Istifaan hajja le l‑majlas
7
1 Wa kabiir rujaal al‑diin saʼal Istifaan wa gaal :
« Kalaamhum da sahiih walla ? »
2 Wa Istifaan radda leyah wa gaal :
« Ya l‑akhwaan wa l‑abbahaat,
asmaʼo kalaami.
Allah al‑Majiid baan le jiddina Ibraahiim wakit hu gaaʼid fi balad been al‑Nahreen gubbaal ma macha fi hillit Haaraan.
3 Wa Allah gaal leyah :
‹ Amrug min baladak wa min ahalak wa amchi fi l‑balad al‑niwassifha leek. ›*
4 « Wa Ibraahiim marag min daar al‑Kaldaaniyiin wa sakan fi Haaraan wa gaʼad hinaak lahaddi abuuh maat.
Wa Allah jaabah fi l‑balad di al‑intu hassaʼ saakniin foogha.
5 Wa fi l‑balad di,
Allah ma antaah ard warasa wa la bakaan sakhayyar yukhutt foogah rijileenah kula.
Wa laakin Allah waaʼadah wa gaal yanti al‑balad di warasa leyah hu wa le iyaalah.
Wa fi l‑wakit da,
Ibraahiim ma indah wileed waahid kula.
6 Wa Allah kallam le Ibraahiim wa gaal leyah kadar zurriiytah yabgo ajaanib wa yaskunu fi balad al‑ma hintuhum.
Wa siyaad al‑balad di yiʼabbuduuhum wa yidaayuguuhum muddit 400 sana.
7 Wa Allah gaal :
﴾Ana niʼaakhib al‑umma al‑tiʼabbidhum wa baʼad da,
zurriiytak yamurgu wa yaʼabuduuni fi l‑bakaan da.﴿*
8 « Wa Allah sawwa muʼaahada hana tahuura maʼa Ibraahiim.
Wa be sabab da,
Ibraahiim tahhar Ishaakh baʼad tamaane yoom min waaluudtah.
Wa Ishaakh tahhar wileedah Yaakhuub wa Yaakhuub tahhar awlaadah al‑atnaachar al‑bigo juduudna.
9 Wa juduudna anhasado fi akhuuhum Yuusuf wa baaʼooh wa hu bigi abid fi Masir.
Wa laakin Allah gaaʼid maʼaayah
10 wa najjaah min kulla l‑taʼab al‑ja foogah.
Wa Allah antaah rahma wa hikma achaan ligi rida min Firʼoon malik Masir.
Wa be da,
Firʼoon darraj Yuusuf haakim fi Masir wa kallafah be masʼuuliiyit kulla beetah.
11 « Wa baʼad da,
al‑juuʼ dakhal fi Masir wa balad Kanʼaan wa juduudna taʼbaaniin bilheen wa l‑maʼaach bigi ma fiih.
12 Wa Yaakhuub simiʼ khabar yuguulu al‑Masriyiin induhum gameh wa rassal juduudna awwal marra hinaak.
13 Wa wakit macho taani marra,
Yuusuf ooraahum hu akhuuhum.
Wa fi l‑wakit da bas,
Yuusuf gaddam akhwaanah le Firʼoon.
14 Wa baʼad da,
Yuusuf naada abuuh Yaakhuub wa akhwaanah wa iyaalhum achaan yaju fi Masir wa humman 75 naas.
15 Wa be misil da,
Yaakhuub wa juduudna jo fi Masir wa sakano foogha lahaddi maato.
16 Wa khalaas,
waddo udaamhum fi hillit Chakiim wa dafanoohum fi l‑khabur al‑Ibraahiim charaah be fudda min Bani Hamuur fi Chakiim.
17 « Wa l‑wakit al‑Allah yidoor yitimm foogah al‑waʼad al‑antaah le Ibraahiim garrab.
Wa Bani Israaʼiil gaaʼidiin yiziidu fi Masir wa adadhum bigi katiir ziyaada.
18 Wa fi l‑wakit daak,
malik jadiid rikib fi Masir wa hu ma irif cheyy fi Yuusuf.
19 Wa khachchaahum le gabiilitna wa zalamaahum le juduudna wa jabaraahum achaan yikhallu atfaalhum barra le yumuutu.
20 Wa fi l‑wakit da bas,
wildo Muusa wa hu wileed jamiil marra waahid giddaam Allah.
Wa ammah wa abuuh rabbooh fi beethum talaata chahar.
21 Wa fi l‑akhiir,
waajib yamurguuh min beethum wa bineeyit Firʼoon chaalatah achaan yabga wileedha wa rabbatah misil wileedha.*
22 Wa hu allam kulla ilim al‑Masriyiin lahaddi bigi naadum chadiid fi kalaamah wa fi khidimtah.
23 « Wa wakit Muusa umrah tamma 40 sana,
chaal niiye achaan yamchi yichiif akhwaanah Bani Israaʼiil.
24 Wa chaaf Masri waahid gaaʼid yitaʼʼib waahid minhum.
Wa Muusa daafaʼ le akhuuh al‑mazluum achaan yansurah wa katal al‑Masri.
25 Wa fi fikrah akhwaanah yafhamo kadar Allah rassalah achaan yinajjiihum be iidah.
Wa laakin humman ma fihmo.
26 « Wa ambaakir,
hu ligi naaseen min akhwaanah gaaʼidiin yiddaawaso.*
Wa hu dawwar humman yissaamaho ambeenaathum wa gaal :
‹ Intu akhwaan wa maalku tiddaawaso ? ›
27 Laakin al‑naadum al‑yitaʼʼib al‑aakhar lazza Muusa wa gaal :
‹ Yaatu khattaak foogna haakim wa gaadi ?
28 Walla tidoor taktulni misil amis katalt al‑Masri da ? ›
29 Wa wakit Muusa simiʼ al‑kalaam da,
hu jara min Masir wa macha bigi ajnabi fi balad Midyaan.
Wa wakit saakin hinaak,
wilid awlaad itneen.
30 « Wa baʼad 40 sana,
Muusa gamma macha fi sahara hana jabal Siinaaʼ wa waahid min al‑malaaʼika baan leyah fi naar fi lubb chideere.*
31 Wa wakit Muusa chaafah,
hu ajjab bilheen wa garrab le l‑chideere achaan yichiifah adiil.
Wa khalaas,
hiss Allah ansamaʼ.
32 Wa Allah gaal :
‹ Ana Allah Rabb juduudku Ibraahiim wa Ishaakh wa Yaakhuub.
› Wa Muusa rajaf wa khaaf khoof chadiid wa ma dawwar yichiifah.
33 Wa Allah kallam leyah wa gaal :
‹ Sill niʼleek min rijileenak achaan al‑bakaan al‑inta waagif foogah da ard mukhaddasa.
34 Ana chift al‑taʼab al‑chadiid hana chaʼabi al‑gaaʼidiin fi Masir wa ana simiʼt siraakhhum wa nazalt achaan ninajjiihum.
Wa hassaʼ taʼaal,
nirassilak inta fi Masir.
› »
35 Wa Istifaan gaal :
« Muusa da,
hu al‑naadum al‑akhwaanah abooh ma khiblooh wa l‑gaalo leyah :
‹ Yaatu khattaak foogna haakim wa gaadi.
› Wa laakin hu bas al‑naadum al‑Allah rassalah achaan yabga haakimhum wa munajjiihum min al‑Masriyiin be musaaʼadat al‑malak al‑baan leyah fi l‑chideere.
36 Wa hu maragaahum min Masir.
Wa fi muddit 40 sana,
sawwa ajaayib wa alaamaat kubaar fi balad Masir wa fi l‑bahar al‑Ahmar wa fi l‑sahara.
37 « Wa Muusa da,
hu al‑kallam le Bani Israaʼiil wa gaal :
﴾Baʼadeen Allah yigawwim leeku min akhwaanku nabi misli ana.﴿*
38 Wa wakit jamaaʼat Bani Israaʼiil laammiin fi l‑sahara,
Muusa bas al‑wasiit ambeen juduudna wa l‑malak al‑kallam maʼaayah fi jabal Siinaaʼ.
Leyah hu bas,
Allah nazzal kalaam al‑haya achaan yantiih leena.
39 « Wa laakin juduudna abo ma simʼooh.
Humman ma dawwaro yitaabuʼuuh.
Wa fi guluubhum dawwaro yigabbulu fi Masir.
40 Wa hajjo le Haaruun wa gaalo :
‹ Asnaʼ leena asnaam wa khalliihum yuguuduuna fi l‑derib,
achaan ma naʼarfu al‑cheyy al‑bigi le Muusa al‑maragaana min balad Masir. ›
41 Wa fi l‑wakit da,
sanaʼo al‑sanam al‑yichaabih ijil.
Wa gaddamo leyah dahiiye wa ayyado be farha giddaam al‑cheyy al‑humman bas sawwooh.
42 Wa Allah kassa minhum wa khallaahum yaʼabudu khuwwaat al‑sama.
Wa da maktuub fi kitaab al‑anbiya al‑buguul :
﴾Ya Bani Israaʼiil,
fi muddit 40 sana fi l‑sahara,
gaddamtu dahaaya wa hadaaya leyi ana walla ?
43 La,
abadan !
Fi l‑sahara,
intu chaayliin kheemat al‑ibaada hana Muulak
wa chaayliin ilaahku najmat Rafaan.
Dool al‑asnaam al‑sanaʼtuuhum
achaan tasjudu leehum.
Wa be sabab da,
niwaddiiku fi l‑khurba
khaadi le balad Baabil.﴿*
44 « Wa fi l‑sahara,
juduudna chaalo maʼaahum al‑kheema al‑foogha liihaan al‑muʼaahada.
Di al‑kheema al‑Muusa banaaha misil Allah amarah beyah.
Wa hu banaaha misil al‑nizaam al‑Allah wassafah.
45 Wa baʼad da,
Yachuuʼ wa juduudna jaabo kheemat al‑ibaada al‑foogha al‑sanduug fi l‑balad di wakit dakhalo foogha wa malakooha.
Wa Allah tarad kulla l‑gabaayil al‑saakniin foogha min giddaamhum.
Wa l‑kheema di gaaʼide lahaddi zaman Dawuud.
46 « Wa Allah ridi be Dawuud wa Dawuud talab izin achaan yabni beet gawi le Allah Rabb Bani Yaakhuub.
47 Wa fi l‑akhiir,
wileedah Suleymaan bana beet Allah.
48 Wa laakin Allah al‑Aali ma saakin fi buyuut al‑banoohum al‑naas.
Achaan da,
kitaab al‑nabi buguul :
49 ﴾Daahu Allah gaal :
Al‑sama archi
wa l‑ard bakaan nukhutt rijileeni.
Hal tagdaro tabnu beet al‑yichiilni ?
Walla tagdaro tabnu leyi bakaan le l‑raaha ?
50 Kulla cheyy al‑gaaʼid,
ana bas al‑khalagtah.﴿
»*
51 Wa Istifaan gaal :
« Ya l‑naas al‑aasiyiin !
Guluubku gawiyiin wa ma tidooru tasmaʼo kalaam Allah !
Intu daayman taʼaso al‑Ruuh al‑Khudduus.
Intu tisawwu nafs al‑cheyy misil juduudku sawwooh.
52 Ween al‑nabi al‑juduudku ma taʼʼabooh ?
Humman katalo al‑anbiya al‑ballakho leehum be jayyit abdah al‑saalih al‑Masiih wa wakit al‑Masiih ja khalaas,
intu khuntuuh wa kataltuuh !
53 Intu bas al‑naas al‑Allah nazzal leeku al‑Tawraat be waasitat al‑malaaʼika wa laakin ma taabaʼtu kalaamah ! »
Moot Istifaan
54 Wa wakit naas al‑majlas simʼo kalaam Istifaan,
khidbo khadab chadiid wa addo sunuunhum min al‑zaʼal diddah.
55 Wa Istifaan anmala be l‑Ruuh al‑Khudduus wa rafaʼ raasah wa gaaʼid yichiif foog fi l‑sama.
Wa hu chaaf majd Allah wa Isa waagif jamb Allah fi nussah al‑zeenaay.
56 Wa Istifaan gaal :
« Ana chaayif al‑sama faatih wa chaayif Ibn al‑Insaan waagif jamb Allah fi nussah al‑zeenaay ! »
57 Wa l‑naas awwo be hiss chadiid wa ayyi waahid minhum sadda adaanah be iideenah wa kulluhum gammo hajamooh.
58 Wa maragooh barra min al‑madiina wa gammo yarjumuuh.
Wa l‑chuhuud al‑gaaʼidiin yarjumuuh* sallo khulgaanhum al‑barraaniyiin wa khalloohum maʼa sabi usmah Chaawuul le yahrishum.