Al‑mara al‑Saamiriiye
4
1 Al‑Fariiziyiin simʼo kadar naas gaaʼidiin yabgo talaamiiz le Isa wa Isa gaaʼid yikhattis naas ziyaada min Yahya.
Wa Isa irif humman simʼo al‑khabar da.
2 Wa laakin be sahiih,
Isa zaatah ma yikhattis al‑naas,
illa talaamiizah yikhattusu be iznah.
3 Wa achaan da,
hu gamma min daar al‑Yahuudiiya wa chaal derib hana daar al‑Jaliil.
4 Wa waajib yuchugg daar al‑Saamira.
5 Wa ja le hille Saamiriiye usumha Suukhaar wa hi gariib le l‑zereʼ al‑Yaakhuub antaah le wileedah Yuusuf.
6 Wa da bakaan al‑foogah biir Yaakhuub.
Wa Isa iyi min al‑safar wa gaʼad tihit jamb al‑biir yinjamma.
Wa l‑harraay bigat gaayle khalaas.
7 Wa mara Saamiriiye jaat achaan tichiil almi min al‑biir.
Wa Isa hajja leeha wa gaal :
« Antiini almi nachrab. »
8 Wa talaamiizah ma fiihum.
Humman faato fi l‑hille achaan yachru leehum akil.
9 Wa l‑Saamiriiye raddat leyah wa gaalat :
« Haay ?
Inta Yahuudi wa ana Saamiriiye.
Kikkeef tasʼal minni almi tachrab ?
» Wa gaalat al‑kalaam da achaan al‑Yahuud abadan ma yisallumu al‑Saamiriyiin wa la yaakulu maʼaahum.
10 Wa Isa radda leeha wa gaal :
« Kan awwal irifti atiiyit Allah wa yaatu al‑naadum al‑gaaʼid yasʼalki almi,
inti tasʼaleeh wa hu yantiiki almi al‑haya. »
11 Wa hi gaalat :
« Ya l‑sayyid,
ma indak dalu wa l‑biir tawiile.
Almi al‑haya tamurgah min ween ?
12 Jiddina Yaakhuub antaana al‑biir di wa hu zaatah chirib minha almi maʼa awlaadah wa maalhum.
Fi fikrak,
inta akbar min Sayyidna Yaakhuub walla ? »
13 Wa Isa radda leeha wa gaal :
« Ayyi naadum al‑yachrab min almi hana l‑biir di battaan al‑atach yisawwiih.
14 Laakin ayyi naadum al‑yachrab min al‑almi al‑ana nantiih abadan ke al‑atach ma yakurbah.
Al‑almi al‑ana nantiih yabga fi galbah misil een hana almi jaari wa yantiih al‑haya al‑abadiiye. »
15 Wa l‑mara gaalat leyah :
« Ya l‑sayyid,
antiini min almiik da achaan al‑atach ma yakrubni wa khalaas ma naji hini battaan nichiil almi. »
16 Wa Isa gaal leeha :
« Amchi naadi abu iyaalki wa taʼaali hini maʼaayah. »
17 Wa l‑mara gaalat :
« Ma indi raajil.
» Wa Isa radda leeha gaal :
« Kalaamki sahiih,
ma indiki raajil.
18 Akhadti khamsa rujaal wa hassaʼ al‑raajil al‑inti gaaʼide maʼaayah ma raajilki.
Gulti leyi kalaam sahiih. »
19 Wa l‑mara gaalat :
« Ya l‑sayyid,
hassaʼ bas ana irift inta nabi.
20 Juduudna abado Allah fi l‑jabal da.
Wa laakin intu al‑Yahuud tuguulu Madiinat al‑Khudus wiheedha al‑bakaan al‑foogah al‑naas waajib yaʼabudu Allah. »
21 Wa Isa gaal leeha :
« Mara zeene,
saddigi kalaami.
Fi l‑wakit al‑yaji gariib,
intu taʼabudu Allah ma fi l‑hajar da wa la fi Madiinat al‑Khudus.
22 Intu gaaʼidiin taʼabudu Allah wa laakin ma taʼarfuuh.
Aniina naʼabudu Allah wa naʼarfuuh achaan al‑naja jaaye be waasitat al‑Yahuud.
23 Wa laakin wakit jadiid yaji wa l‑wakit da khalaas bada.
Wa fi l‑wakit da,
al‑naas al‑yaʼabudu Allah be ibaada sahiihe,
yaʼabudu Allah al‑Abu be l‑ruuh wa be l‑hagg.
Achaan di bas al‑ibaada al‑Allah abuuhum yidoorha.
24 Allah siid al‑haya wa l‑ruuh.
Wa ibaadat al‑naas ma sahiihe illa kan Ruuh Allah yuguudhum fi l‑hagg. »
25 Wa l‑mara gaalat leyah :
« Ana naʼarif kadar naadum waahid yaji al‑yinaaduuh al‑Masiih.
Wa wakit hu yaji,
hu yifassir leena kulla cheyy. »
26 Wa Isa gaal leeha :
« Ana al‑nihajji leeki,
ana bas hu. »
Al‑Saamiriyiin aamano
27 Wa fi l‑wakit da bas,
talaamiizah gabbalo.
Wa chaafo Isa gaaʼid yihajji maʼa mara wa alʼajjabo bilheen.
Wa laakin ma fi naadum saʼalah wa gaal :
« Tidoor chunu ?
Wa maala tihajji maʼaaha ? »
28 Wa l‑mara gammat wa khallat jarraha fi khachum al‑biir wa machat fi l‑hille daakhal.
Wa hajjat le l‑naas wa gaalat :
29 « Taʼaalu,
chiifu al‑naadum al‑ooraani be ayyi cheyy al‑ana sawweetah.
Da bas al‑Masiih walla ? »
30 Wa naas al‑hille gammo achaan yamurgu yilaaguuh.
31 Wa wakit al‑mara gaaʼide tihajji le l‑naas fi l‑hille,
talaamiiz Isa gaaʼidiin yaʼasuruuh wa yuguulu :
« Sayyidna,
aakul. »
32 Wa laakin Isa radda leehum wa gaal :
« Ana indi akil intu ma taʼarfuuh. »
33 Wa l‑talaamiiz assaaʼalo ambeenaathum wa gaalo :
« Naadum aakhar antaah akil walla ? »
34 Wa Isa gaal :
« Al‑rassalaani kallafaani be khidme wa waajib nikammilha.
Wa da yabga leyi misil akli.
35 Ma taʼarfu al‑masal al‑buguul :
‹ Arbaʼa chahar wa baʼad da,
al‑gatiʼ › ?
Ana nuguul leeku,
fukku uyuunku wa chiifu al‑ziraaʼa.
Al‑khalla nijdat khalaas wa wakit al‑gatiʼ ja.
36 Hassaʼ bas al‑khaddaam al‑yagtaʼ al‑khalla yalga ujurtah wa yilimm al‑khalla wa yakhzinha le l‑aakhira.
Wa be misil da,
al‑naadum al‑yiteerib wa l‑naadum al‑yagtaʼ,
yafraho sawa.
37 Fiyah masal waahid yuguul :
‹ Naadum waahid yiteerib wa naadum aakhar yagtaʼ.
› Wa l‑kalaam da sahiih.
38 Ana rassaltuku fi ust al‑naas misil khaddaamiin al‑yagtaʼo zereʼ wa intu tagtaʼo fi bakaan ma harattu foogah.
Naas aakhariin harato wa intu talgo faayde min khidmithum. »
39 Wa fi l‑hille di,
Saamiriyiin katiiriin aamano be Isa achaan simʼo kalaam al‑mara wakit hi chahadat leyah wa gaalat :
« Hu ooraani be ayyi cheyy al‑ana sawweetah. »
40 Achaan da,
al‑Saamiriyiin jo talabo minnah hu yagood fi hillithum.
Wa hu gaʼad maʼaahum yoomeen.
41 Wa naas ziyaada aamano beyah achaan simʼo kalaamah.
42 Wa hajjo le l‑mara wa gaalo :
« Aniina niʼaamunu.
Ma achaan simiʼna kalaamki bas.
Laakin aniina zaatna simiʼna kalaamah wa naʼarfu akiid hu bas al‑naadum al‑yinajji kulla l‑naas. »
Wileed al‑wakiil
43 Wa baʼad al‑yoomeen dool,
Isa gamma macha le daar al‑Jaliil.
44 Wa Isa awwal oora talaamiizah wa gaal :
« Kulla l‑naas yikarrumu ayyi nabi illa naas hillitah ma yikarrumuuh. »
45 Wa ja fi daar al‑Jaliil wa naas al‑Jaliil firho be jaytah achaan chaafo kulla cheyy al‑sawwaah fi Madiinat al‑Khudus fi ayyaam al‑iid.
Naas al‑Jaliil kula macho ayyado fi Madiinat al‑Khudus.
46 Wa Isa macha battaan fi hillit Kaana fi daar al‑Jaliil.
Da l‑bakaan al‑chaglab foogah al‑almi wa bigi khamar.
Wa naadum waahid gaaʼid fi hillit Kafar Naahuum wa hu wakiil hana l‑malik wa wileedah mardaan.
47 Wa wakit simiʼ kadar Isa gabbal fi daar al‑Jaliil min daar al‑Yahuudiiya,
hu gamma macha leyah wa chahadah achaan yamchi maʼaayah wa yidaawi leyah wileedah al‑gariib yumuut.
48 Wa Isa gaal leyah :
« Intu ma tiʼaamunu illa kan tichiifu ajaayib wa alaamaat min Allah. »
49 Wa wakiil al‑malik radda leyah wa gaal :
« Ya sayyidna,
taʼaal.
Kan ma taji ajala,
wileedi yumuut. »
50 Wa Isa radda leyah wa gaal :
« Amchi beetak.
Wileedak yahya. »
Wa l‑naadum aaman be kalaam Isa wa chaal derbah wa gabbal beetah.
51 Wa wakit hu lissaaʼ maachi fi l‑derib,
khaddaamiinah gammo laagooh wa gaalo leyah :
« Wileedak hayy ! »
52 Wa saʼalaahum wa gaal :
« Min saaʼa kam bigi leyah akheer ?
» Wa gaalo :
« Min amis al‑saaʼa waahid,
al‑wirde khallatah. »
53 Wa abu al‑wileed fakkar wa irif di bas al‑saaʼa al‑Isa hajja leyah foogha wa gaal :
« Wileedak yahya.
» Wa hu aaman be Isa wa kulla naas beetah aamano maʼaayah.
54 Wa di l‑alaama al‑taaniye al‑Isa wassafaaha wakit ja fi daar al‑Jaliil min daar al‑Yahuudiiya.