Ziyaarat al‑munajjimiin
2
1 Wildo Isa fi hillit Beet Laham fi daar al‑Yahuudiiya fi zaman al‑malik Hiruudus.
Wa baʼad wildooh,
musaafiriin waahidiin jo le Madiinat al‑Khudus min sabaah.
Wa humman munajjimiin.*
2 Wa saʼalo al‑naas wa gaalo :
« Ween malik al‑Yahuud al‑dahaabah wildooh ?
Chifna najmatah ale l‑sabaah wa jiina achaan nasjudu leyah. »
3 Wa l‑malik Hiruudus simiʼ al‑kalaam da wa barjal.
Wa kulla naas Madiinat al‑Khudus barjalo maʼaayah.
4 Wa l‑malik naada kubaaraat rujaal al‑diin wa l‑ulama achaan yilimmu giddaamah.
Wa saʼalaahum wa gaal :
« Ween al‑bakaan al‑yaldo foogah al‑Masiih ? »
5 Wa humman raddo leyah wa gaalo :
« Yaldooh fi Beet Laham fi daar al‑Yahuudiiya achaan kalaam al‑nabi al‑maktuub fi l‑Kitaab buguul :
6 ﴾Ya Beet Laham fi daar Bani Yahuuza,
inti ma hille al‑askhar le hukkaam Yahuuza
achaan naadum waahid yamrug minki
wa hu al‑haakim al‑yabga raaʼi
le ummati Bani Israaʼiil.﴿
»*
7 Wa fi l‑bakaan da,
Hiruudus naada al‑munajjimiin be achiir wa saʼalaahum achaan yaʼarif minhum al‑yoom al‑awwal al‑baanat foogah al‑najma.
8 Wa wakit simiʼ kalaamhum,
rassalaahum le Beet Laham wa gaal leehum :
« Amchu wa fattuchu adiil.
Wa wakit ligiitu al‑sakhiir,
taʼaalu ooruuni achaan ana kula namchi nasjud leyah. »
9 Wa wakit simʼo kalaam al‑malik,
chaalo al‑derib wa faato.
Wa chaafo al‑najma al‑chaafooha awwal ale l‑sabaah wa hi tazhaf giddaamhum lahaddi wigfat fi l‑bakaan al‑gaaʼid foogah al‑wileed.
10 Wa wakit chaafo al‑najma,
humman bigo farhaaniin marra waahid.
11 Wa dakhalo fi lubb al‑beet wa ligo al‑sakhiir maʼa ammah Mariyam wa sajado leyah.
Wa jaabo hadaaya khaaliyiin wa fakkoohum wa gaddamoohum le Isa.
Antooh dahab wa dukhkhaan wa lubaan wa sibir.
12 Wa Allah hajja leehum fi hilim wa ooraahum ma waajib yigabbulu le Hiruudus wa khalaas,
gabbalo daarhum be derib aakhar.
Al‑Masiih macha Masir
13 Baʼad al‑munajjimiin faato khalaas,
waahid min malaaʼikat Allah ja le Yuusuf fi hilim wa gaal leyah :
« Yalla gumm !
Chiil al‑sakhiir wa ammah wa amchi beehum fi Masir.
Agood hinaak wa ma tigabbil lahaddi nantiik izin.
Achaan Hiruudus yifattich al‑sakhiir wa yidoor yaktulah. »
14 Wa Yuusuf gamma be leel wa chaal al‑sakhiir wa ammah wa jara beehum le Masir.
15 Wa gaʼad hinaak lahaddi Hiruudus maat.
Wa misil da,
al‑kalaam al‑Allah gaalah zamaan be khachum al‑nabi tamma :
﴾Min Masir ana naadeet Ibni.﴿*
16 Wakit Hiruudus irif al‑munajjimiin khachchooh,
hu bigi zaʼlaan bilheen.
Wa fakkar fi l‑kalaam al‑gaalooh leyah fi wakit al‑najma baanat foogah wa rassal askarah fi Beet Laham wa l‑hillaal al‑jambaha.
Wa amaraahum achaan yaktulu ayyi wileed al‑umrah naagis min santeen.
17 Wa misil da,
al‑kalaam al‑Allah gaalah zamaan be khachum al‑nabi Irmiya tamma.
18 Hu gaal :
﴾Ansamaʼ hiss fi hillit al‑Raama,
baki chadiid wa nuwaah.
Wa di Raahiil gaaʼide tabki le iyaalha
wa abat al‑sabbiriin
achaan humman maato khalaas.﴿*
Al‑Masiih yaskun fi l‑Naasira
19 Wa wakit Hiruudus maat,
Yuusuf gaaʼid fi Masir wa waahid min malaaʼikat Allah ja leyah fi hilim.
20 Wa gaal :
« Gumm !
Chiil al‑sakhiir wa ammah wa gabbil beehum fi daar Israaʼiil achaan al‑naas al‑dawwaro yaktulu al‑sakhiir maato khalaas. »
21 Wa Yuusuf gamma wa chaal al‑sakhiir wa ammah wa gabbal beehum fi daar Israaʼiil.
22 Wa laakin Arkhalaawus bigi malik fi daar al‑Yahuudiiya fi badal abuuh Hiruudus.
Wa min Yuusuf simiʼ al‑khabar da,
khaaf wa ma dawwar yamchi hinaak.
Wa Allah kallam leyah fi hilim wa hu chaal derib hana daar al‑Jaliil.
23 Wa wisil fi hille waahide al‑usumha al‑Naasira wa gaʼad hinaak.
Wa misil da,
al‑kalaam al‑anbiya gaalo tamma.
Gaalo :
﴾Yinaaduuh al‑Naasiri.﴿