimm.
Al-nabi gaal
15 <Daar Bani Zabuluun wa daar Bani Naftaali fi derib hana l-bahar khaadi le bahar al-Urdun wa daar al-Jaliil,
daar al-ajaanib.
16 Al-naas al-gaaʼidiin fi l-dalaam chaafo deyy aziim wa l-naas al-gaaʼidiin fi daar al-moot wa fi dull hana l-moot,
nuur talaʼ fooghum>.
17 Wa min al-wakit daak Isa bada yiballikh kalaam Allah wa gaal :
Tuubu min zunuubku.
Mamlakat Allah garrabat.
Al-Masiih naada talaamiizah al-awwalaaniyiin
18 Wa wakit Isa raayikh fi khachum bahar al-Jaliil,
hu chaaf akhwaan itneen wa humman Simʼaan al-binaaduuh Butrus wa akhuuh Andareeyas.
Wa humman hawwaatiin wa gaaʼidiin yazgulu charakhum fi l-bahar achaan yakurbu huut.
19 Wa Isa gaal leehum :
Taʼaalu taabuʼuuni.
Awwal intu gaaʼidiin tikarrubu huut wa ana nisawwiiku hawwaatiin al-naas wa tikarrubuuhum le derib Allah.
20 Wa ajala ke khallo charakhum wa taabaʼooh.
21 Wa Isa macha giddaam chiyya wa battaan chaaf akhwaan itneen wa humman Yaakhuub wa Yuuhanna awlaad Zabadi wa humman gaaʼidiin fi l-markaba maʼa abuuhum wa gaaʼidiin yiʼaddulu charakhum.
Wa Isa naadaahum achaan yitaabuʼuuh.
22 Wa ajala ke khallo al-markaba wa khallo abuuhum wa taabaʼo Isa.
23 Wa Isa gamma raakh fi kulla bakaan hana daar al-Jaliil wa gaaʼid yiʼallim al-naas fi buyuut al-sala wa yiballikh leehum bichaarat mamlakat Allah wa gaaʼid yidaawi kulla l-naas al-mardaaniin wa l-taʼbaaniin.
24 Wa usmah talaʼ fi kulla balad al-Chaam wa naas jaabo leyah akhwaanhum al-maʼduuriin wa l-taʼbaaniin min ayyi marad.
Jaabo al-muchootiniin wa l-naas al-induhum amfitfit wa l-naas al-jilidhum mayyit wa daawaahum kulluhum.
25 Wa naas katiiriin marra waahid taabaʼooh.
Jo min daar al-Jaliil wa min al-Mudun al-Achara wa min Madiinat al-Khudus wa min daar al-Yahuudiiya wa min al-buldaan al-khaadi le bahar al-Urdun.