Al‑jawaab al‑taani le Kuruntus
min jawaabaat al‑rasuul Buulus
1
1 Jawaab minni ana Buulus rasuul Isa al‑Masiih be izin Allah.
Wa daahu naktib leeku maʼa akhuuna Timuutaawus.
Wa aniina nisallumuuku intu jamaaʼat al‑muʼminiin hana Allah al‑gaaʼidiin fi hillit Kuruntus wa le kulla l‑saalihiin al‑gaaʼidiin fi ayyi bakaan fi balad Akhaaya.
2 Aleekum al‑salaam wa l‑rahma min Allah abuuna wa Rabbina Isa al‑Masiih.
Al‑chajaaʼa fi l‑diige
3 Khalli nachkuru Allah abu Rabbina Isa al‑Masiih.
Hu abuuna al‑rahiim wa kulla l‑chajaaʼa jaaye minnah hu.
4 Wa Allah yichajjiʼna fi kulli diige achaan aniina kula be l‑chajaaʼa di nichajjuʼu al‑aakhariin al‑gaaʼidiin fi ayyi diige.
5 Wa sahiih,
aniina gaaʼidiin nichaaruku katiir fi taʼab al‑Masiih wa laakin be alaakhitna maʼaayah,
kula nalgo chajaaʼa ziyaada.
6 Kan aniina gaaʼidiin fi l‑diige,
da bigi achaan intu talgo al‑chajaaʼa wa l‑naja.
Wa kan Allah antaana al‑chajaaʼa,
da bigi achaan intu kula talgo al‑chajaaʼa wa tagdaro tahmalo al‑taʼab be sabur misilna.
7 Achamna foogku gawi bilheen achaan naʼarfu kadar tichaaruku fi l‑chajaaʼa misil awwal gaaʼidiin tichaaruku maʼaana fi l‑taʼab.
8 Ya akhwaani,
nidooru niʼarrufuuku be l‑diige al‑jaat foogna fi balad Aasiya.
Wa l‑diige di chadiide bilheen wa faatat gudritna lahaddi gulna mutna khalaas.
9 Wa fi l‑bakaan da,
bigiina misil naas al‑hakamo leehum be l‑moot.
Wa da bigi achaan ma nintaklu ale nufuusna laakin nintaklu ale Allah al‑yabʼas al‑maytiin.
10 Wa akiid Allah al‑fazaʼna min al‑moot da,
hu yafzaʼna battaan.
Khatteena achamna foogah hu bas wa akiid hu yafzaʼna battaan.
11 Wa intu kula waajib tiʼaawunuuna be duʼaaku.
Wa Allah yakhbal duʼaaku al‑katiir wa be sabab duʼaaku da,
hu yibaarikna wa khalaas naas katiiriin yachkuru Allah fi chaanna.
Taʼkhiir al‑ziyaara al‑taalta
12 Wa aniina farhaaniin achaan guluubna gaaʼidiin yiʼakkudu leena kadar ichna maʼa kulla naas al‑dunya wa khaassatan maʼaaku intu be galib abyad wa be niiye mukhlisa al‑Allah yarda beehum.
Ma ichna hasab fikir naas al‑dunya laakin ichna be rahmat Allah.
13 Wa abadan ma naktubu leeku illa l‑kalaam al‑waadih al‑tagdaro tagruuh wa tawwaali tafhamooh.
Wa ana nitmanna kadar tafhamo niiyitna tamaam.
14 Wa gult al‑kalaam da achaan intu lissaaʼku ma fihimtu niiyitna tamaam.
Wa kan fihimtu niiyitna,
khalaas fi yoom jayyit Rabbina Isa,
intu tifaachuru beena misil aniina nifaachuru beeku.
15 Wa akiid,
achami foogku bigi gawi.
Wa achaan da,
dawwart namchi leeku tawwaali wa nuzuurku wa talgo rahma marrateen.
16 Wa dawwart nakhchaaku awwal marra wakit ana maachi le Magiduuniya wa battaan wakit ana mugabbil minha.
Wa dawwart tisaaʼuduuni fi safari le daar al‑Yahuudiiya.
17 Wa kan dawwart namchi leeku misil da,
hal tuguulu ana chilt niiye bala fikir walla ?
Hal tuguulu ana nichiil niiye misil naas al‑dunya al‑buguulu « aywa » wa « la » fi nafs al‑wakit ?
18 Allah saadikh !
Kalaamna leeku abadan ma yabga « aywa » wa « la » fi nafs al‑wakit.
19 Achaan Ibn Allah Isa al‑Masiih al‑ana wa akhwaani Siila wa Timuutaawus ballakhnaaku beyah,
abadan ma yikhalbit « aywa » wa « la ».
Kalaamah daayman,
aywa.
20 Achaan kulla cheyy al‑Allah waaʼad beyah,
hu tammaah fi l‑Masiih.
Wa be l‑Masiih,
Allah yuguul « aywa ».
Wa be sabab da,
nuguulu aamiin be usmah wa nimajjudu Allah.
21 Wa Allah bas sabbataana maʼaaku fi alaakha maʼa l‑Masiih.
Wa hu bas al‑darrajaana le khidimtah.
22 Wa hu khatta foogna khitmah wa nazzal fi guluubna al‑Ruuh al‑Khudduus achaan yabga al‑damaan al‑yiwassifna kadar Allah yisawwi kulli cheyy al‑waaʼad beyah.