Al‑waaluuda al‑jaaye be l‑Ruuh
3
1 Wa fi naadum waahid min kubaaraat al‑Yahuud usmah Nigudiimus wa hu Fariizi.
2 Wa hu ja le Isa fi l‑leel wa gaal leyah :
« Sayyidna,
naʼarfu kadar inta muʼallim al‑jaayi min Allah.
Naadum ma yagdar yisawwi al‑ajaayib al‑inta tisawwiihum illa kan Allah gaaʼid maʼaayah ».
3 Wa Isa radda leyah wa gaal :
« Asmaʼ nuguul leek al‑hagg,
naadum ma yagdar yichiif mamlakat Allah illa kan hu mawluud min jadiid.* »
4 Wa Nigudiimus saʼalah wa gaal :
« Kan naadum bigi kabiir khalaas kikkeef yaldooh min jadiid ?
Hal yagdar yigabbil fi batun ammah achaan hi taldaah marra taaniye walla ? »
5 Wa Isa radda leyah wa gaal :
« Asmaʼ nuguul leek al‑hagg,
naadum ma yagdar yadkhul fi mamlakat Allah illa be l‑waaluuda al‑jaaye be almi wa be Ruuh Allah.
6 Al‑mawluud min insaan,
hu insaan wa laakin al‑mawluud min al‑Ruuh,
hu ruuh.
7 Ma tiʼajjib min kalaami kan gult leek waajib tabga mawluud min jadiid.
8 Al‑riih tusuug fi ayyi bakaan al‑hi tidoorah.
Wa l‑naas yasmaʼo hissaha laakin ma yaʼarfu al‑bakaan al‑jaaye minnah wa la l‑maache aleyah.
Wa yukuun misil da le ayyi naadum al‑mawluud min al‑Ruuh. »
9 Wa Nigudiimus gaal :
« Kikkeef da yabga ? »
10 Wa Isa radda leyah wa gaal :
« Inta gaaʼid tiʼallim Bani Israaʼiil.
Kikkeef ma fihimt al‑kalaam da ?
11 Asmaʼ nuguul leek al‑hagg,
nihajju be l‑cheyy al‑naʼarfuuh wa nachhado fi l‑cheyy al‑chifnaah laakin intu ma takhbalo chahaaditna.
12 Hajjeet leeku fi l‑cheyy al‑yabga fi l‑ard wa ma aamantu.
Wa kikkeef tiʼaamunu kan nihajji leeku fi l‑cheyy al‑yabga fi l‑sama ?
13 Ma fi naadum waahid talaʼ fi l‑sama illa Ibn al‑Insaan al‑nazal min al‑sama.
14 « Fi l‑sahara,
Muusa rafaʼ al‑daabi* foog wa laabudda Ibn al‑Insaan kula yarfaʼooh misil da
15 achaan kulla l‑naas al‑yiʼaamunu beyah yalgo al‑haya al‑abadiiye.
16 Wa Allah habba naas al‑dunya bilheen wa achaan da,
hu antaahum Ibnah al‑Waahid achaan ayyi naadum al‑yiʼaamin beyah ma yahlak laakin yalga al‑haya al‑abadiiye.
17 Allah rassal Ibnah fi l‑dunya ma le yihaakim naas al‑dunya laakin le yinajjiihum beyah.
18 Al‑naadum al‑muʼmin be Isa al‑Masiih,
Allah ma yihaakimah.
Wa laakin al‑naadum al‑ma muʼmin beyah,
haakamah khalaas achaan al‑naadum da aba ma aaman be Ibn Allah al‑Waahid.
19 Wa daahu al‑hukum,
nuur Allah dakhal fi l‑dunya wa l‑naas habbo al‑dalaam wa ma dawwaro al‑nuur achaan amalhum cheen.
20 Ayyi naadum al‑gaaʼid yisawwi amal fasil yakrah al‑nuur wa ma yaji fi l‑nuur achaan ma yidoor amalah al‑fasil yinchaaf.
21 Ayyi naadum al‑yisawwi al‑hagg yaji fi l‑nuur achaan yabga waadih kadar al‑amal al‑hu sawwaah da,
sawwaah hasab al‑yidoorah Allah. »
Kalaam Yahya fi Isa al‑Masiih
22 Wa baʼadeen,
Isa chaal talaamiizah wa macha daar al‑Yahuudiiya wa gaʼad maʼaahum ayyaam.
Wa fi l‑bakaan da,
gamma yikhattis al‑naas.
23 Wa Yahya kula gaaʼid yikhattis al‑naas.
Hu gaaʼid fi bakaan usmah Een Nuun gariib le hillit Saaliim achaan fi l‑bakaan da,
fi almi katiir.
Wa l‑naas jaayiin leyah achaan hu yikhattishum.
24 Wa da wakit lissaaʼ ma karabo Yahya fi l‑sijin.
25 Wa talaamiiz waahidiin hana Yahya gammo yikhaalutu maʼa Yahuudi waahid fi wadu al‑Yahuud.
26 Wa l‑talaamiiz jo le Yahya wa hajjo leyah wa gaalo :
« Ya sayyidna,
al‑naadum al‑kaan maʼaak wakit inta gaaʼid khaadi le bahar al‑Urdun,
hu al‑inta chahadt leyah,
hu kula gaaʼid yikhattis al‑naas.
Wa kulla l‑naas maachiin leyah. »
27 Wa Yahya radda leehum wa gaal :
« Al‑naadum ma yalga cheyy min Allah illa kan Allah antaah.
28 Intu zaatku simiʼtu kalaami wa tagdaro tachhado leyi.
Ana gult ana ma al‑Masiih laakin Allah rassalaani achaan namchi giddaamah.
29 Al‑naadum al‑indah al‑aruus,
hu bas al‑ariis.
Wa rafiig al‑ariis hu yagiif jambah wa yasmaʼ kalaamah.
Wa kan yasmaʼ hiss al‑ariis,
hu farhaan be farha kabiire.
Wa l‑farha di,
hi farha hinti wa hassaʼ ana farhaan marra waahid.
30 Waajib Isa yabga aali wa ana nabga tihit.
31 « Al‑jaayi min foog hu akbar min kulla l‑naas.
Wa l‑naadum al‑min al‑ard hu hana l‑ard bas wa yihajji fi cheyy hana l‑ard.
Al‑jaayi min al‑sama hu akbar min kulla l‑naas.
32 Hu chaahid fi l‑cheyy al‑chaafah wa l‑simʼah wa laakin al‑naas ma yidooru chahaadtah.
33 Wa ayyi naadum al‑khibil chahaadtah akkad kadar kalaam Allah sahiih.
34 Al‑naadum al‑Allah rassalah yihajji al‑kalaam al‑jaayi min Allah achaan Allah yinazzil foogah Ruuhah bala hadd.