Al‑khilaaf fi aadaat al‑juduud
7
1 Wa fi l‑bakaan da,
fi Fariiziyiin wa ulama waahidiin al‑jo min Madiinat al‑Khudus.
Humman gaaʼidiin fi ust al‑naas al‑yasmaʼo kalaam Isa.
2 Wa chaafo kadar waahidiin min talaamiizah ma khassalo iideehum gubbaal ma yaakulu.
Wa fi aadaat al‑Fariiziyiin,
kan naadum ma khassal iideenah gubbaal al‑akil iideenah ma taahiriin.
3 Wa l‑Fariiziyiin wa kulla l‑Yahuud ma yaakulu illa kan khassalo iideehum wa bigo taahiriin hasab aadaat juduudhum.
4 Wa kan yigabbulu min al‑suug,
yikhassulu iideehum le yabgo taahiriin gubbaal ma yaakulu cheyy.
Wa yitaabuʼu aadaat katiiriin misil yikhassulu wa yitahhuru ayyi kooro wa sakhkhaan wa ayyi maaʼuun hana nahaas wa furaach hasab al‑aadaat dool.
5 Wa l‑Fariiziyiin wa l‑ulama saʼalo Isa wa gaalo :
« Maala talaamiizak ma yitaabuʼu aadaat al‑juduud ?
Maala ma yikhassulu iideehum wa yabgo taahiriin gabul ma yaakulu ? »
6 Wa Isa radda leehum wa gaal :
« Kalaam al‑nabi Ichaʼya sahiih.
Hu hajja foogku intu al‑munaafikhiin.
Maktuub fi kitaab Ichaʼya,
Allah gaal :
﴾Al‑chaʼab dool yimajjuduuni be kalaam khuchuumhum
wa laakin guluubhum baʼiid minni.
7 Sujuudhum leyi baatil
wa kulla taʼliimhum da wasaaya al‑naas bas.﴿*
8 Achaan intu khalleetu minku wasiiyat Allah wa ankarabtu fi aadaat al‑naas ! »
9 Wa battaan Isa gaal leehum :
« Mabruuk leeku !
Ligiitu al‑derib al‑yikhalliiku tankuru wasiiyat Allah wa titaabuʼu aadaatku fi badalha.
10 Akiid Muusa gaal :
﴾Karrim ammak aw abuuk﴿* wa ﴾Kan naadum ayyar ammah aw abuuh,
waajib yaktuluuh.﴿*
11 Laakin intu tuguulu kan naadum hajja le ammah aw le abuuh wa gaal :
‹ Kulli cheyy al‑ana nidoor nisaaʼidku beyah bigi khurbaan.
› Wa l‑khurbaan da,
hu hadiiye al‑naadum yantiiha le Allah.
12 Wa be da,
tuguulu ma waajib al‑naadum yisaaʼid ammah aw abuuh.
13 Wa misil da,
tibattulu kalaam Allah achaan titaabuʼu aadaatku al‑tiʼallumuuhum le l‑naas.
Wa tisawwu cheyy katiir misil da. »
Al‑cheyy al‑yinajjis al‑naadum
14 Wa battaan Isa naada al‑naas wa gaal leehum :
« Kulluku asmaʼo kalaami wa afhamo !
15 Ma fi cheyy al‑naadum yidissah fi khachmah wa yinajjisah.
Laakin al‑cheyy al‑yamrug min daakhil al‑naadum,
da bas al‑yinajjisah.
16 Ayyi naadum al‑indah adaan khalli yasmaʼ. »
17 Wa wakit Isa gamma min al‑naas wa dakhal fi l‑beet,
talaamiizah saʼalooh min al‑maʼana hana l‑masal da.
18 Wa Isa gaal leehum :
« Intu kula ma iriftuuh walla ?
Ma fihimtu kadar ma fi cheyy al‑yadkhul fi khachum al‑naadum wa yinajjisah
19 achaan al‑akil ma yamchi fi galbah ?
Wa laakin yamchi fi batnah bas wa baʼadeen yamrug min jildah.
» Wa be l‑kalaam da,
Isa jaʼal kulla cheyy min al‑akil taahir.
20 Wa battaan Isa gaal :
« Al‑yamrug min daakhil al‑naadum,
da bas al‑yinajjisah.
21 Achaan min daakhal al‑insaan wa min galbah yamrug al‑fikir al‑cheen misil al‑chahwa al‑fasle wa l‑sirge wa l‑katil
22 wa l‑zina wa l‑tamaʼ wa l‑fasaala wa l‑khachch wa l‑fasaad wa een al‑naas wa l‑gatiiʼe wa l‑istikbaar wa l‑amal al‑bala fikir.
23 Kulla l‑achya dool jaayiin min daakhal galib al‑insaan wa dool bas al‑yinajjusuuh ».
Iimaan al‑mara al‑Lubnaaniiye
24 Wa Isa gamma min al‑bakaan da wa macha fi balad Suur.
Wa dalla fi beet waahid wa ma dawwar al‑naas yaʼarfu kadar hu gaaʼid fi l‑beet da.
Laakin be da kula,
al‑naas ligo khabarah.
25 Wa mara waahide indaha bineeye muchootine wa min simʼat be l‑khabar da,
tawwaali jaat le Isa wa sajadat giddaamah.
26 Wa l‑mara di ma min al‑Yahuud.
Hi Lubnaaniiye.
Wa chahadat Isa achaan yatrud al‑cheetaan min bittaha.
27 Wa Isa radda leeha be masal wa gaal :
« Khalli al‑iyaal yaakulu awwal.
Akil al‑iyaal da kan nantuuh le l‑kulaab da,
ma sameh ».
28 Wa hi raddat leyah wa gaalat :
« Sayyidna,
kalaamak sahiih.
Wa laakin al‑kulaab al‑fi l‑hooch yaakulu al‑akil al‑yidaffig min al‑sufra wakit al‑iyaal gaaʼidiin yaakulu kula ».
29 Wa Isa gaal leeha :
« Khalaas,
gabbili beetki.
Be sabab kalaamki da,
al‑cheetaan marag min bittiki ».
30 Wa l‑mara gammat machat beetha wa ligat al‑bineeye aafe.
Hi raagde fi l‑sariir wa l‑cheetaan al‑awwal gaaʼid foogha,
marag.
Al‑Masiih daawa naadum abkam
31 Wa baʼad da,
Isa gamma min turaab Suur wa chagga turaab Seeda wa balad al‑Mudun al‑Achara wa lihig bahar al‑Jaliil.
32 Wa jaabo leyah naadum ambuuku wa ma yihajji adiil.
Wa chahado Isa achaan yukhutt foogah iideenah wa yachfiih.
33 Wa Isa waddaah chiyya baʼiid min al‑naas wa dassa leyah usbaʼah al‑waahid fi adaanah al‑zeene wa usbaʼah al‑aakhar fi adaanah al‑isra.
Wa baʼad da,
hu bazzakh fi iideenah wa limis lisaan al‑naadum.
34 Wa rafaʼ raasah wa chaaf foog fi l‑sama wa ganat wa hajja leyah wa gaal :
« Affata »* wa maʼanaatah abga faatih.
35 Wa udneeyah anfataho wa lisaanah anhalla wa gamma yihajji kalaam waadih.