Khidmit al‑rusul al‑atnaachar
9
1 Wa Isa naada talaamiizah al‑atnaachar wa antaahum sulta wa gudra achaan yaturdu ayyi cheetaan wa yachfu al‑mardaaniin.
2 Wa rassalaahum le yibachchuru al‑naas be mamlakat Allah wa yachfu al‑mardaaniin.
3 Wa gaal leehum :
« Ma tichiilu maʼaaku cheyy le l‑safar wa la asa wa la mukhla wa la akil wa la gurus.
Wa ma tichiilu maʼaaku khulgaan hana khiyaar.
4 Wa ayyi beet al‑tidallu foogah,
agoodu foogah lahaddi tamurgu min al‑hille.
5 Wa ayyi bakaan al‑ma yakhbalooku foogah,
amurgu minnah wa hittu al‑ajaaj min rijleeku wa da yabga leeku chahaada. »
6 Wa khalaas,
humman gammo yuruukhu fi kulla l‑hillaal wa yiballukhu al‑bichaara fi ayyi bakaan wa yachfu al‑mardaaniin.
Barjaal afkaar Hiruudus
7 Wa Hiruudus muhaafiz daar al‑Jaliil simiʼ khabar hana kulla cheyy al‑Isa gaaʼid yisawwiih wa hu alʼajjab bilheen.
Achaan naas waahidiin gaaʼidiin yuguulu Yahya baʼas min ust al‑maytiin.
8 Wa aakhariin gaaʼidiin yuguulu al‑nabi Iliyaas baan wa aakhariin battaan yuguulu naadum min anbiya al‑zamaan baʼas.
9 Wa Hiruudus gaal :
« Yahya da,
ana gataʼt raasah.
Wa laakin da yaatu al‑ana nasmaʼ minnah khabar misil da ?
» Wa hu dawwar yichiif Isa.
Al‑Masiih anta akil le 5 000 naas
10 Wa l‑rusul gabbalo le Isa wa khabbarooh be kulla cheyy al‑sawwooh.
Wa hu chaalaahum maʼaayah.
Wa Isa wa talaamiizah gammo macho wiheedhum fi hillit Beet Seeda.
11 Wa naas katiiriin simʼo al‑khabar wa macho waraayah.
Wa hu laagaahum adiil wa hajja leehum be mamlakat Allah wa chafa ayyi naadum al‑yidoor hu yachfiih.
12 Wa l‑makhrib garrabat wa l‑rusul al‑atnaachar jo leyah wa gaalo :
« Khalli al‑naas yamchu fi l‑hillaal wa l‑furgaan al‑mujaawiriin le yalgo bakaan yarugdu foogah wa yalgo akil.
Achaan al‑bakaan al‑aniina gaaʼidiin foogah da khala. »
13 Laakin Isa radda leehum wa gaal :
« La.
Intu bas antuuhum akil.
» Wa humman gaalo leyah :
« Indina khamsa khubza wa huut itneen bas.
Battaan inta tidoor aniina namchu nachru akil le kulla l‑naas dool walla ? »
14 Wa fi maʼaahum gariib 5 000 rujaal.
Wa Isa gaal le talaamiizah :
« Gaʼʼuduuhum khamsiin khamsiin. »
15 Wa humman gaʼʼado al‑naas misil hu gaalah leehum.
16 Wa Isa chaal al‑khubza al‑khamsa wa l‑huut al‑itneen.
Wa rafaʼ raasah ale l‑sama wa chakar Allah.
Wa kassar al‑khubza wa l‑huut wa antaahum le talaamiizah achaan yigassumuuhum le l‑naas.
17 Wa kulla l‑naas akalo lahaddi chibʼo.
Wa khalaas al‑talaamiiz lammo al‑akil al‑faddal wa malo beyah 12 guffa.
Butrus chahad le Isa
18 Wa yoom waahid,
Isa gaaʼid yisalli wiheedah.
Wa talaamiizah maʼaayah.
Wa Isa saʼalaahum wa gaal :
« Al‑naas gaaʼidiin yuguulu ana yaatu ? »
19 Wa raddo leyah wa gaalo :
« Naas waahidiin yuguulu inta Yahya al‑Mukhattis.
Wa naas aakhariin yuguulu inta al‑nabi Iliyaas wa naas aakhariin battaan yuguulu kadar inta naadum waahid min al‑anbiya al‑faato wa baʼast min ust al‑maytiin. »
20 Wa battaan saʼalaahum wa gaal :
« Wa laakin intu,
tuguulu chunu ?
Tuguulu ana yaatu ?
» Wa Butrus radda leyah wa gaal :
« Inta al‑Masiih al‑Allah rassalah. »
21 Laakin Isa amaraahum wa hazzaraahum be tahziir chadiid achaan ma yiʼooru beyah ayyi naadum.
22 Wa gaal :
« Akiid,
Ibn al‑Insaan yatʼab taʼab chadiid.
Al‑chuyuukh wa kubaaraat rujaal al‑diin wa l‑ulama yaabooh.
Wa Ibn al‑Insaan yaktuluuh wa Allah yabʼasah min ust al‑maytiin fi l‑yoom al‑taalit. »
23 Wa Isa gaal leehum kulluhum :
« Kan ayyi naadum yidoor yitaabiʼni,
khalli yichiif nafsah rakhiise leyah wa yilhammal taʼab al‑saliib kulla yoom wa yitaabiʼni le l‑moot.
24 Wa ayyi naadum al‑yidoor yinajji nafsah,
yiwaddirha.
Laakin ayyi naadum al‑yiwaddir nafsah fi chaani ana,
hu da yanja.
25 Chunu al‑faayde kan naadum ribih kulla l‑maal al‑fi l‑dunya wa laakin waddar nafsah aw hilik ?
26 Wa ayyi naadum al‑yankurni be sabab al‑eeb al‑yalga min al‑naas,
ana Ibn al‑Insaan nankurah wakit nigabbil be gudurti al‑majiide wa be gudra al‑majiide hana abuuyi Allah wa malaaʼikatah al‑mukhaddasiin.
27 Wa nuguul leeku al‑hagg,
fi naas waahidiin al‑gaaʼidiin hini ma yumuutu gubbaal ma yichiifu mamlakat Allah. »
Al‑Masiih fi nuur al‑majd
28 Wa baʼad gariib tamaane yoom min Isa gaal al‑kalaam da,
hu talaʼ fi raas hajar achaan yisalli.
Wa chaal maʼaayah Butrus wa Yuuhanna wa Yaakhuub.
29 Wa wakit hu gaaʼid yisalli,
wijhah alkhayyar giddaamhum wa khalagah bigi abyad karr misil nuur chadiid.
30 Wa daahu !
Naaseen baano wa bado yihajju maʼaayah wa humman al‑nabi Muusa wa l‑nabi Iliyaas.
31 Wa baano fi nuur majiid wa gaaʼidiin yihajju leyah be marigiinah min al‑dunya al‑yitimm fi Madiinat al‑Khudus.
32 Wa awwal Butrus wa rufgaanah,
al‑noom chaalaahum laakin gammo min al‑noom wa chaafo Isa fi nuur majiid wa l‑rujaal al‑itneen al‑waagfiin maʼaayah.
33 Wa wakit al‑rujaal al‑itneen dool dawwaro yinfargu min Isa,
Butrus hajja leyah wa gaal :
« Sayyidna,
bigi leena sameh kadar aniina gaaʼidiin hini.
Khalliina nisawwu lagaadiib talaata,
waahide leek wa waahide le Muusa wa waahide le Iliyaas.
» Wa hajja wa ma fakkar fi kalaamah.
34 Wa wakit gaaʼid yihajji al‑kalaam da,
sahaabaay waahide jaat khattathum.
Wa humman khaafo bilheen.
35 Wa hiss min lubb al‑sahaabaay ansamaʼ wa gaal :
« Da bas Ibni wa ana azaltah.
Asmaʼo kalaamah. »
36 Wa wakit al‑hiss da kammal khalaas,
chaafo Isa gaaʼid wiheedah.
Wa talaamiizah gaʼado saakit.
Wa fi l‑wakit daak,
ma ooro naadum be l‑cheyy al‑chaafooh.
Al‑wileed al‑indah amfitfit
37 Wa ambaakir,
dallo min al‑hajar wa naas katiiriin laagoohum.
38 Wa naadum waahid fi ust al‑naas aat le Isa wa gaal :
« Ya sayyidna !
Nachhadak achaan taji tichiif wileedi.
Hu wileedi al‑wahiid.
Aakhar ma indi.
39 Wa fi cheetaan waahid al‑daayman yakurbah.
Ajala ke yaji foogah wa l‑wileed yasrakh wa amfitfit tarmiih lahaddi rikhwe tamrug min khachmah.
Al‑cheetaan ma yikhalliih,
illa yitaʼʼibah chadiid wa gaaʼid yiʼazzibah bilheen.
40 Wa ana chahadt talaamiizak achaan yaturdu minnah al‑cheetaan wa laakin humman ma gidro. »
41 Wa Isa gaal :
« Ya l‑naas al‑uwuj wa ma induku iimaan !
Lahaddi mata nagood maʼaaku wa nilhammalku ?
Jiib wileedak hini ! »
42 Wa wakit al‑wileed gaaʼid yigarrib le Isa,
al‑cheetaan ramaah tihit wa sawwa leyah amfitfit.
Laakin Isa kachcha le l‑cheetaan wa chafa al‑wileed wa gabbalah le abuuh.
43 Wa kulla l‑naas alʼajjabo bilheen le gudrat Allah al‑majiide.
Wa laakin wakit kulla l‑naas gaaʼidiin yihajju be kulla l‑ajaayib al‑Isa gaaʼid yisawwiihum,
hu hajja le talaamiizah
44 wa gaal :
« Asmaʼo kalaami wa akurbuuh fi guluubku.
Baʼad chiyya,
Allah yisallim Ibn al‑Insaan le l‑naas. »
45 Laakin ma fihmo kalaamah.
Maʼana kalaamah mulabbad leehum lahaddi ma irfooh.
Wa ma saʼalooh minnah achaan humman khaayfiin.
Al‑sakhayyar bas al‑kabiir
46 Wa talaamiiz Isa bado yilkhaalato ambeenaathum fi yaatu minhum al‑yabga kabiir.
47 Wa Isa irif fikir guluubhum wa jaab leehum wileed sakhayyar wa waggafah fi jambah.
48 Wa gaal leehum :
« Al‑naadum al‑yakhbal al‑wileed da be usmi,
hu yakhbalni ana.
Wa l‑yakhbalni yakhbal al‑rassalaani.
Achaan al‑naadum al‑sakhayyar minku kulluku,
hu bas al‑kabiir. »
49 Wa Yuuhanna radda leyah wa gaal :
« Sayyidna,
chifna naadum waahid al‑gaaʼid yatrud al‑chawaatiin be usmak.
Wa dawwarna nadharooh achaan hu ma gaaʼid yitaabiʼak maʼaana. »
50 Wa Isa gaal :
« Ma tadharooh.
Achaan al‑naadum al‑ma yidaawisku hu yisaaʼidku. »
Al‑hille al‑Saamiriiye
51 Wa l‑wakit al‑yinrafiʼ foogah Isa fi l‑sama garrab.
Wa achaan da,
hu kharrar wa chaal niiye le yiwajjih ale Madiinat al‑Khudus.
52 Wa rassal murassaliin giddaamah achaan yijahhuzu leyah kulla cheyy.
Wa dakhalo fi hille waahide wa hi hille hana Saamiriyiin.
53 Laakin naasha abooh le Isa achaan hu muwajjih ale Madiinat al‑Khudus.
54 Wakit talaamiizah Yaakhuub wa Yuuhanna chaafo kadar al‑naas dool abooh le Isa,
humman gaalo :
« Ya sayyidna,
ninaadu naar tanzil min al‑sama taakulhum walla ? »
55 Laakin Isa anlafat leehum wa harajaahum.
56 Wa macho fi hille aakhara.
Al‑churuut le l‑yitaabuʼuuh
57 Wa wakit Isa wa jamaaʼtah maachiin fi l‑derib,
naadum waahid ja hajja leyah wa gaal :
« Nitaabiʼak fi ayyi bakaan al‑tamchi foogah. »
58 Wa Isa radda leyah wa gaal :
« Al‑baʼachoom indah nugra wa l‑teer indah uchch wa laakin Ibn al‑Insaan ma indah bakaan yargud foogah. »
59 Wa Isa naada naadum aakhar wa gaal :
« Taʼaal taabiʼni.
» Laakin al‑naadum radda leyah wa gaal :
« Sayyidna,
antiini izin achaan nadfin abuuyi gubbaal ma nitaabiʼak. »
60 Wa Isa radda leyah wa gaal :
« Khalli al‑maytiin yadfunu maytiinhum.
Laakin inta da,
amchi ballikh bichaarat mamlakat Allah. »