Chaawuul gamma taʼʼab al‑Masiihiyiin
8
1 Wa Chaawuul muwaafig be katil Istifaan.
Wa fi nafs al‑yoom bas,
al‑naas gammo yitaʼʼubu ummat al‑Masiih fi Madiinat al‑Khudus taʼab chadiid.
Wa kulla l‑akhwaan jaro min al‑madiina wa chatto fi l‑kadaade hana daar al‑Yahuudiiya wa daar al‑Saamira.
Wa illa l‑rusul faddalo fi l‑madiina.
2 Wa rujaal takhiyiin chaalo Istifaan wa dafanooh.
Wa hizno leyah katiir wa faracho leyah.
3 Wa laakin Chaawuul dawwar yidammir ummat al‑Masiih marra waahid wa gamma andassa beet le beet achaan yakrub rujaal wa awiin wa yidissuhum fi l‑sijin.
Filibbus fi l‑Saamira
4 Wa l‑muʼminiin al‑chatto fi ayyi bakaan gaaʼidiin yiballukhu al‑bichaara le kulla l‑naas.
5 Wa Filibbus macha fi hille kabiire fi daar al‑Saamira wa gamma yiballikh le l‑naas be bichaarat al‑Masiih.
6 Wa naas katiiriin lammo be niiye waahide le yasmaʼo kalaamah achaan waahidiin minhum simʼo be l‑ajaayib wa waahidiin minhum chaafoohum be uyuunhum.
7 Wa Filibbus gaaʼid yaamur al‑chawaatiin achaan yamurgu min al‑naas wa l‑chawaatiin yasrakho be hiss chadiid wa yamurgu minhum.
Wa gaaʼid yidaawi naas maʼduuriin katiiriin wa minhum al‑mukarsahiin wa l‑uruj.
8 Wa kulla naas al‑hille firho bilheen.
9 Wa fi l‑hille di,
fiyah naadum waahid usmah Siimuun wa hu sahhaari.
Wa min wakit tawiil,
naas al‑Saamira gaaʼidiin yilʼajjabo foogah.
Wa hu gaaʼid yuguul leehum hu naadum muhimm bilheen.
10 Wa kulla l‑naas,
al‑sukhaar wa l‑kubaar,
yasmaʼo kalaamah wa yuguulu :
« Hu gudrat Allah al‑Aziim. »
11 Wa yasmaʼo kulla kalaamah achaan min zamaan humman yilʼajjabo foogah bilheen min al‑sihir al‑hu yisawwiih.
12 Wa Filibbus bachcharaahum be Isa al‑Masiih wa mamlakat Allah wa l‑Saamiriyiin aamano be kalaamah.
Wa humman jo le Filibbus,
rujaal wa awiin,
achaan hu yikhattishum.
13 Wa Siimuun kula aaman wa Filibbus khattasah.
Wa ayyi bakaan al‑Filibbus yamchi foogah,
Siimuun yamchi maʼaayah wa hu chaaf al‑ajaayib wa l‑alaamaat al‑Filibbus gaaʼid yisawwiihum wa hu alʼajjab marra waahid.
14 Wa l‑rusul fi Madiinat al‑Khudus simʼo kadar naas al‑Saamira aamano be kalaam Allah wa rassalo leehum Butrus wa Yuuhanna.
15 Wa wakit wislo fi l‑Saamira,
saʼalo Allah achaan al‑Ruuh al‑Khudduus yanzil fi l‑muʼminiin.
16 Wa l‑Ruuh al‑Khudduus lissaaʼ ma nazal fooghum achaan khattasoohum be usum al‑Rabb Isa bas.
17 Wa khalaas,
wakit al‑rusul khatto iideehum fi l‑muʼminiin,
al‑Ruuh al‑Khudduus nazal fooghum.
18 Wakit Siimuun chaaf al‑rusul khatto iideehum fi l‑naas wa l‑Ruuh al‑Khudduus nazal fooghum,
hu ja le l‑rusul achaan yantiihum gurus.
19 Wa Siimuun gaal leehum :
« Leyi ana kula antuuni gudra achaan al‑Ruuh al‑Khudduus yanzil fi ayyi naadum al‑nukhutt iideeni foogah. »
20 Wa Butrus radda leyah wa gaal :
« Inta wa gursak kula hatab al‑naar achaan inta fakkart tagdar tachri be gursak barakat Allah !
21 Inta ma tagdar tichaarik fi l‑khidme di wa la indak hagg achaan galbak ma mukhlis giddaam Allah.
22 Tuub min fasaaltak di wa asʼal Rabbina.
Akuun yakhfir leek fikrak al‑fasil da.
23 Naʼarif kadar inta malaan be l‑charr wa mugayyad fi l‑zunuub. »
24 Wa Siimuun gaal :
« Asʼalo leyi Rabbina achaan al‑cheyy al‑gultuuh ma yaji foogi. »
25 Wa Butrus wa Yuuhanna ballakho bichaarat al‑Rabb le naas al‑Saamira wa chahado le l‑Masiih.
Wa baʼad da,
gabbalo fi Madiinat al‑Khudus.
Wa wakit humman maachiin fi deribhum,
ballakho al‑bichaara fi hillaal katiiriin hana daar al‑Saamira.
Filibbus wa l‑Habachi
26 Wa baʼad da,
waahid min malaaʼikat Allah ja le Filibbus wa gaal :
« Gumm amchi ale jiihat al‑wati wa chiil al‑derib al‑yuchugg al‑kadaade min Madiinat al‑Khudus lahaddi hillit Khazza. »
27 Wa Filibbus gamma macha wa ligi naadum waahid khasi min al‑Habacha.
Hu khaddaam hana Kandaake malikat al‑Habacha wa hu waziir al‑maal.
Wa l‑khaddaam da macha Madiinat al‑Khudus achaan yaʼabud Allah.
28 Wa wakit mugabbil fi baladah,
hu raakib fi arabatah wa gaaʼid yagri fi kitaab al‑nabi Ichaʼya.
29 Wa l‑Ruuh al‑Khudduus kallam le Filibbus wa gaal :
« Amchi giddaam wa ruukh jamb al‑arabiiye. »
30 Wa Filibbus macha ajala wa lihig al‑arabiiye wa simiʼ al‑kalaam al‑hu yagriih al‑gaaʼid fi kitaab al‑nabi Ichaʼya.
Wa Filibbus saʼalah wa gaal :
« Inta tafham al‑kalaam al‑gaaʼid tagriih walla ? »
31 Wa l‑Habachi radda leyah wa gaal :
« Kikkeef nafham al‑kalaam da kan naadum ma yifassirah leyi ?
» Wa hu azam Filibbus achaan yarkab fi l‑arabiiye wa yagood maʼaayah.
32 Wa fi l‑kitaab al‑gaaʼid yagriih,
hu lihig al‑aaya al‑tuguul :
﴾Misil hamal al‑yiwadduuh le l‑dabih
wa misil naʼaje saakte wakit yigassusu suufha,
hu kula ma fakka khachmah.
33 Naas ayyabooh
wa ma antooh al‑hagg fi l‑chariiʼa.
Wa yaatu yihajji be zurriiytah ?
Achaan fasalooh min al‑hayyiin fi l‑ard.﴿*
34 Wa l‑khasi saʼal Filibbus wa gaal :
« Fi l‑kalaam da,
al‑nabi yihajji be yaatu ?
Yihajji be nafsah walla be naadum aakhar ? »
35 Wa Filibbus hajja leyah wa bada be kalaam al‑kitaab da wa ballakh leyah bichaarat Isa.
36 Wa wakit humman maachiin fi l‑derib,
wislo fi bakaan indah almi wa l‑Habachi gaal :
« Chiif,
daahu almi.
Chunu al‑yadharni ma tikhattisni ? »
37 Wa Filibbus radda leyah wa gaal :
« Nikhattisak kan aamant be kulla galbak.
» Wa hu gaal :
« Ana muʼmin be Isa al‑Masiih.
Hu Ibn Allah. »
38 Wa l‑Habachi waggaf al‑arabiiye wa nazalo minha wa dakhalo fi l‑almi wa Filibbus khattasah.