Jawaab le Filibbi
min jawaabaat al‑rasuul Buulus
Mugaddima
Kalaam Allah yiwassifna kadar fi l‑dunya di, al‑muʼminiin daayman yalgo taʼab. Wa l‑jawaab da, al‑rasuul Buulus katabah wakit hu makruub fi l‑sijin. Wa katabah le talaamiizah al‑gaaʼidiin yatʼabo fi hillit Filibbi. Laakin ma indah chakwa wa la zaʼal. Hu chajjaʼaahum wa gaal khalli yafraho misil hu kula farhaan.
Wa hillit Filibbi gaaʼide fi balad Magiduuniya wa Allah rassal leeha al‑rasuul Buulus maʼa jamaaʼtah Siila wa Luukha wa Timuutaawus. Wa l‑rasuul Buulus ballakh foogha al‑bichaara wa naas waahidiin aamano wa bigo Masiihiyiin. Laakin fi l‑wakit daak, tujjaar waahidiin khaalafo Buulus wa harracho kubaaraat al‑hille achaan yitaʼʼubuuh taʼab chadiid. Wa kulla l‑kalaam da maktuub fi kitaab Aʼmaal al‑Rusul fasul 16.
Al‑muʼminiin al‑fi hillit Filibbi dool, al‑rasuul Buulus yaʼarifhum tamaam. Wa humman rassalo leyah waahid min akhwaanhum usmah Abfariid achaan yiwaddi leyah khabarhum wa yisaaʼidah fi l‑sijin. Wa be da, Buulus simiʼ kadar kubaaraat al‑hille gaaʼidiin yitaʼʼubu al‑muʼminiin battaan. Wa hu kula simiʼ khabar hana mukhaasama ambeen waahidiin min al‑muʼminiin. Wa achaan da, hu katab leehum al‑jawaab da be gudrat al‑Ruuh al‑Khudduus wa rassalah be iid Abfariid. Wa fi l‑jawaab da, hu ooraahum kadar Allah yisaaʼidhum fi l‑taʼab wa waajib yasburu wa yafraho be Rabbuhum al‑Masiih. Wa allamaahum kadar ayyi muʼmin waajib yitaabiʼ masal hana Isa al‑Masiih wa yabga daluul le akhwaanah wa ma yisawwi nafsah aali. Wa ooraahum kikkeef yiʼiichu be mahabba wa farah wa salaam.
Al‑naadum al‑yagri al‑jawaab da, khalli yaʼarif salaam Allah al‑faayit kulla cheyy. Aamiin.