Ruʼyat al‑faanuus wa chadar al‑zaytuun
4
1 Wa l‑malak al‑gaaʼid yihajji leyi gabbal ja wa gawwamaani misil yigawwumu naadum min al‑noom.
2 Wa hu gaal leyi :
« Gaaʼid tichiif chunu ?
» Wa ana gult :
« Gaaʼid nichiif faanuus kulla ke hana dahab wa l‑bakaan al‑yusubbu foogah al‑dihin gaaʼid min foog leyah wa indah sabʼa tiyeesaat al‑induhum sabʼa niiraan.
3 Wa jaay wa jaay le l‑bakaan al‑yusubbu foogah al‑dihin,
nichiif chadar itneen hana zaytuun,
al‑waahide be l‑zeene wa l‑aakhara be l‑isra. »
4 Wa ana saʼalt al‑malak al‑gaaʼid yihajji leyi wa gult :
« Da maʼanaatah chunu,
ya siidi ? »
5 Wa l‑malak gaal :
« Al‑cheyy al‑gaaʼid tichiifah da,
maʼanaatah ma taʼarfah walla ?
» Wa ana gult :
« La,
ya siidi. »
6 Wa khalaas,
hu gaal leyi :
« Allah hajja le Zarubaabil wa gaal :
‹ Al‑khidme di ma be khuwwa
wa la be gudra
wa laakin be ruuhi ana.
Wa da,
Allah al‑Gaadir bas gaalah.
7 Inta tahsib nafsak kabiir,
ya l‑jabal ?
Giddaam Zarubaabil tagaʼ
wa tabga sahale bas.
Wa kan Zarubaabil yijiib
aakhir hajar le yabnu beeti,
al‑naas yiʼiitu wa yuguulu :
“Mabruuk !
Mabruuk le l‑hajar !”
› »
8 Wa Allah hajja leyi ana Zakariiya wa gaal :
9 « Iideen Zarubaabil khatto asaas al‑beet da
wa iideenah bas yikammuluuh. »
Wa be da,
taʼarfu kadar Allah al‑Gaadir bas rassalaani leeku.
10 « Ma tahguru yoom hana bidaaya sakhayre.
Tafraho wakit tichiifu fi iid Zarubaabil
durdumt al‑hadiid al‑yigaawusu beyah. »
Wa l‑niiraan al‑sabʼa hana l‑faanuus dool yimassulu uyuun Allah al‑gaaʼidiin yiraakhubu kulla l‑ard.
11 Wa battaan,
ana saʼalt al‑malak wa gult :
« Chadar al‑zaytuun al‑itneen al‑ana chiftah jaay wa jaay le l‑faanuus be l‑zeene wa l‑isra,
maʼanaatah chunu ? »
12 Wa saʼaltah le taani marra wa gult :
« Chunu maʼana hana l‑furuuʼ al‑itneen hana chadar al‑zaytuun al‑gaaʼidiin jamb al‑majaari al‑itneen hana l‑dahab al‑yisiil minhum al‑dihin al‑dahbi ? »
13 Wa hu radda leyi wa gaal :
« Ma taʼarif maʼanaatah walla ?
» Wa ana gult :
« La,
ya siidi. »
14 Wa khalaas,
hu gaal leyi :
« Dool yimassulu al‑rujaal al‑itneen al‑masahoohum be l‑dihin wa khassasoohum le yagiifu giddaam Allah siid kulla l‑ard. »