Jawaab le Kuluusi
min jawaabaat al‑rasuul Buulus
Mugaddima
Al‑hamdulillah, Allah bas siid al‑naja wa l‑gudra wa l‑nuur wa l‑baraka. Wa hu rassal Ibnah Isa al‑Masiih achaan yinajji al‑naas wa yiwaddiihum fi mamlakatah al‑majiide.
Wa l‑jawaab da, al‑rasuul Buulus katabah le l‑muʼminiin al‑fi hillit Kuluusi. Al‑hille di gaaʼide fi turaab hana Afasus laakin al‑rasuul Buulus abadan ma macha leeha. Al‑naadum al‑ballakh foogha al‑bichaara usmah Abfuraas. Hu simiʼ kalaam Allah min khachum Buulus wa bigi tilmiizah. Wa ballakh al‑bichaara fi hillit Kuluusi wa fi l‑hillaal al‑gaaʼidiin gariib leeha al‑asaameehum Laawdikiiya wa Hiraabulus. Wa zamaan, al‑naas dool ma irfo cheyy fi kalaam Allah.
Wa fi l‑hillaal dool, naas waahidiin dawwaro yikhalbutu kalaam al‑Masiih maʼa kalaam falsafithum. Wa humman gaaʼidiin yilimmu fi falsafithum di kalaam asnaamhum wa aadaat al‑Yahuud wa kalaam hana l‑ruʼya al‑gaalo chaafooha. Yuguulu al‑naas waajib yaʼabudu khuwwaat al‑sama misil al‑malaaʼika wa l‑junuun. Wa l‑naas dool yuguulu al‑Masiih hu waahid min al‑jamaaʼa dool. Wa taʼliim al‑naas dool gaaʼid yibarjil al‑muʼminiin. Wa achaan da, Abfuraas saafar wa macha le Buulus fi l‑sijin be khabar hana Kuluusi. Wa fi l‑bakaan da, al‑rasuul katab leehum al‑jawaab da be gudrat al‑Ruuh al‑Khudduus wa zakkaraahum kadar al‑Masiih akbar min ayyi cheyy al‑Allah khalagah wa barakat Allah kullaha ke tinlagi fi l‑Masiih. Wa zakkaraahum battaan be l‑haal al‑waajbe le l‑naas al‑dakhalo fi mamlakat al‑nuur.
Khalli ayyi naadum al‑yagri al‑jawaab da yalga al‑baraka al‑kaamile al‑jaat be l‑Masiih. Aamiin.