Al‑Masiih anta akil le 4 000 naas
8
1 Wa fi l‑wakit da,
naas katiiriin bilheen lammo achaan yasmaʼo kalaam Isa.
Wa l‑naas ma induhum cheyy hana akil.
Wa Isa naada talaamiizah wa gaal :
2 « Indi mahanna le l‑naas dool achaan humman gaaʼidiin maʼaayi min talaata yoom wa ma induhum cheyy yaakuluuh.
3 Wa kan nikhalliihum yamchu min hini jiiʼaaniin,
gudrithum tabga chiyya wa ma yalhago buyuuthum achaan waahidiin minhum jo min bakaan baʼiid. »
4 Wa talaamiizah raddo leyah wa gaalo :
« Ween nalgo akil fi l‑khala da,
achaan nantuuh le kulla l‑naas dool ? »
5 Wa Isa saʼalaahum wa gaal :
« Induku kam khubza ?
» Wa raddo leyah wa gaalo :
« Sabʼa. »
6 Wa Isa amaraahum le l‑naas achaan yagoodu tihit.
Wa chaal al‑sabʼa khubza wa chakar Allah wa kassaraahum wa antaahum le talaamiizah achaan yantuuhum le l‑naas.
7 Wa induhum huut dugaag chiyya kula.
Wa Isa chakar Allah wa amaraahum le talaamiizah achaan yantuuhum le l‑naas.
8 Wa kulla l‑naas akalo lahaddi chibʼo.
Wa l‑talaamiiz lammo al‑akil al‑faddal wa tamma sabʼa guffa.
9 Wa adad al‑naas al‑akalo tamma 4 000 wa khalaas Isa amaraahum yigabbulu fi buyuuthum.
10 Wa tawwaali hu rikib fi l‑markaba maʼa talaamiizah wa macho le mantagat Dalmaanuusa.
Talabo min al‑Masiih daliil
11 Wa naas min al‑Fariiziyiin macho le Isa wa gammo yinaakhuchu maʼaayah.
Wa le yijarrubuuh,
humman talabo minnah daliil al‑yiwassif kadar gudurtah jaaye min al‑sama.
12 Wa hu addaayag minhum lahaddi chaal nafasah foog wa khattaah wa gaal :
« Maala naas al‑wakit da yidooru daliil ?
Nuguul leeku al‑hagg.
Allah ma yanti naas al‑wakit da daliil. »
13 Wa khalaas,
khallaahum wa rikib fi l‑markaba wa gamma le yagtaʼ al‑bahar.
Tawwaarit al‑Fariiziyiin wa Hiruudus
14 Wa talaamiizah niso ma jaabo al‑akil maʼaahum.
Wa induhum khubza waahide bas fi l‑markaba.
15 Wa Isa gaaʼid yihazzirhum wa yuguul :
« Khuttu baalku.
Angarʼu min tawwaarit al‑Fariiziyiin wa tawwaarit Hiruudus. »
16 Wa gammo yinaakhuchu ambeenaathum fi kalaamah wa gaalo :
« Hu gaal al‑kalaam da achaan ma indina khubza. »
17 Wa Isa irif fikirhum wa gaal :
« Maala tihajju be l‑khubza al‑ma induku ?
Lissaaʼ ma iriftu wa fihimtu walla ?
Wa ruuseeku bigo gawiyiin walla ?
18 Intu induku uyuun wa ma chiftu ?
Induku udne wa ma simiʼtu ?
Nisiitu marra waahid walla ?
19 Fakkuru fi l‑khamsa khubza al‑ana kassartuhum fi chaan al‑naas al‑khamsa alif.
Maleetu kam guffa min al‑khubza al‑faddalat ?
» Wa raddo leyah wa gaalo :
« Atnaachar guffa. »
20 Wa battaan saʼalaahum wa gaal :
« Fakkuru fi l‑sabʼa khubza al‑anteethum le l‑naas al‑arbaʼa alif.
Maleetu kam guffa ?
» Wa gaalo :
« Sabʼa guffa. »
21 Wa Isa gaal leehum :
« Lissaaʼ ma fihimtu walla ? »
Al‑Masiih daawa naadum amyaan
22 Wa jo fi hillit Beet Seeda.
Wa naas waahidiin jaabo leyah naadum amyaan.
Wa chahado Isa achaan yalmasah wa yidaawiih.
23 Wa Isa karab iid al‑amyaan wa waddaah barra min al‑hille.
Wa bazzakh leyah fi uyuunah wa khatta iideenah foogah wa saʼalah wa gaal :
« Inta gaaʼid tichiif walla ? »
24 Wa l‑amyaan rafaʼ raasah wa gaal :
« Nichiif rujaal.
Wa laakin yichaabuhu misil chadar raaykhiin. »
25 Wa battaan Isa khatta iideenah foog uyuunah.
Wa l‑naadum fakka uyuunah battaan wa chaaf kulla cheyy adiil wa khalaas ligi al‑aafe.
26 Wa Isa gaal leyah :
« Gabbil beetak.
Al‑hille di,
ma tadkhul foogha battaan. »
Kalaam Butrus fi l‑Masiih
27 Wa Isa macha giddaam maʼa talaamiizah fi hillaal hana Geesariiya Filibbus.
Wa wakit maachiin,
hu saʼalaahum le talaamiizah wa gaal :
« Al‑naas gaaʼidiin yuguulu ana yaatu ? »
28 Wa raddo leyah wa gaalo :
« Naas waahidiin yuguulu inta Yahya al‑Mukhattis.
Wa naas aakhariin yuguulu inta al‑nabi Iliyaas.
Wa aakhariin kamaan yuguulu inta naadum waahid min al‑anbiya al‑faato. »
29 Wa battaan Isa saʼalaahum wa gaal :
« Wa laakin intu,
tuguulu chunu ?
Tuguulu ana yaatu ?
» Wa Butrus radda leyah wa gaal :
« Inta al‑Masiih. »
30 Wa Isa hazzaraahum be tahziir chadiid achaan ma yiʼooru beyah ayyi naadum.
Al‑Masiih hajja be mootah wa buʼaasah
31 Wa Isa bada yiʼallim talaamiizah wa yuguul leehum :
« Ibn al‑Insaan akiid yatʼab taʼab chadiid wa l‑chuyuukh wa kubaaraat rujaal al‑diin wa l‑ulama yaabooh.
Wa hu yaktuluuh wa fi l‑yoom al‑taalit,
yabʼas min ust al‑maytiin. »
32 Wa gaal al‑kalaam da be kalaam waadih.
Wa Butrus karabah le Isa wa gamma yaharjah.
33 Wa Isa anlafat wa chaaf talaamiizah wa haraj Butrus wa gaal :
« Ya Cheetaan,
kiss min giddaami !
Kalaamak da ma fikir Allah.
Da fikir al‑naas. »
34 Wa Isa naada kulla l‑naas achaan yilimmu maʼa talaamiizah.
Wa gaal leehum :
« Ayyi naadum al‑yidoor yitaabiʼni khalli yichiif nafsah rakhiise leyah wa yilhammal taʼab al‑saliib wa yitaabiʼni le l‑moot.
35 Achaan ayyi naadum al‑yidoor yinajji nafsah,
yiwaddirha.
Laakin ayyi naadum al‑yiwaddir nafsah fi chaani ana wa fi chaan al‑bichaara,
yanja.
36 Kan naadum ribih kulla l‑maal al‑fi l‑dunya wa waddar nafsah,
faayditah chunu ?
37 Wa naadum yanti chunu fi badal nafsah ?
38 Akiid naas al‑wakit al‑haali muznibiin wa khaayniin.
Wa ayyi naadum al‑yankurni be sabab al‑eeb al‑yalgaah minhum,
ana Ibn al‑Insaan nankurah wakit nigabbil be gudrat abuuyi Allah al‑majiide maʼa malaaʼikatah al‑mukhaddasiin. »