Kalaam al‑nabi Yahya
3
1 Fi l‑zaman daak,
Yahya al‑Mukhattis ja yibachchir al‑naas fi kadaadit daar al‑Yahuudiiya.
2 Wa yuguul :
« Yalla !
Tuubu min zunuubku !
Achaan mamlakat Allah garrabat. »
3 Wa Yahya hu al‑naadum al‑hajja beyah zamaan al‑nabi Ichaʼya.
Wa l‑nabi gaal :
﴾Fi hiss gaaʼid yiʼiit fi l‑khala
wa yuguul :
« Jahhuzu derib al‑Rabb wa
addulu leyah al‑turug.
»﴿*
4 Wa Yahya laabis khalag min suuf albil wa raabit sulbah be seer wa gaaʼid yaakul jaraad wa asal al‑nahal.
5 Wa naas marago wa macho leyah min Madiinat al‑Khudus wa min kulla daar al‑Yahuudiiya wa min kulla l‑hillaal al‑jamb bahar al‑Urdun.
6 Wa aʼtarafo be zunuubhum wa Yahya khattasaahum fi bahar al‑Urdun.
7 Wa Yahya chaaf ambeenaathum naas katiiriin min al‑Fariiziyiin wa l‑Sadduukhiyiin.
Wa humman maachiin leyah achaan hu yikhattishum.
Wa gaal leehum :
« Ya iyaal al‑daabi !
Yaatu al‑gaal leeku ajru min al‑azaab al‑jaayi ?
8 Sawwu al‑amal al‑yiwassif kadar intu tubtu be l‑sahiih !
9 Wa ma tukhuchchu nufuusku.
Ma tuguulu :
‹ Ma indina eeb achaan aniina iyaal Ibraahiim.
› Nuguul leeku Allah yagdar yichiil hujaar min al‑turaab wa yisawwi minhum iyaal le Ibraahiim fi badalku !
10 Chiifu,
al‑faas jaahize le tagtaʼ al‑chadara min irigha.
Ayyi chadara al‑ma talda iyaal adiiliin yagtaʼooha wa yazguluuha fi l‑naar.
11 « Ana nikhattisku be almi achaan intu tubtu min zunuubku.
Wa laakin naadum waahid jaayi waraayi gaadir minni bilheen wa ana ma tammeet leyah khaddaam kula.
Wa hu yikhattisku be l‑Ruuh al‑Khudduus wa be naar.
12 Wa indah tabag fi iideenah le yikharbilku misil al‑khalla.
Wa yilimm khallitah min al‑madagg wa yusubbaha fi dabangitah.
Wa laakin al‑uttaab yutuchchah fi l‑naar al‑ma tumuut abadan. »
Al‑Masiih khattasooh
13 Wa Isa marag min daar al‑Jaliil wa macha fi bahar al‑Urdun achaan Yahya yikhattisah.
14 Wa laakin Yahya bada yaaba wa gaal :
« Waajib ana naji leek achaan inta tikhattisni !
Wa kikkeef tidoor ana nikhattisak ? »
15 Wa Isa gaal leyah :
« Ma taaba.
Khalli yabga misil da achaan nitimmu kulla cheyy al‑Allah bidoorah.
» Wa khalaas,
Yahya khassad wa khattasah.