Khiyaanat Yahuuza le l‑Masiih
22
1 Wa iid al‑Khubza bala Tawwaara al‑maʼruuf be iid al‑Fisha garrab.
2 Wa kubaaraat rujaal al‑diin wa l‑ulama khaayfiin min zaʼal al‑naas wa achaan da,
gammo yifattuchu tariiga al‑yaktulu beeha Isa be achiir.
3 Wa fi l‑bakaan da,
al‑Cheetaan dakhal fi galib Yahuuza al‑usmah al‑Iskhariyooti.
Wa hu min al‑talaamiiz al‑atnaachar.
4 Wa Yahuuza gamma wa macha hajja maʼa kubaaraat rujaal al‑diin wa kubaaraat al‑askar hurraas beet Allah.
Wa chaawaraahum be kikkeef yagdar yisallim leehum Isa.
5 Wa humman firho wa gaalo yantuuh gurus.
6 Wa khalaas,
Yahuuza khassad wa min al‑wakit da,
hu gaaʼid yifattich fursa achaan yisallim leehum Isa wakit hu ma gaaʼid fi ust al‑naas.
Al‑acha
7 Wa iid al‑Khubza bala Tawwaara ja.
Wa da l‑yoom al‑yadbaho foogah al‑hamal fi chaan acha hana iid al‑Fisha.
8 Wa Isa rassal Butrus wa Yuuhanna wa amaraahum wa gaal :
« Amchu hassulu leena acha iid al‑Fisha. »
9 Wa saʼalooh wa gaalo :
« Wa nihassuluuh ween ? »
10 Wa radda leehum wa gaal :
« Wakit tadkhulu fi l‑madiina,
talgo raajil waahid chaayil jarr hana almi.
Taabuʼuuh fi l‑beet al‑yadkhul foogah
11 wa hajju le siid al‑beet da wa guulu leyah :
‹ Sayyidna al‑muʼallim yuguul leek :
“Ween beet al‑diifaan al‑naakul foogah acha iid al‑Fisha maʼa talaamiizi ?” ›
12 Wa hu yiwassifku khurfa wasiiʼe wa jaahize foog fi l‑gasir.
Wa fi l‑bakaan da bas,
hassulu leena al‑acha. »
13 Wa macho wa ligo kulla cheyy misil hu gaalah leehum.
Wa hassalo acha iid al‑Fisha.
14 Wakt al‑acha tamma wa Isa gaʼad le l‑akil maʼa l‑rusul al‑atnaachar.
15 Wa gaal leehum :
« Ana atmanneet naakul maʼaaku acha iid al‑Fisha da gubbaal ma natʼab.
16 Wa nuguul leeku ma naakulah battaan lahaddi kulla cheyy al‑bukhuss iid al‑Fisha yitimm fi mamlakat Allah. »
17 Wa chaal kaas hana asiir al‑inab wa chakar Allah.
Wa gaal leehum :
« Chiiluuh.
Khalli kula waahid yachrab minnah.
18 Wa nuguul leeku min al‑yoom ana ma nachrab battaan asiir al‑inab lahaddi mamlakat Allah taji. »
19 Wa chaal khubza waahide wa chakar Allah.
Wa kasarha wa antaaha leehum wa gaal :
« Da jismi al‑nantiih fi chaanku.
Sawwu misil da le tizzakkarooni beyah. »
20 Wa baʼad al‑acha,
hu sawwa nafs al‑cheyy be l‑kaas.
Hu chaalah wa gaal :
« Al‑kaas da yiwassif al‑muʼaahada al‑jadiide al‑nisawwiiha maʼaaku be dammi al‑yidaffig fi chaanku.
21 Wa nuguul leeku al‑naadum al‑yukhuunni gaaʼid yaakul maʼaayi !
22 Achaan Ibn al‑Insaan yumuut misil Allah khaddarah.
Laakin al‑azaab yarja al‑naadum al‑yukhuunni. »
23 Wa bado yissaaʼalo ambeenaathum fi yaatu al‑minhum yabga al‑khaayin.
24 Wa talaamiizah gammo yilkhaalato ambeenaathum fi yaatu al‑yabga al‑akbar minhum.
25 Wa Isa gaal leehum :
« Ayyi malik al‑umam yamluk be chidde fi naasah wa l‑indah gudra foog al‑naas kula yahkim fooghum misil hu siid al‑kheer.
26 Laakin ma yabga misil da ambeenaatku.
Khalli al‑kabiir minku yabga misil al‑sakhayyar wa l‑yuguudku misil al‑yakhdim leeku.
27 Masalan,
kan naadum waahid gaaʼid yaakul wa naadum aakhar yijiib leyah al‑akil,
yaatu minhum al‑kabiir ?
Akiid,
yuguulu al‑gaaʼid yaakul hu al‑kabiir.
Wa laakin ana zaati gaaʼid fi usutku misil al‑khaddaam al‑yakhdim.
28 « Wa intu gaʼadtu maʼaayi saabtiin fi kulla suʼuubaati.
29 Wa misil abuuyi Allah antaani mamlaka,
ana kula nantiiku mamlaka.
30 Wa taakulu wa tacharbo fi nafs al‑dabalaay maʼaayi fi mamlakati wa tagoodu fi karaasi wa tahkumu gabaayil Bani Israaʼiil al‑atnaachar. »
Al‑Masiih gaal Butrus yankurah
31 Wa Isa gaal :
« Ya Simʼaan,
ya Simʼaan.
Asmaʼ.
Ibliis saʼal izin achaan yijarrib iimaanku wa yikharbilku misil khalla.
32 Laakin ana saʼalt leek Allah achaan iimaanak ma yangus.
Wa wakit inta bigiit battaan gawi fi l‑iimaan,
sabbit akhwaanak. »
33 Wa Butrus gaal :
« Ya sayyidna,
ana jaahiz namchi maʼaak fi l‑sijin wa numuut kula. »
34 Wa Isa radda leyah wa gaal :
« Ya Butrus nuguul leek,
fi l‑leele di gubbaal al‑diik ma yiʼooʼi,
inta tankurni talaata marraat wa tuguul ma taʼarifni. »
35 Wa Isa gaal leehum :
« Chunu gassar leeku wakit rassaltuku fi ust al‑naas bala juzlaan wa la mukhla wa la naʼaal ?
» Wa raddo leyah wa gaalo :
« Cheyy ma gassar leena. »
36 Wa gaal leehum :
« Laakin hassaʼ nuguul leeku khalli al‑naadum al‑indah juzlaan walla mukhla yakurbah.
Wa khalli ayyi naadum al‑ma indah seef yibiiʼ khulgaanah achaan yachri seef.
37 Achaan nuguul leeku al‑kalaam al‑yukhussini fi l‑Kitaab waajib yitimm.
Maktuub :
﴾Hasabooh maʼa l‑aasiyiin.﴿*
Wa akiid al‑kalaam al‑ankatab fi chaani gaaʼid yitimm. »
38 Wa achaan da,
gaalo :
« Sayyidna,
chiif.
Indina suyuuf itneen.
» Wa hu radda leehum wa gaal :
« Khalaas,
kafaaku. »
Duʼa al‑Masiih fi jabal al‑Zaytuun
39 Wa Isa marag min al‑beet wa macha misil fi aadtah fi jabal al‑Zaytuun.
Wa talaamiizah macho waraayah.
40 Wa wakit lihig al‑bakaan da,
hu gaal leehum :
« Asʼalo Allah achaan al‑taʼab ma yijarrib iimaanku wa yitallifah. »
41 Wa khallaahum wa macha minhum chiyya misil zargit hajar.
Wa sajad wa bada yasʼal Allah
42 wa gaal :
« Ya abuuyi,
kan di niiytak,
baʼʼid minni kaas al‑taʼab da.
Laakin khalli yabga misil inta tidoorah wa ma misil ana nidoorah. »
43 Wa waahid min malaaʼikat Allah baan leyah wa sabbat galbah.
44 Wa Isa gaaʼid fi taʼab chadiid wa saʼal Allah be chidde ziyaada.
Wa wakharah yinaggit fi l‑turaab misil damm.
45 Wa gamma min al‑duʼa wa macha le talaamiizah.
Wa ligiihum naaymiin.
Wa naamo achaan al‑hizin kassalaahum.
46 Wa gaal leehum :
« Maalku naaymiin ?
Gummu foog.
Asʼalo Allah achaan al‑taʼab ma yijarrib iimaanku wa yitallifah. »
Al‑Masiih karabooh
47 Wa Isa lissaaʼ ma kammal al‑kalaam da wa naas jo wa l‑naadum al‑usmah Yahuuza gaaʼid yuguudhum.
Wa hu min al‑talaamiiz al‑atnaachar.
Wa garrab le Isa achaan yisallimah be hubb.
48 Wa Isa gaal leyah :
« Yahuuza,
tidoor tukhuun Ibn al‑Insaan be hubb walla ? »
49 Wa wakit talaamiiz Isa irfo al‑cheyy al‑yidoor yabga,
humman saʼalo Isa wa gaalo :
« Sayyidna,
nidaawusuuhum be suyuufna walla ? »
50 Wa waahid minhum gamma darab abid hana kabiir rujaal al‑diin be l‑seef wa gataʼ adaanah al‑zeene.
51 Laakin Isa gaal :
« Khalaas !
Agiifu !
» Wa limis adaanah wa chafaah.
52 Wa Isa hajja le kubaaraat rujaal al‑diin wa l‑chuyuukh wa kubaaraat al‑askar hurraas beet Allah al‑jo yakurbuuh.
Wa gaal leehum :
« Da kikkeef ?
Jiitu takurbuuni be seef wa asa da.
Ana mujrim walla ?
53 Kulla yoom ana gaaʼid ambeenaatku fi fadaayit beet Allah wa ma karabtuuni.
Laakin al‑leel bas wakitku intu achaan intu gaaʼidiin titaabuʼu muluk al‑dalaam. »
Butrus nakar al‑Masiih
54 Wa khalaas,
karabo Isa wa saagooh wa waddooh fi beet kabiir rujaal al‑diin.
Wa Butrus macha waraahum min baʼiid.
55 Wa l‑jamaaʼa al‑karabo Isa oogado naar fi lubb al‑hooch wa gaʼado tihit.
Wa Butrus gaʼad maʼaahum.
56 Wa khaddaama waahide chaafatah fi deyy al‑naar wa irfatah.
Wa gaalat :
« Al‑naadum da,
hu kula maʼa Isa. »
57 Wa Butrus nakar wa gaal :
« Mara zeene,
ana ma naʼarfah. »
58 Wa baʼad chiyya naadum aakhar chaafah wa gaal :
« Inta kula minhum.
» Wa Butrus gaal :
« Ya raajil,
la.
Da ma sahiih. »
59 Wa baʼad saaʼa waahide,
naadum aakhar hajja wa gaal :
« Akiid al‑naadum da hu maʼa Isa,
achaan hu kula min daar al‑Jaliil. »
60 Wa Butrus gaal :
« Ya raajil,
ma naʼarfah marra waahid.
Kalaamak da chunu ? »
Wa gubbaal ma yikammil kalaamah,
al‑diik ooʼa.
61 Wa l‑Rabb Isa anlafat wa chaaf Butrus.
Wa Butrus fakkar fi kalaam al‑Rabb Isa al‑awwal gaalah leyah :
« Al‑leele di gubbaal al‑diik ma yiʼooʼi,
tankurni talaata marraat. »
62 Wa Butrus marag min al‑hooch wa baka baki chadiid.
63 Wa l‑rujaal al‑gaaʼidiin yaharsu Isa gaaʼidiin yichchammato leyah wa yudugguuh.
64 Wa rabato uyuunah wa gaalo :
« Ooriina yaatu al‑darabak ! »
65 Wa hajjo leyah kalaam katiir be kalaam murr wa ayyarooh.
Al‑Masiih giddaam al‑majlas
66 Wa wakit al‑wata asbahat,
kulla chuyuukh al‑chaʼab lammo maʼa kubaaraat rujaal al‑diin wa l‑ulama.
Wa humman saago Isa wa waddooh giddaam al‑majlas.
67 Wa gaalo leyah :
« Kan inta al‑Masiih,
ooriina !
» Wa hu radda leehum wa gaal :
« Kan nuguulah leeku kula,
abadan ma tiʼaamunu beyi.
68 Wa kan nasʼalku suʼaal,
abadan ma turuddu leyi.
69 Laakin nuguul leeku min al‑yoom Ibn al‑Insaan yagood fi kursi jamb Allah al‑Gaadir fi nussah al‑zeenaay. »*