Hanaaniiya wa Safiira
5
1 Wa raajil waahid usmah Hanaaniiya indah zereʼ.
Wa chaawar martah al‑usumha Safiira wa humman astafago.
Wa hu baaʼ al‑zereʼ
2 wa chaal nuss taman al‑zereʼ le nafsah wa sallam al‑gurus al‑faddal le l‑rusul fi chaan al‑akhwaan.
Wa gaal da bas tamanah.
Wa kulla cheyy al‑sawwaah da,
martah irfatah.
3 Wa Butrus saʼalah wa gaal :
« Ya Hanaaniiya,
maalak khalleet al‑Cheetaan yalʼab be aglak ?
Maalak kadabt le l‑Ruuh al‑Khudduus wa chilt le nafsak nuss taman al‑zereʼ ?
4 Kan awwal ma biʼtah,
kulla l‑zereʼ da hanaak.
Wa baʼad biʼtah kula,
kan dawwart tichiil kulla l‑gurus hu hanaak halaalak.
Maala chilt niiye le takdib ?
Be misil da,
ma kadabt le l‑naas.
Inta kadabt le Allah ! »
5 Wa wakit Hanaaniiya simiʼ al‑kalaam da,
hu wagaʼ fi turaab wa maat.
Wa l‑khoof dakhal le kulla l‑naas al‑simʼo al‑khabar da.
6 Wa waahidiin min al‑subyaan kaffano Hanaaniiya wa waddooh fi l‑khubuur wa dafanooh.
7 Wa gariib talaata saaʼaat baʼad da,
marit Hanaaniiya jaat wa hi ma irfat al‑cheyy al‑bigi.
8 Wa Butrus saʼalaaha wa gaal :
« Ooriini,
da bas taman al‑zereʼ kulla ke walla ?
» Wa hi raddat leyah wa gaalat :
« Aywa,
da bas al‑gurus. »
9 Wa Butrus gaal leeha :
« Maala astafagti maʼa raajilki achaan tijarrubu Ruuh Allah ?
Asmaʼe al‑haraka di.
Dool al‑subyaan jaayiin fi khachum al‑beet.
Humman dafano raajilki wa yiwadduuki inti kula ! »
10 Wa tawwaali ke,
hi wagaʼat giddaam Butrus wa maatat.
Wa l‑subyaan dakhalo fi l‑beet wa ligooha mayte wa gallooha wa macho dafanooha jamb raajilha.
11 Wa khoof chadiid dakhal le jamaaʼat al‑muʼminiin wa le kulla l‑naas al‑simʼo al‑khabar da.
Adad al‑muʼminiin zaad
12 Wa l‑rusul sawwo ajaayib wa alaamat katiiriin fi ust al‑naas.
Wa kulla l‑muʼminiin induhum galib waahid wa gaaʼidiin yilimmu fi raakuubat Suleymaan fi fadaayit beet Allah.
13 Wa l‑naas al‑ma minhum ma yilimmu maʼaahum wa laakin kulla l‑naas gaaʼidiin yachkuruuhum.
14 Wa adad al‑muʼminiin be l‑Rabb Isa bada yiziid be ziyaada,
min al‑rujaal wa min al‑awiin.
15 Wa naas al‑madiina gaaʼidiin yamurgu al‑mardaaniin fi buruuchhum wa fi saraayirhum wa yukhuttuuhum fi l‑chawaariʼ al‑Butrus yufuut fooghum.
Wa be da,
dullah yikhatti waahidiin minhum wa yalgo al‑aafe.
16 Wa min ayyi hille al‑gariibe le Madiinat al‑Khudus,
naas katiiriin marra waahid jaayiin wa humman jaaybiin maʼaahum akhwaanhum al‑mardaaniin wa muchootiniin wa kulluhum ligo al‑aafe.
Al‑kubaaraat dasso al‑rusul fi l‑sijin
17 Wa laakin kabiir rujaal al‑diin wa kulla akhwaanah al‑Sadduukhiyiin anhasado fi l‑rusul husud chadiid.
18 Wa karabo al‑rusul wa dassoohum fi l‑sijin.
19 Wa laakin fi ust al‑leel,
waahid min malaaʼikat Allah ja fakka biibaan al‑sijin wa maragaahum minnah.
Wa gaal leehum :
20 « Amchu andasso fi beet Allah wa ballukhu le l‑naas kulla kalaam al‑bichaara al‑tiwaddiihum le l‑haya al‑jadiide di. »
21 Wa l‑rusul simʼo kalaamah wa be fajur badri,
dakhalo beet Allah wa gammo yiʼallumu al‑naas.
Wa wakit kabiir rujaal al‑diin wa kulla l‑naas al‑maʼaayah wislo,
naado al‑majlas yilimmu.
Wa kulla chuyuukh Bani Israaʼiil jo.
Wa rassalo hurraas achaan yamurgu al‑rusul min al‑sijin wa yijiibuuhum le l‑majlas.
22 Wa l‑hurraas macho le l‑sijin wa laakin ma ligoohum.
Wa gabbalo ooro al‑kubaaraat.
23 Wa gaalo :
« Ligiina baab al‑sijin masduud adiil wa hurraasah waagfiin giddaamah wa laakin wakit fakkeena al‑baab,
ma ligiina ayyi naadum daakhal ! »
24 Wa kabiir hurraas beet Allah wa kubaaraat rujaal al‑diin simʼo al‑kalaam da wa ma irfo yisawwu chunu.
Wa assaaʼalo ambeenaathum wa gaalo :
« Kikkeef al‑kalaam da yikammil ? »
25 Wa naadum waahid ja fi l‑majlas wa gaal :
« Ya l‑jamaaʼa,
al‑rujaal al‑intu dasseetuuhum fi l‑sijin gaaʼidiin fi beet Allah wa yiʼallumu al‑naas. »
26 Wa kabiir al‑hurraas macha maʼa hurraasah wa jaabo al‑rusul wa laakin ma jaaboohum be gu achaan humman khaayfiin min al‑chaʼab yarjumuuhum.
27 Wa wakit jaabo al‑rusul giddaam al‑majlas,
kabiir rujaal al‑diin saʼalaahum
28 wa gaal :
« Aniina amarnaaku be kalaam chadiid wa gulna leeku ma tiʼallumu al‑naas be usum Isa.
Laakin intu maleetu Madiinat al‑Khudus be taʼliimku wa l‑naas gaaʼidiin yihajju foogah.
Wa intu tidooru tukhuttu fi raasna dimmit al‑raajil da ! »
Al‑rusul giddaam al‑majlas
29 Wa Butrus wa l‑rusul raddo leyah wa gaalo :
« Waajib nitaabuʼu kalaam Allah wa ma kalaam al‑naas.
30 Allah Rabb juduudna baʼas Isa al‑intu allagtuuh fi hatab al‑saliib wa kataltuuh.
31 Wa laakin Allah gaʼʼadah be nussah al‑zeenaay wa jaʼalah malik wa munajji.
Wa be da,
anta fursa le Bani Israaʼiil achaan yutuubu wa hu yakhfir leehum zunuubhum.
32 Wa aniina chuhuud le l‑kalaam da.
Wa l‑Ruuh al‑Khudduus al‑Allah yinazzilah fi l‑naas al‑yitaabuʼu kalaamah,
hu kula chaahid maʼaana. »
33 Wa wakit naas al‑majlas simʼo al‑kalaam da,
ziʼilo zaʼal chadiid wa dawwaro yaktulu al‑rusul.
34 Wa laakin naadum waahid min al‑majlas gamma foog achaan yikallim leehum.
Usmah Gamaliyiil wa hu Fariizi wa muʼallim fi l‑Tawraat wa kulla l‑naas yikarrumuuh.
Wa amar yamurgu al‑rusul min al‑majlas le wakit chiyya.
35 Wa kallam le naas al‑majlas wa gaal :
« Ya Bani Israaʼiil,
awʼu baalku.
Fakkuru adiil gubbaal ma tisawwu cheyy fasil le l‑rujaal dool.
36 Fakkuru,
min siniin,
Suudaas gamma wa sawwa nafsah naadum kabiir wa gariib 400 rujaal taabaʼooh.
Laakin naadum waahid katalah wa l‑naas al‑maʼaayah chatto wa l‑haraka wagafat.
37 Wa baʼad da,
Yahuuza al‑min daar al‑Jaliil gamma fi l‑sana al‑sajjalo foogha al‑naas.
Wa lamma naas katiiriin achaan yitaabuʼuuh.
Laakin hu kula maat wa l‑naas al‑taabaʼooh chatto.
38 « Wa hassaʼ nuguul leeku khallu minku al‑rujaal dool yamchu.
Achaan kan fikirhum wa amalhum jaayiin min al‑insaan,
wiheedah bas yagiif.
39 Wa laakin kan kalaamhum da jaayi min Allah,
abadan ma tagdaro tiwaggufuuhum.
Wa tichiifu kadar intu gaaʼidiin tihaarubu Allah ! »
Wa naas al‑majlas simʼo kalaamah.
40 Wa naado al‑rusul daakhal wa farachoohum.
Wa manaʼoohum ma yiʼallumu al‑naas be usum Isa battaan wa khalaas talagoohum.
41 Wa l‑rusul marago min bakaan al‑majlas farhaaniin achaan Allah charrafaahum be l‑taʼab al‑tiʼibooh fi chaan usum Isa.
42 Wa kulla yoom,
humman gaaʼidiin yiʼallumu al‑naas fi beet Allah wa fi buyuuthum wa gaaʼidiin yiballukhu kadar Isa bas al‑Masiih.
Wa abadan ma wagafo minnah.