Allah hazzar al‑kubaaraat al‑zaalimiin
3
1 Wa ana Miikha gult :
« Asmaʼo,
ya kubaaraat zurriiyit Yaakhuub
wa hukkaam Bani Israaʼiil.
Ma intu bas
al‑waajib taʼarfu al‑adaala walla ?
2 Wa laakin intu takraho al‑kheer
wa tihibbu al‑charr.
Taslakho farwit al‑naas min jisimhum
wa tagtaʼo lahamhum
wa tikhallu illa udaamhum.
3 Intu taakulu laham chaʼabi
wa taslakho farwithum
wa tikassuru udaamhum.
Wa tigattuʼu laham chaʼabi
misil tusubbuuh fi burma
wa tirakkubuuh fi kalool. »
4 Wa khalaas,
al‑zaalimiin dool yasʼalo Allah
wa laakin hu ma yurudd leehum.
Fi l‑wakit da,
hu ma yiwajjih aleehum
achaan humman sawwo amal fasil.
Kalaam Allah didd al‑anbiya
5 Wa daahu Allah gaal kalaam didd al‑anbiya al‑yiwadduru chaʼabah :
« Kan sunuunhum ligo chokhol yaakuluuh,
humman yuguulu :
‹ Salaam,
Salaam ! ›
Wa laakin kan naadum ma dassa leehum cheyy fi khachumhum,
yinaadu diddah be l‑harib !
6 Wa fi chaan da,
intu al‑anbiya,
yabga leeku leel bala ruʼya.
Wa yabga leeku dalaam,
ma tagdaro tichawwufu.
Wa l‑harraay tagaʼ leeku,
ya l‑anbiya,
wa l‑yoom yidallim leeku. »
7 Aywa,
al‑yichiifu ruʼya yalgo al‑eeb
wa l‑chawwaafiin yalgo al‑chamaate.
Wa humman yikhattu wujuuhhum
achaan al‑Rabb ma radda leehum.
8 Wa laakin ana malaan be gudra
achaan Ruuh Allah nazal foogi.
Wa indi al‑adaala wa l‑fahaaliiye
le nikhabbir zurriiyit Yaakhuub be isyaanhum
wa Bani Israaʼiil be zanibhum.
Miikha khabbar be damaar al‑madiina
9 Asmaʼo al‑kalaam da,
ya kubaaraat zurriiyit Yaakhuub
wa ya hukkaam Bani Israaʼiil.
Intu tiharrumu al‑adaala
wa tiʼawwuju ayyi cheyy al‑adiil.
10 Baneetu Sahyuun be damm
wa Madiinat al‑Khudus be zulum.
11 Wa l‑gudiya yagtaʼo chariiʼa be l‑rachwa
wa rujaal al‑diin yiʼallumu kalaam Allah le yalgo faayde
wa l‑anbiya yitnabbaʼo le yalgo fudda.
Humman yitwakkalo ale Allah wa yuguulu :
« Allah ma gaaʼid fi usutna walla ?
Al‑fasaala abadan ma talhagna ! »
12 Wa fi chaan da,
be sababku intu,
Sahyuun yahartuuha misil zereʼ
wa Madiinat al‑Khudus tabga koom hana turaab
wa raas jabal beet Allah yabga khaaba.