Jawaabaat le Tasaluuniiki
min jawaabaat al‑rasuul Buulus
Mugaddima
Subhaan Allah wa l‑hamdulillah, Allah rassal Isa al‑Masiih achaan yinajji kulla l‑naas. Wa khidmit al‑Masiih ma kammalat. Hu gaaʼid yakhdim fi l‑dunya be waasitat khaddaamiinah wa fi l‑akhiir, hu yigabbil fi l‑ard.
Al‑naas al‑awwal ballakho bichaarat al‑Masiih fi Tasaluuniiki, humman al‑rasuul Buulus wa Timuutaawus wa Siila. Wa Tasaluuniiki hi hille kabiire fi balad Magiduuniya. Hi gaaʼide lahaddi l‑yoom wa haaliiyan fi balad al‑Yuunaan. Humman ballakho al‑bichaara le l‑Yahuud talaata usbuuʼ lahaddi al‑Yahuud taradoohum min beet al‑sala. Wa baʼad da, ballakho al‑bichaara le l‑Yuunaaniyiin wa katiiriin minhum aamano be Isa al‑Masiih. Laakin al‑Yahuud al‑ma aamano harracho naas al‑hille wa sawwo fitne. Wa be da, al‑muʼminiin zaathum gammo marago Buulus min al‑hille. Wa l‑kalaam da gaaʼid fi kitaab Aʼmaal al‑Rusul fasul 17 aaya 1‑8.
Wa Buulus macha le madiinat Atiina wa min hinaak, hu rassal Timuutaawus battaan fi Tasaluuniiki achaan yalga khabar al‑muʼminiin. Wakit Timuutaawus gabbal min Tasaluuniiki, jaab le Buulus al‑khabar. Gaal kadar naas al‑hille gaaʼidiin yitaʼʼubu al‑muʼminiin laakin al‑muʼminiin gaaʼidiin saabtiin fi iimaanhum. Wa fi l‑wakit da bas, Buulus katab leehum be gudrat al‑Ruuh al‑Khudduus al‑jawaab al‑awwal da achaan yichajjiʼhum wa yiʼallimhum. Wa baʼad wakit chiyya bas, ligi minhum radd. Wa khalaas katab leehum al‑jawaab al‑taani.
Al‑taʼliim al‑fi l‑jawaabaat al‑itneen dool bukhuss al‑haal al‑waajbe le l‑muʼminiin wa l‑sabur al‑waajib fi l‑taʼab. Wa l‑jawaabaat yihajju fi l‑yoom al‑akhiir wa jayyit Naakir al‑Hagg wa jayyit al‑Masiih al‑taaniye wa buʼaas al‑muʼminiin.
Khalli ayyi naadum al‑yagri al‑jawaabaat dool yasʼal min Allah rahmatah wa niʼmatah achaan yafham al‑kalaam al‑maktuub fooghum wa yitabbigah adiil. Aamiin.