Al‑talaamiiz al‑sabʼiin wa tineen
10
1 Wa baʼadeen al‑Rabb Isa azal min talaamiizah sabʼiin wa tineen naadum wa rassalaahum itneen itneen giddaamah fi ayyi bakaan al‑hu yidoor yamchi leyah.
2 Wa gaal leehum :
« Al‑naas misil zereʼ kabiir wa khallitah nijdat khalaas wa laakin al‑yakhdumu foogah chiyya.
Achaan da,
asʼalo siid al‑zereʼ achaan yirassil khaddaamiinah yilimmu khallitah.
3 Wa khalaas amchu.
Nirassilku fi usuthum wa tabgo misil sukhlaan fi ust al‑maraafʼiin.
4 Wa fi l‑derib,
ma tichiilu juzlaan wa la mukhla wa la naʼaal.
Ma tagiifu le tisallumu ayyi naadum fi l‑derib.
5 « Wa gubbaal ma tadkhulu fi ayyi beet,
guulu :
‹ Khalli al‑salaam yaji fi l‑beet da. ›
6 Wa kan naadum al‑yiriid al‑salaam gaaʼid foogah,
salaamku yagood foogah.
Laakin kan ma fi naadum al‑yiriid al‑salaam,
khallu salaamku yigabbil leeku.
7 Wa agoodu fi beet waahid wa ma tamchu beet aakhar.
Aakulu wa acharbo ayyi cheyy al‑yidayyufuuku beyah achaan ujrat al‑naadum al‑yakhdim waajbe leyah.
Ma tihawwulu min beet le beet fi hille waahide.
8 « Wa kan tadkhulu fi ayyi hille wa naasha yakhbalooku,
aakulu al‑akil al‑yidayyufuuku beyah
9 wa achfu al‑mardaaniin al‑gaaʼidiin foogha.
Wa guulu leehum :
‹ Mamlakat Allah garrabat leeku. ›
10 Wa laakin kan tadkhulu fi hille wa naasha ma yakhbalooku,
amchu fi chawaariʼha wa guulu :
11 ‹ Ajaaj hillitku al‑mulassag fi rijleena kula,
nihittuuh minnina wa di chahaaditna foogku.
Laakin aʼarfu adiil kadar mamlakat Allah garrabat. ›
12 Nuguul leeku al‑azaab al‑yaji foog naas al‑hille di fi yoom al‑Hisaab yabga ziyaada min al‑azaab al‑yaji foog naas hillit Saduum. »*
Al‑hillaal al‑ma taabo
13 « Al‑azaab yarjaaki,
ya hillit Kuuraziin.
Al‑azaab yarjaaki,
ya hillit Beet Seeda.
Kan awwal naadum sawwa al‑ajaayib dool fi mudun al‑kuffaar Suur wa Seeda,
naashum yutuubu min zunuubhum min zamaan wa yalbaso khulgaan al‑hizin wa yagoodu fi rumaad wa yutuubu.
14 Aywa,
al‑azaab al‑yaji foog naasku fi yoom al‑Hisaab yabga ziyaada min al‑azaab al‑yaji foog naas Suur wa Seeda.
15 Wa inti hillit Kafar Naahuum,
fi fikirki tarfaʼe raaski lahaddi l‑sama walla ?
Be l‑aks,
tinrami fi l‑haawiye ! »
16 Wa Isa gaal le l‑talaamiiz :
« Ayyi naadum al‑simiʼ kalaamku,
simiʼ kalaami.
Wa l‑abaaku,
abaani.
Wa l‑abaani,
aba Allah al‑rassalaani. »
Farah al‑talaamiiz al‑sabʼiin wa tineen
17 Wa l‑talaamiiz al‑sabʼiin wa tineen al‑Isa rassalaahum gabbalo leyah farhaaniin bilheen.
Wa gaalo :
« Ya sayyidna !
Al‑chawaatiin zaathum yasmaʼo kalaamna kan amarnaahum be usmak inta. »
18 Wa Isa gaal leehum :
« Aywa,
wakit intu gaaʼidiin fi l‑khidme di,
ana chift Ibliis wagaʼ ajala misil soot yagaʼ min al‑sama.
19 Ana anteetku gudra achaan tifajjukhu al‑dabiib wa l‑agaarib.
Wa anteetku gudra lahaddi tinnasru fi kulla gudrat Ibliis al‑adu.
Ma fi cheyy al‑yitaʼʼibku.
20 Sahiih,
al‑chawaatiin simʼo kalaamku laakin ma tafraho be l‑kalaam da.
Akheer tafraho kadar Allah sajjal asaameeku fi kitaabah fi l‑sama. »
Farah al‑Masiih
21 Wa fi l‑wakit da,
Isa malaan be l‑Ruuh al‑Khudduus wa farhaan bilheen wa gaal :
« Chukran,
ya abuuyi Rabb al‑samaawaat wa l‑ard,
achaan inta labbadt kalaamak da min al‑hakiimiin wa min al‑ulama wa wassaftah le l‑naas al‑juhhaal marra waahid.
Aywa,
ya abuuyi,
achaan da bas al‑cheyy al‑inta raadi beyah.
22 Abuuyi Allah wakkalaani be kulla cheyy.
Ma fi naadum al‑yaʼarif Ibn Allah.
Illa abuuh yaʼarfah.
Wa ma fi naadum al‑yaʼarif Allah illa Ibn Allah wa l‑naadum al‑Ibn Allah yidoor yiwassif leyah abuuh. »
23 Wa anlafat le talaamiizah wa hajja leehum wiheedhum wa gaal :
« Mabruuk leeku fi chaan al‑cheyy al‑intu tichiifuuh.
24 Achaan nuguul leeku naas katiiriin min al‑anbiya wa l‑muluuk dawwaro bilheen yichiifu al‑cheyy al‑intu gaaʼidiin tichiifuuh,
laakin ma chaafooh.
Wa dawwaro yasmaʼo al‑kalaam al‑intu gaaʼidiin tasmaʼooh wa ma simʼooh. »
Masal al‑Saamiri al‑zeen
25 Wa naadum waahid aalim fi l‑Tawraat gamma achaan yijarrib Isa wa gaal :
« Ya l‑muʼallim,
chunu al‑cheyy al‑waajib nisawwiih le nawris al‑haya al‑abadiiye ? »
26 Wa Isa gaal leyah :
« Chunu al‑maktuub fi l‑Tawraat ?
Gareet foogah chunu ? »
27 Wa l‑aalim radda leyah wa gaal :
« Al‑Kitaab yuguul :
﴾Waajib tihibb Allah Rabbak be kulla galbak wa be kulla nafsak wa be kulla gudurtak wa be kulla fikrak﴿* wa battaan :
﴾Hibb akhuuk misil tihibb nafsak.﴿
»*
28 Wa Isa gaal :
« Kalaamak sahiih.
Sawwi misil gultah wa talga al‑haya. »
29 Wa laakin al‑aalim dawwar yiwassif kadar hu indah hagg wa gaal leyah :
« Yaatu min al‑naas akhuuyi ? »
30 Wa Isa radda leyah wa gaal :
« Yoom min al‑ayyaam,
fi naadum waahid maachi min Madiinat al‑Khudus le hillit Ariiha.
Wa tawwaali,
rabbaatiin al‑duruub gammo hajamooh.
Daggooh wa sallabooh wa faato.
Wa khallooh majruuh ambeen al‑haya wa l‑moot.
31 « Wa baʼadeen fi naadum waahid maachi fi l‑derib da wa hu raajil diin.
Wa wakit hu chaaf al‑naadum al‑taʼbaan,
hu baaraah wa faat giddaam.
32 Wa naadum aakhar ja wa hu min al‑Laawiyiin al‑yakhdumu fi beet Allah.
Hu ja fi l‑bakaan da wa chaaf al‑taʼbaan wa hu kula baaraah wa faat giddaam.
33 « Laakin musaafir waahid ja fi l‑bakaan al‑naadum gaaʼid foogah da wa hu min al‑Saamiriyiin.
Wa l‑ajnabi da chaafah wa hanna foogah.
34 Wa macha leyah wa sabba dihin wa khamar fi awaawiirah wa rabataahum wa rakkabah fi humaarah.
Wa waddaah fi beet hana diifaan wa rayyasah.
35 Wa ambaakir,
hu marag gurus min juzlaanah wa antaah le siid al‑beet wa gaal leyah :
‹ Rayyisah wa kan khisirt ziyaada,
nantiik wakit nigabbil leek.
› »
36 Wa Isa saʼal al‑aalim wa gaal :
« Min al‑naas al‑talaata dool,
yaatu al‑sawwa nafsah akhu le l‑naadum al‑hajamooh rabbaatiin al‑duruub ? »
37 Wa l‑aalim radda leyah wa gaal :
« Al‑naadum al‑sawwa leyah al‑rahma.
» Wa khalaas Isa gaal leyah :
« Gumm sawwi nafs al‑cheyy mislah. »
Marsa wa Mariyam
38 Wa Isa wa jamaaʼtah maachiin giddaam wa dakhalo fi hille waahide.
Wa fi mara usumha Marsa wa hi faddalathum fi beetha.
39 Wa indaha akhut usumha Mariyam.
Wa Mariyam gaʼadat gariib le l‑Rabb Isa achaan tasmaʼ taʼliimah.
40 Laakin Marsa gaaʼide takhdim leehum wa hi machkhuula bilheen wa ma tagdar tasmaʼ kalaamah.
Wa machat le Isa wa gaalat :
« Ya sayyidna,
akhti di khallatni nisawwi kulla l‑khidme di wiheedi.
Da adiil walla ?
Khalaas,
guul leeha khalli tiʼaawinni ! »