Kalaam al-nabi Yahya
3
Fi l-zaman daak,
al-nabi Yahya al-Mukhattis ja yiballikh kalaam Allah fi kadaade hana daar al-Yahuudiiya.
2 Wa gaaʼid yuguul :
Yalla,
tuubu min zunuubku achaan mamlakat Allah garrabat.
3 Wa Yahya hu al-naadum al-hajja beyah zamaan al-nabi Ichaʼya.
Wa l-nabi gaal <Hiss hana naadum gaaʼid binaadi fi l-khala wa buguul jahhuzu derib al-Rabb wa addulu leyah al-chawaariʼ>.
4 Wa Yahya laabis khalag min suuf al-albil wa raabit sulbah be farwa wa yaakul jaraad wa asal al-nahal.
5 Wa l-naas marago leyah min Madiinat al-Khudus wa min kulla daar al-Yahuudiiya wa min kulla l-hillaal al-jamb bahar al-Urdun.
6 Wa iʼtarafo be zunuubhum wa Yahya khattasaahum* fi bahar al-Urdun.
7 Wa Yahya chaaf ambeenaathum naas katiiriin min turukh al-Fariisiyiin wa l-Sadduukhiyiin.
Wa humman maachiin leyah achaan hu yikhattishum.
Wa gaal leehum :
Ya iyaal al-daabi !
Yaatu al-gaal leeku ajru min al-azaab al-jaayi ?
8 Sawwu al-amal al-yiwassif intu tubtu be l-sahiih.
9 Wa ma tukhuchchu nufuusku.
Ma tuguulu «
Ma indina eeb achaan aniina iyaal Ibraahiim ».
Nuguul leeku Allah yagdar yichiil hujaar min al-turaab wa yisawwi minhum iyaal le Ibraahiim fi badalku.
10 Chiifu,
al-faas jaahize le tagtaʼ al-chadara min irigha.
Ayyi chadara al-ma talda iyaal adiiliin yagtaʼooha wa yazguluuha fi l-naar.
11 Ana nikhattisku fi l-almi achaan intu tubtu min zunuubku wa laakin waahid jaayi waraayi gaadir minni bilheen wa ana ma tammeet leyah khaddaam kula.
Wa hu yikhattisku be l-Ruuh al-Khudduus wa be l-naar.
12 Wa indah tabag fi iideenah le yikharbil al-khalla.
Wa yilimm khallitah wa yusubbuha fi dabangitah.
Wa laakin al-uttaab yutuchchah fi l-naar al-ma tumuut abadan.
Al-Masiih khattasooh
13 Wa Isa marag min daar al-Jaliil wa macha fi bahar al-Urdun achaan Yahya yikhattisah.
14 Wa laakin Yahya bada yaaba wa gaal :
Waajib ana naji leek achaan inta tikhattisni wa kikkeef tidoor ana nikhattisak ?
15 Wa Isa gaal leyah :
Ma taaba.
Khalli yabga misil da achaan nitimmu kulla cheyy al-Allah bidoorah.