Azaab le l‑zaalimiin !
2
1 Al‑azaab le l‑yanwu al‑fasaala
wa yikhattutu al‑charr be l‑leel !
Be fajur,
yugummu yisawwu khittithum
achaan induhum al‑gudra le yisawwuuha.
2 Humman yatmaʼo fi ziraaʼat al‑aakhariin
wa yaglaʼoohum
wa yitmanno al‑buyuut wa yichiiluuhum.
Yazulmu al‑naas wa aayilaathum
wa rujaal wa warasathum.
3 Wa fi chaan da,
daahu Allah gaal :
« Chiifu,
ana nanwi al‑fasaala le gabiilitku di
wa intu ma tagdaro tinajju nufuusku.
Ma tagdaro turuukhu raasku marfuuʼ
achaan da wakt al‑fasaala. »
4 Wa fi l‑yoom da,
yadurbu foogku masal
wa yunuuhu nuwaah wa yuguulu :
« Kammaloona wa kharaboona !
Allah baddal ard warasatna be balad al‑khurba.
Wa galaʼ minnina ardina
wa gassam warasatna le udwaanna. »
5 Wa fi chaan da,
kan jamaaʼat Allah
yigaawusu al‑ard battaan,
ma fi naadum minku al‑yalga gisim.
Al‑anbiya al‑yitnabbaʼo be kidib
6 Wa naas waahidiin gaalo leyi :
« Ma titnabbaʼ misil da !
Ma tuguul kadar nalgo al‑eeb.
La !
Waddiriin al‑charaf ma yabga. »
7 Ya zurriiyit Yaakhuub,
da bingaal walla ?
Hal sabur Allah kammal walla ?
Wa misil da bas,
hu yugumm walla ?
Wa kalaami ma yijiib al‑kheer
le l‑naadum al‑yamchi adiil walla ?
8 Lahaddi hassaʼ,
intu chaʼabi bigiitu udwaan Allah.
Al‑naas al‑yigabbulu min al‑harib
wa yahsubu induhum amaan,
intu tisillu khulgaanhum.
9 Wa le awiin chaʼabi,
taturduuhin
ayyi waahide min beetha al‑tiriidah.
Wa ayyi wakit,
taglaʼo min iyaalhin
al‑charaf al‑Allah antaahum.
10 Yalla gummu amchu !
Al‑balad di battaan
ma indaha leeku raaha
achaan be najaasitku,
jibtu foogha al‑damaar
wa da damaar kaamil marra waahid !
11 Wa kan naadum yajri wara l‑riih
wa yitnabbaʼ be kidib wa yuguul :
« Ana nitnabbaʼ leeku be khamar wa mariise »,
da bas al‑nabi al‑waajib leeku intu al‑chaʼab da !
Allah yilimm chaʼabah
12 Wa Allah gaal :
« Akiid ana nilimmuku kulluku,
ya zurriiyit Yaakhuub
wa najmaʼku kulluku al‑faddaltu
min Bani Israaʼiil.
Wa nijiibku sawa misil khanam fi l‑zariibe
wa misil door fi ust al‑marʼa.
Wa tabgo majmuuʼa kabiire
al‑indaha haraka.
13 Wa l‑yufukk leeku al‑khurma
yamchi giddaamku.
Intu tufukku al‑khurma
wa tufuutu be l‑baab
wa tamurgu beyah.
Wa malikku yamchi giddaamku.
Aywa,
ana Allah ale raasku. »