Al‑armala al‑miskiine
21
1 Wa Isa rafaʼ raasah wa chaaf siyaad al‑maal al‑gaaʼidiin yusubbu gurus fi sanduug beet Allah.
2 Wa chaaf armala waahide miskiine.
Wa hi khattat fi l‑sanduug riyaaleen bas.
3 Wa Isa gaal :
« Nuguul leeku al‑hagg,
al‑armala al‑miskiine di khattat fi l‑sanduug ziyaada min kulla l‑naas al‑aakhariin dool.
4 Achaan kulluhum anto le Allah al‑zaayid min maalhum laakin hi miskiine wa antat kulla cheyy al‑tiʼiich beyah. »
Alaamaat kumaalit al‑dunya
5 Wa naas waahidiin gaaʼidiin yihajju be samaah hana beet Allah wa hujaarah al‑samhiin wa kulla cheyy al‑naas antooh le l‑buna.
Wa Isa gaal :
6 « Kulla l‑buyuut al‑tichiifuuhum dool,
yaji wakit waahid ma yikhallu hajar yagood foog hajar.
Yarmuuhum kulluhum. »
7 Wa saʼalooh wa gaalo :
« Ya sayyidna,
da yabga mata ?
Wa chunu al‑alaama al‑tiwassifna kadar da gariib ? »
8 Wa gaal leehum :
« Khuttu baalku wa ma tikhallu naadum yukhuchchuku.
Achaan naas katiiriin yaju be usmi wa yihajju be nufuushum wa yuguulu :
‹ Ana bas al‑Masiih !
› Walla buguulu :
‹ Al‑wakit tamma !
› Al‑naas dool,
ma titaabuʼuuhum.
9 Wa wakit tasmaʼo khabar hana huruub wa tamarrud,
ma takhaafo achaan da waajib yukuun gubbaal.
Laakin al‑kumaale ma taji ajala. »
10 Wa gaal leehum :
« Naas hana balad waahide yahjumu naas hana balad aakhara wa mamlaka tahjim mamlaka aakhara.
11 Wa fi diyaar katiiriin yukuun zilzaal wa fi aakhariin juuʼ chadiid wa waba.
Wa alaamaat kubaar yinchaafo fi l‑sama al‑yikhawwufu al‑naas marra waahid.
12 « Wa laakin gubbaal al‑achya dool ma yabgo,
intu yakurbuuku wa yiʼazzubuuku.
Wa yisallumuuku le masaaʼiil buyuut al‑sala wa yazguluuku fi l‑sijin.
Yiwadduuku bakaan al‑muluuk wa l‑hukkaam fi chaan intu naasi.
13 Wa be da talgo fursa le tachhado leyi.
14 Achaan da,
sabbutu afkaarku achaan ma tihimmu fi kikkeef turuddu leehum.
15 Achaan ana nantiiku al‑kalaam wa l‑fikir al‑waajib.
Wa l‑naas al‑yiʼaazuuku ma yagdaro yahmalo kalaamku walla yuruddu leeku.
16 Wa l‑yisallumuuku le l‑kubaaraat humman waaldeenku wa akhwaanku wa min gabiilitku wa rufgaanku.
Wa waahidiin minku yaktuluuhum.
17 Wa fi chaan usmi,
kulla l‑naas yakrahooku.
18 Laakin suufaay waahide min raasku ma tiwaddir.
19 Agoodu saabtiin fi l‑taʼab da wa misil da tinajju nufuusku.
20 « Wa yoom waahid,
askar katiiriin yaju yihawwugu Madiinat al‑Khudus.
Wa wakit tichiifuuhum,
taʼarfu kadar kharaabha gariib.
21 Wa fi l‑bakaan da,
khalli al‑naas al‑gaaʼidiin fi daar al‑Yahuudiiya yiʼarrudu fi l‑hujaar.
Wa khalli al‑naas al‑fi l‑madiina yamurgu minha wa khalli al‑naas al‑fi l‑kadaade ma yadkhulu fi l‑madiina.
22 Achaan fi l‑wakit da,
Allah yiʼaakhib chaʼabah wa kulla l‑kalaam al‑awwal al‑anbiya katabooh fooghum yitimm.
23 Wa yabga gaasi bilheen le l‑awiin al‑khalbaanaat wa l‑yiraddiʼan.
Wa l‑diige tabga chadiide fi kulla l‑balad di achaan khadab Allah yanzil fi l‑chaʼab da.
24 Yumuutu be l‑seef wa yiwadduuhum masaajiin fi ust kulla l‑umam.
Wa naas al‑umam yamulku Madiinat al‑Khudus wa yifajjukhuuha lahaddi wakithum yikammil.
Jayyit al‑Masiih al‑taaniye
25 « Wa l‑naas yichiifu alaamaat fi l‑harraay wa l‑gamar wa l‑nujuum.
Wa fi l‑ard,
al‑umam yibarjulu wa yakhaafo min hiss al‑bahar wa harakatah.
26 Wa l‑naas yagaʼo min al‑khoof wa yakhaafo min al‑cheyy al‑jaayi fi l‑dunya achaan khuwwaat al‑samaawaat zaathum yinhazzo.
27 Wa fi l‑wakit daak,
yichiifu Ibn al‑Insaan jaayi fi sahaab al‑sama be gudra aziime wa majiide.*
28 Wa wakit al‑achya dool yabdo,
chiddu heelku wa arfaʼo ruuseeku foog achaan yoom najaatku garrab. »
Alaamit chadarat al‑tiin
29 Wa Isa hajja leehum be masal wa gaal :
« Fakkuru fi chadar al‑tiin wa fi kulla l‑chadar.
30 Wakit al‑chadar yisawwi warag,
tichiifuuh wa taʼarfu al‑wakit al‑yalda foogah garrab khalaas.
31 Wa sawa sawa misil da,
aʼarfu kadar mamlakat Allah garrabat wakit tichiifu al‑alaamaat al‑ooreetku beehum dool.
32 Wa nuguul leeku al‑hagg,
naas hana l‑wakit da ma yikammulu gubbaal kulla l‑kalaam da ma yitimm.
33 Al‑sama wa l‑ard yabgo ma fiihum wa laakin kalaami yagood daayman.
34 « Khuttu baalku fi nufuusku.
Achaan kan tikhallu guluubku yinchakhlu be l‑safaaha wa l‑sakar wa kan tinchakhlu be humuum al‑dunya,
al‑yoom da yaji fajʼatan
35 wa yabga leeku misil charak.
Akiid,
al‑yoom da yaji fi kulla l‑naas al‑fi kulla l‑ard.
36 Abgo daayman waaʼiyiin wa asʼalo gudra min Allah achaan tanjo min kulla l‑achya al‑yabgo dool wa fi l‑akhiir tagiifu giddaam Ibn al‑Insaan. »