Butrus wa Yuuhanna wa l‑kubaaraat
4
1 Wa wakit Butrus wa Yuuhanna gaaʼidiin yihajju le l‑naas al‑laammiin,
rujaal al‑diin wa naas min al‑Sadduukhiyiin wa kabiir al‑askar hurraas beet Allah jo leehum.
2 Wa humman zaʼlaaniin achaan al‑rusul gaaʼidiin yiʼallumu al‑naas.
Wa yuguulu Isa baʼas min ust al‑maytiin wa be da,
akiid al‑naas kula yabʼaso.
3 Wa karabo Butrus wa Yuuhanna wa dassoohum fi l‑sijin lahaddi fajur achaan al‑leel garrab.
4 Wa laakin naas katiiriin simʼo al‑bichaara wa aamano be Isa.
Wa adad al‑muʼminiin tamma misil 5 000 raajil.
5 Wa ambaakir be fajur,
kubaaraat al‑Yahuud wa l‑chuyuukh wa l‑ulama lammo fi Madiinat al‑Khudus.
6 Wa lammo maʼa Hanaan kabiir rujaal al‑diin wa Gayaafa wa Yuuhanna wa Iskandar wa akhwaan aakhariin hana kubaaraat rujaal al‑diin.
7 Wa jaabo Butrus wa Yuuhanna min al‑sijin wa saʼaloohum.
Wa gaalo :
« Ligiitu al‑gudra di min ween wa be usum yaatu sawweetu al‑cheyy da ? »
8 Wa Butrus anmala be l‑Ruuh al‑Khudduus.
Hu radda leehum wa gaal :
« Ya kubaaraat al‑chaʼab,
ya chuyuukhna,
9 al‑yoom tidooru tasʼaloona min al‑hasana al‑sawweenaaha le naadum maʼduur wa tidooru taʼarfu kikkeef hu ligi al‑aafe.
10 Khalaas,
aʼarfu kulluku wa khalli kulla Bani Israaʼiil yaʼarfu kadar al‑naadum al‑waagif giddaamku da ligi al‑aafe be usum Isa al‑Masiih al‑min al‑Naasira.
Wa Isa da,
hu bas al‑naadum al‑intu kataltuuh fi l‑saliib wa Allah baʼasah min ust al‑maytiin.
11 Al‑Kitaab yuguul :
﴾Al‑hajar al‑bannaayiin al‑beet awwal ma dawwarooh bigi al‑hajar al‑muhimm fi buna al‑beet.﴿*
Wa Isa hu al‑hajar wa intu al‑bannaayiin al‑abeetuuh.
12 Ma fi naja illa be Isa wiheedah.
Wa fi kulla l‑ard,
ma fi usum aakhar al‑Allah nazzalah le l‑naas al‑waajib aniina niʼaamunu beyah wa nanjo,
illa be usum Isa ! »
13 Wa naas al‑majlas alʼajjabo achaan Butrus wa Yuuhanna humman naas hille bas wa ma ulama wa laakin kallamo le l‑majlas bala khoof.
Wa irfo kadar Butrus wa Yuuhanna awwal raaykhiin maʼa Isa.
14 Wa laakin chaafo al‑maʼduur al‑ligi al‑aafe waagif maʼaahum wa achaan da,
ma gidro yuguulu leehum kalaam fasil.
15 Wa khalaas,
marago Butrus wa Yuuhanna min al‑majlas wa achchaawaro ambeenaathum.
16 Gaalo :
« Nisawwu chunu le l‑rujaal dool ?
Humman sawwo cheyy ajiib bilheen wa kulla naas Madiinat al‑Khudus chaafooh wa ma nagdaro nankuruuh.
17 Wa laakin ma nidooru kalaamhum yiziid been al‑naas.
Khalli nihadduduuhum wa nuguulu leehum kadar min al‑yoom,
ma waajib yihajju le ayyi naadum be usum Isa. »
18 Wa khalaas,
naadoohum daakhal wa amaroohum achaan abadan ma yikallumu wa la yiʼallumu al‑naas battaan be usum Isa.
19 Wa laakin Butrus wa Yuuhanna gaalo :
« Intu bas guulu leena weenu al‑adiil giddaam Allah.
Waajib nitaabuʼu kalaamku walla nitaabuʼu kalaam Allah ?
20 Wa aniina ma nagdaro nagoodu saakit.
Waajib nihajju be l‑cheyy al‑chifnaah wa be l‑kalaam al‑simiʼnaah. »
21 Wa naas al‑majlas haddadoohum ziyaada wa khalaas talagoohum.
Al‑kubaaraat ma gidro yiʼaakhubuuhum achaan humman khaayfiin min zaʼal al‑chaʼab.
Wa kulla l‑naas gaaʼidiin yachkuru Allah fi chaan al‑ajab al‑bigi da.
22 Wa l‑raajil al‑ligi al‑aafe be l‑ajab da umrah tamma ziyaada min 40 sana.
Duʼa al‑muʼminiin
23 Wakit Butrus wa Yuuhanna talagoohum khalaas,
gabbalo le akhwaanhum wa ooroohum be kulla cheyy al‑gaalooh leehum kubaaraat rujaal al‑diin wa l‑chuyuukh.
24 Wa kulluhum saʼalo Allah be niiye waahide wa gaalo :
« Ya siidna,
khaalig al‑samaawaat wa l‑ard wa l‑buhuur wa kulla cheyy al‑fiihum.
25 Inta kallamt be l‑Ruuh al‑Khudduus be waasitat abdak jiddina Dawuud wa gult :
﴾Maala al‑umam atmarrado ?
Wa maala al‑chuʼuub yilʼaamaro fi l‑ma indah faayde ?
26 Muluuk al‑ard jahhazo le l‑harib
wa l‑salaatiin achchaawaro
didd Allah
wa didd al‑Masiih al‑Allah azalah.﴿*
27 « Wa khalaas,
al‑kalaam da alhaggag hini fi l‑madiina di.
Hiruudus wa Bilaatus al‑Bunti wa kubaaraat al‑umam wa Bani Israaʼiil achchaawaro didd abdak al‑Khudduus,
Isa al‑inta azaltah wa darrajtah achaan yabga al‑Masiih.
28 Wa sawwo leyah kulla cheyy al‑min awwal inta bas be gudurtak kharrartah laabudda yabga.
29 Ya Allah,
hassaʼ chiif humman gaaʼidiin yihadduduuna.
Antiina aniina abiidak gudra achaan niballukhu kalaamak bala khoof.
30 Bayyin gudurtak wa achfi al‑mardaaniin wa sawwi alaamaat wa ajaayib be usum Isa abdak al‑Khudduus. »
31 Wa baʼad saʼalo Allah,
al‑bakaan al‑laammiin foogah anhazza wa kulluhum anmalo be l‑Ruuh al‑Khudduus wa gammo yiballukhu kalaam Allah bala khoof.
Haal al‑Muʼminiin
32 Wa kulla l‑muʼminiin induhum galib waahid wa fikir waahid.
Wa ma fi naadum yuguul khumaamah haggah halaalah.
Wa ayyi naadum minhum yajʼal maalah misil maal al‑akhwaan.
33 Wa l‑rusul gaaʼidiin yachhado le buʼaas al‑Rabb Isa be gudra kabiire bilheen wa rahmat Allah gaaʼide fi kulla l‑muʼminiin be ziyaada.
34 Wa ayyi naadum minhum indah al‑cheyy al‑yakfi leyah achaan kulla l‑muʼminiin al‑induhum ziraaʼa walla buyuut gaaʼidiin yibiiʼuuhum wa yijiibu al‑gurus
35 wa yisallumuuh le l‑rusul fi chaan al‑akhwaan.
Wa l‑rusul gaaʼidiin yigassumuuh wa yantuuh le ayyi naadum hasab al‑hu hawjaan leyah.