Al‑raaʼi wa l‑khanam
10
1 « Asmaʼo nuguul leeku al‑hagg,
kan al‑khanam gaaʼidiin fi l‑zariibe wa naadum ma yidoor yadkhul be l‑derib wa laakin natta fi l‑zariibe be bakaan aakhar,
hu da sarraag wa mujrim.
2 Wa l‑naadum al‑yadkhul fi l‑zariibe be l‑derib,
hu bas raaʼi al‑khanam.
3 Wa l‑haras yaftah leyah al‑derib tawwaali wa l‑khanam yaʼarfu hissah.
Wa l‑raaʼi yinaadi khanamah al‑halaalah.
Hu yinaadi ayyi waahide be usumha wa humman yamurgu waraayah.
4 Wa wakit marag kulla l‑khanam khalaas,
hu yigaddim leehum.
Wa l‑khanam yaʼarfu hissah wa achaan da yitaabuʼuuh.
5 Al‑khanam abadan ma yitaabuʼu al‑naadum al‑ma yaʼarfuuh wa yajru minnah achaan ma yaʼarfu hissah. »
6 Isa hajja leehum be l‑masal da wa laakin ma fihmo kalaamah.
7 Wa achaan da,
Isa hajja leehum battaan wa gaal :
« Asmaʼo nuguul leeku al‑hagg,
ana derib al‑khanam.
8 Ayyi naadum al‑ja gubbaali wa sawwa nafsah al‑raaʼi al‑sahiih,
hu sarraag wa mujrim.
Wa laakin al‑khanam ma simʼo hissah.
9 Ana al‑derib.
Ayyi naadum al‑yadkhul beyi,
yanja wa yabga misil al‑khanamaay al‑tadkhul wa tamrug tasrah fi l‑gechch al‑akhdar.
10 Al‑sarraag ma yaji fi ust al‑khanam illa le yasrighum wa yadbahhum wa yahlikhum.
Wa laakin ana jiit achaan humman yalgo al‑haya wa nantiihum al‑haya al‑afdal.
Al‑raaʼi al‑adiil
11 « Ana al‑raaʼi al‑adiil.
Al‑raaʼi al‑adiil hu al‑naadum al‑yafda khanamah be hayaatah.
12 Al‑khaddaam al‑yasrah be l‑khanam achaan yalga gurus bas,
hu ma al‑raaʼi al‑sahiih wa l‑khanam ma haggah halaalah.
Wa kan yichiif al‑marfaʼiin jaayi,
hu yajri minnah wa yikhalli al‑khanam wiheedhum.
Wa l‑marfaʼiin yakhtif khanamaay min usuthum wa yichattithum.
13 Wa l‑khaddaam yakhdim achaan al‑gurus bas,
hu ma lammaah be l‑khanam.
14 « Ana al‑raaʼi al‑adiil.
Naʼarif khanami wa humman kula yaʼarfuuni
15 misil abuuyi yaʼarifni wa ana naʼarif abuuyi.
Wa ana nafda al‑khanam be hayaati.
16 Indi khanam aakhariin al‑ma min al‑zariibe di.
Humman kula waajib niwaddiihum.
Humman yasmaʼo hissi wa kulla l‑khanam yabgo door waahid tihit raaʼi waahid.
17 « Abuuyi yihibbini achaan nanti hayaati le nichiilha baʼadeen.
18 Ma fi naadum yagdar yichiil ruuhi laakin ana nantiiha be niiyti.
Indi gudra achaan nanti ruuhi wa indi gudra nichiilha battaan.
Da bas al‑cheyy al‑abuuyi amaraani beyah. »
19 Wa l‑Yahuud simʼo kalaamah wa battaan ankhalafo.
20 Katiiriin minhum gaaʼidiin yuguulu :
« Hu muchootin.
Aglah laffa khalaas !
Maalku tasmaʼo kalaamah ? »
21 Wa waahidiin yuguulu :
« Kalaamah ma kalaam hana naadum al‑indah cheetaan.
Hal cheetaan yagdar yifattih uyuun hana naadum amyaan walla ? »
Al‑Yahuud saʼalo Isa
22 Wa fi l‑chite,
ayyado al‑iid hana Tajdiid beet Allah fi Madiinat al‑Khudus.
23 Wa Isa gaaʼid yuruukh fi fadaayit beet Allah fi bakaan usmah raakuubat Suleymaan.
24 Wa l‑Yahuud lammo katiiriin jambah.
Wa saʼalooh wa gaalo :
« Tiʼallig guluubna lahaddi mata ?
Kan sahiih inta al‑Masiih,
khalaas ooriina be kalaam waadih. »
25 Isa radda leehum wa gaal :
« Awwal ooreetku wa intu ma aamantu.
Al‑ajaayib al‑nisawwiihum be usum abuuyi yachhado leyi.
26 Laakin intu ma aamantu beyi achaan intu ma khanami.
27 Khanami yasmaʼo hissi wa ana naʼarifhum wa humman yitaabuʼuuni.
28 Nantiihum al‑haya al‑abadiiye wa abadan ma yiwadduru.
Naadum ma yagdar yakhtifhum min iideeni.
29 Abuuyi antaahum leyi wa hu akbar.
Wa min iideen abuuyi,
ma fi naadum yagdar yakhtif cheyy.
30 Ana wa abuuyi waahid. »
31 Wa l‑Yahuud chaalo battaan hujaar wa dawwaro yarjumuuh.
32 Wa Isa hajja leehum wa gaal :
« Ana sawweet giddaamku hasanaat katiiriin jaayiin min abuuyi.
Ween hi al‑hasana al‑be sababha tidooru tarjumuuni ? »
33 Wa l‑Yahuud raddo leyah wa gaalo :
« Ma nidooru narjumuuk be sabab hasana.
Narjumuuk achaan inta muchrik.
Inta insaani bas wa sawweet nafsak Allah ! »
34 Wa Isa gaal :
« Akiid,
taʼarfu al‑kalaam al‑maktuub fi kitaabku al‑Tawraat kadar Allah gaal :
﴾Ana gult leeku intu ilaahaat.﴿*
35 Wa Kitaab Allah daayman sahiih.
Allah gaal :
‹ Intu ilaahaat › le l‑naas al‑kalaam Allah ja leehum.
36 Wa ana bas al‑Allah khaddasah wa rassalah fi l‑dunya.
Wa be misil da,
maala tuguulu ana muchrik kan gult leeku ana Ibn Allah ?
37 Kan ana ma nisawwi amal Allah,
khalaas ma tiʼaamunu beyi.
38 Kan intu ma tidooru tiʼaamunu beyi kula,
aamunu be l‑amal al‑ana gaaʼid nisawwiih.
Be misil da,
taʼarfu wa tafhamo kadar abuuyi gaaʼid foogi wa ana gaaʼid fi abuuyi. »
39 Wa battaan dawwaro yakurbuuh wa laakin hu anbalas minhum.
40 Wa Isa gabbal fi l‑nuss al‑khaadi le bahar al‑Urdun wa ja fi l‑bakaan al‑Yahya awwal khattas foogah al‑naas.
Wa gaʼad hinaak.
41 Wa naas katiiriin jo leyah wa hajjo ambeenaathum wa gaalo :
« Yahya ma sawwa ayyi ajab wa laakin kulla cheyy al‑Yahya gaalah fi l‑naadum da sahiih. »
42 Wa fi l‑bakaan da,
naas katiiriin aamano beyah.