Jawaab le Afasus
min jawaabaat al‑rasuul Buulus
Mugaddima
Mahabbat Allah le l‑naas kabiire bilheen. Akiid, hu antaana rahma kabiire bilheen be l‑Masiih.
Al‑jawaab da, al‑rasuul Buulus katabah be gudrat al‑Ruuh al‑Khudduus wa be izin al‑Rabb. Wa katabah le l‑muʼminiin al‑fi hillit Afasus. Wa fi l‑zaman daak, Afasus hi hille kabiire bilheen wa aasima hana balad Aasiya. Wa naasha aabidiin asnaam. Wa laakin al‑rasuul Buulus macha ballakh foogha bichaarat al‑Masiih wa naas katiiriin bilheen aamano be l‑Masiih fi l‑hille wa fi l‑balad. Wa l‑taariikh hana khidmit Buulus fi Afasus binlagi fi Aʼmaal al‑Rusul fasul 19.
Wa l‑jawaab da, Buulus katabah achaan yiʼallim al‑muʼminiin wa yichajjiʼhum wakit hu gaaʼid fi l‑sijin. Wa hu gaaʼid fi l‑sijin achaan hu abadan ma wagaf min ballikhiin kalaam Allah wa l‑naas al‑ma dawwaro kalaam Allah khatto foogah tuhma be kidib.
Wa l‑rasuul Buulus rassal naadum min jamaaʼtah usmah Tichiikus achaan yisallim al‑muʼminiin wa yagri leehum al‑jawaab. Wa ma rassalah fi Afasus bas laakin fi hillaal aakhariin kula al‑induhum muʼminiin. Buulus katab leehum taʼliim aamm fi barakat Allah al‑tinlagi fi l‑Masiih wa l‑haal al‑waajbe le l‑naas al‑yitaabuʼu Allah. Wa hu akkad leehum kadar al‑Masiih gaadir min kulla hukkaam wa kubaaraat al‑chawaatiin al‑humman askar Ibliis wa min ayyi cheyy aakhar al‑khaayfiin minnah al‑naas. Wa wassaahum achaan yikhallu minhum marra waahid al‑zunuub wa yiʼiichu be haal saalhe be gudrat al‑Ruuh al‑Khudduus.
Wa khalli ayyi naadum al‑yagri kalaam al‑jawaab da yitaabiʼ taʼliimah wa yiʼiich fi l‑nuur. Aamiin.