Jawaab le Khalaatiya
min jawaabaat al‑rasuul Buulus
Mugaddima
Be rahmatah al‑kabiire, Allah fatah derib al‑naja be l‑Masiih. Wa be da, Allah yisawwi al‑naas saalihiin be iimaanhum wa ma be tabbigiin churuut al‑Tawraat aw al‑wasaaya aw al‑gawaaniin al‑binlagu fi ayyi kitaab.
Al‑jawaab da, al‑rasuul Buulus rassalah le l‑Masiihiyiin al‑fi balad Khalaatiya al‑haaliiyan fi turaab Turkiya. Wa l‑naas dool aamano be l‑Masiih wakit Buulus wa Barnaaba macho leehum wa ballakho bichaarat al‑Masiih. Wa hillaalhum humman Antaakiya Bisiidiya wa Listara wa Darba wa Iguuniya. Wa l‑kalaam da maktuub fi Aʼmaal al‑Rusul fasul 13‑14. Wa ballakho leehum be moot al‑Masiih fi l‑saliib wa buʼaasah wa gaalo kan yiʼaamunu be l‑Masiih, Allah yakhfir leehum zunuubhum.
Laakin wakit Buulus wa Barnaaba macho giddaam, naas aakhariin jo le yiʼallumu al‑Masiihiyiin fi Khalaatiya. Wa l‑naas dool min al‑Yahuud al‑yuguulu humman muʼminiin be l‑Masiih laakin dawwaro kulla l‑muʼminiin yitaabuʼu churuut al‑Tawraat. Humman maʼruufiin be Hizib al‑Tahuura wa gaalo kan naadum ma mutahhar hasab al‑churuut dool, hu da abadan ma yanja.
Wa be gudrat al‑Ruuh al‑Khudduus, al‑rasuul Buulus katab al‑jawaab da. Hu fassar kadar al‑Yahuud zaathum ma bigo saalihiin be tabbigiin churuut al‑Tawraat. Allah yisawwi al‑naas saalihiin illa be iimaanhum be l‑Masiih. Achaan da, kan naadum yidoor yabga saalih be tabbigiin churuut al‑Tawraat, hu khalla derib al‑iimaan.
Wa Hizib al‑Tahuura haaliiyan bigi ma fiih laakin fi kulli wakit, fiyah naas misilhum. Yuguulu al‑iimaan be l‑Masiih wiheedah ma yakfi. Fi l‑iimaan, yiziidu wasaaya aw gawaaniin aw aadaat wa yuguulu beehum al‑naas yabgo saalihiin. Wa be da, humman bintaku fi gudrat al‑naas wa ma fi gudrat al‑Ruuh al‑Khudduus. Wa be l‑sahiih, Isa al‑Masiih ja fi l‑dunya wa maat fi l‑saliib wa baʼas achaan al‑naas yanjo wa yabgo iyaal Allah wa yiʼiichu be gudrat al‑Ruuh al‑Khudduus. Wa hu ma ja achaan yukhutt fooghum diin hana wasaaya aw gawaaniin aw aadaat.
Khalli ayyi naadum al‑yagri al‑kitaab da yalga niʼmat Allah fi l‑Masiih. Aamiin.