Kitaab Miikha
min Kutub al‑Anbiya
Mugaddima
Miikha hu nabi al‑rassalah Allah be kalaamah le mamlakat Yahuuza wa mamlakat Israaʼiil. Wa da fi wakit askar balad Achuur gaaʼidiin yidaayugu al‑mamaalik dool. Wa baʼad dammaro mamlakat Israaʼiil wa kharabo aasimatha al‑Saamira, Miikha hazzar naas mamlakat Yahuuza wa gaal leehum kadar Allah yidoor humman yisawwu al‑adaala wa yihibbu al‑kheer wa yimaskunu nufuushum wa yamchi adiil fi derbah. Wa gaal kan ma macho adiil, humman kula yabga fooghum misil al‑bigi fi mamlakat Israaʼiil wa Madiinat al‑Khudus kula yabga foogha misil al‑bigi fi madiinat al‑Saamira.
Wa kitaab Miikha yihajji be kikkeef Allah laam chaʼabah be sabab amalhum al‑fasil misil gillit al‑adil wa sawwiyiin al‑unuf wa katil al‑dimam wa l‑nahib wa l‑sirge wa battaan ibaadat al‑asnaam. Wa l‑mathuumiin dool, humman kubaaraat al‑chaʼab wa l‑gudiya wa rujaal al‑diin wa l‑anbiya. Wa fi chaan amalhum da, chaʼab Madiinat al‑Khudus yakurbuuhum wa yiwadduuhum fi l‑khurba.
Wa l‑kitaab da yihajji kadar Allah yijiib naadum al‑hu azalah min hillit Beet Laham. Wa hu yaji yahkim fi Madiinat al‑Khudus wa yisabbit al‑adaala wa yijiib al‑salaam.